Ndjambi ma kwizike okuyama otjiwaṋa tje
1 Israel, Muhona ngwe ku mema nu ngwe ku zezenga ma tja nai:
“O tira, ami mbe ku kutura;
mbe ku isana kena, oove owandje.
2 Tji mo kondo omeva omakoto,
ami me kara puna ove;
omaumba woye kamaaye ku tanana.
Tji mo tuurungire momuriro, ko nokupya ko;
oviwonga ovizeu mbi mavi ya kavi
nokukuhihamisa ko omutima.
3 Orondu ami owami Muhona, Ndjambi woye,
Omuyapuke wa Israel, Omuyame woye.
Ami me yandja Engipte konyoneno kutja mbi ku kuture,
me yandja Etiopie na Seba wina.
4 Ami me yandja omihoko otja otjipimba
kutja mbi yamene po omuinyo woye,
ove tjinga au ri otjihuze ku ami,
nu ambe ku suvera nokukuyozika.
5 O tira, ami mbi ri puna ove!
“Okuza kokure komuhuka na kokure kongurova
ami me eta ozondekurona zoye,
nu e ze woronganisa.
6 Ami me raere komukuma wokeyuva kokunene
kutja u ze ese ze yende,
nomukuma wokeyuva kokumuho kutja au he ze tjaere.
Kotoreye otjiwaṋa tjandje okuza komahi wokokure,
okuza kovikoro avihe vyouye.
7 Otjo otjiwaṋa tjandje omuini,
ami mbe tji memena kondjozikiro yandje.”
Israel otji tji ri otjihongonone tja Muhona
8 Ndjambi ma tja nai:
“Tumbuzireye otjiwaṋa tjandje kombanguriro!
Owo ve nomeho, nungwari kave munu;
ve nomatwi, nungwari kave zuu.
9 Oviwaṋa avihe ngavi ye kombanguriro.
Omukuru uṋe wawo vovisenginina
ngu ma yenene okuuka oruveze ndu maru ya?
Ouṋe mokati kawo ngwa ukire
imbi mbi mavi tjitwa nambano?
Oomukuru vovisenginina mba
ngave eterere ovahongononene vawo
okuraisa kutja owo ve ri osemba
nokutja ve hongonone ouatjiri wawo.
10 “Tjiwaṋa tja Israel, eṋe oweṋe ovahongononene vandje.
Ami mbe mu toorora kutja mu rire ovakarere vandje,
kokutja mu ndji tjiwe nu mu kambure mu ami,
nokutja mu tjiwe kutja ami
owami ngu mbi ri Ndjambi erike.
Posi yandje kape nomukuru warwe;
ke na indu wa ri po nu kamaa kakara po.
11 “Ami erike owami ngu mbi ri Muhona,
owami erike ngu me yenene okumuyama.
12 Ami mba zuvarisa imbi mbi mavi tjitwa,
nu tjazumba eya okumuyama.
Kape nomukuru wozonganda ngwa tjitire otjiṋa hi;
oweṋe ovahongonene vandje.
13 Ami owami Ndjambi,
nu aruhe otjinga ame kara nao.
Kape na ngu ma yenene
okuhakana umwe meke randje;
ami me tjiti otjiṋa,
nu kape ngu ma sora okutjirundurura.”
Ondauriro okuza kObabilon
14 Omuyapuke wa Israel, Muhona ngu yama eṋe, ma tja nai:
“Ami me hindi otjimbumba tjovita tji matji karwisa Babilon
kutja mbi mu yame;
ami me teya omivero vyotjihuro,
nu ondavaerero yovature vatjo mai rire omaririro.
15 Ami owami Muhona, Omuyapuke weṋu.
Owami Omuute weṋu, Vaisrael,
nu owami ombara yeṋu.”
16 Rukuru Muhona wa ungurire ondjira mokuvare,
omurari mokati komeva omazeu.
17 Eye wa twara otjimbumba tjOvaengipte tjovita
otjimbumba tjomatemba wovita noukambe.
Owo va wa, nu kamaave sekama ko rukwao,
va zemisiwa otja orururumo rwemunine.
18 Nungwari Muhona ma tja nai:
“Amu kakatere kovitjitwa vyoruveze ndwa kapita,
nu amu kara na ko na tja noviṋa vyarukuru.
19 Tareye, ami me ungura oviṋa ovipe.
Ovyo nai mavi tjitwa;
eṋe mamu vi munu nambano.
Ami me ungura ondjira,
ndji mai tuurunga okuti onguza,
nu me mu pe omipupo vyomeva mu kwo.
20 Nandarire ovipuka vyokuti mavi ndji yozike;
ozombandje nozombo maze ndji tanga,
indu tji me pupisa ozonḓonḓu mokuti orunguza,
kokutja mbi yandje
omeva kotjiwaṋa tjandje otjitoororwa.
21 Otjo otjiwaṋa tji mbe riungurira omuini,
notjo matji imbura ondangero yandje!”
Ourunde wa Israel
22 Muhona ma tja:
“Nungwari ove, Israel, ko kondjere okurikendera ami;
ove ko na pu we rikotamena ku ami.
23 Ove ko na pu we ndji etera ozonḓu
okuzepunguha ze rire ozombunguhiro ozoningiririsiwa;
ko na pu we ndji yozika
nozombunguhiro zovinamuinyo.
Ami hi ku kurungisire mokukuningira
ozombunguhiro zovikurya,
nu hi ku kondjisire mokukuningira ovyomoro omuwa.
24 Ove ko na pu we ndji randera ovyomoro omuwa,
nu ko ndji harisire onḓi
yozonḓura zovinamuinyo vyoye.
Moruveze rwanao ove we
ndji kurungisa nouvi woye,
nu we ndji urisa nozongatukiro nḓu wa tjita.
25 Nu vari, ami, owami Ndjambi
ngu mbi ku isira ozongatukiro zoye
mena rokutja me vanga okutjita nao.
Ami hi nokurizemburuka nouvi woye rukwao.
26 “Ngatu yende kombanguriro; ngatu rondorasane!
Yandja otjiposa tjoye u raise kutja u ri osemba.
27 Iho mukururume omutenga wa turire ondjo;
ovanane voye va turire ondjo komurungu wandje,
28 novahongore voye va yamburura otjouyapuke tjandje.
Ami otji mba yandeka Israel;
mba yambururisa otjiwaṋa tjandje omuini.”
© Herero Revision Bible © Bible Society in Namibia, 2021.
