Ongumbiro yombatero
1 Owee kove, mu punde, ngu u ha pundwa, na kove, munavineya, ngu ha tjitwa ovineya! Tji wa zu nokupunda, ove omuini mo pundwa, nu tji wa zu nokutjita ovineya ove omuini mo tjitwa ovineya.
2 Muhona, ṱotjari na eṱe. Eṱe tu undja kove. Tu tjizikiza omuhuka auhe, nu tu yama tji tu ri moumba! 3 Tji mo tu rwire, oviwaṋa mavi tupukisiwa i ondokohero yotjirwa, nu mavi rimbara. 4 Ouini wavyo mau pundwa tjimuna ozombahu tji ze seseta ovihape; mu wo mamu taurirwa tjimuna ozombahu tji ze tjita.
5 Muhona, tjiri, omunene! Eye u honapara kombanda yoviṋa avihe. Eye me urisa Jerusalem nousemba nozondjito zousemba, 6 nu ma yandja omazikameno kotjiwaṋa. Eye aruhe ma tjizikiza otjiwaṋa tje, nu me tji pe ounongo nondjiviro. Otjihuze tjatjo otjinene otjo okuyozika Muhona.
7 Ovarumendu omapenda mave ku ombatero momivanda. Novahindwa, mba kondja okueta ohange, mave riri tjinene. 8 Ozondjira ozombaranga ozo ozonaumba tjinene nai, nga tji pe ha ningi omundu ngu ryanga mu zo. Omakutasaneno maye teyewa, nomazuvasaneno maye nakaurwa. Okuyozika omundu kaku tji po rukwao. 9 Ehi ri ri tjo nu ongaango, omahwa wa Libanon ya kukuta, otjana otjihapise tja Saron tji ri tjimuna okuti onguza, nu mObasan na kondundu Karmel omaso ya pukumuka komiti.
Muhona ma rongo ovanavita na ye
10 Muhona ma tja nai koviwaṋa: “Nambano ami me sekama, nu me raisa kutja omasa wandje ye ṱeki pi. 11 Eṋe mu ripura oviporoporo uriri, noviṋa avihe mbi mu tjita kavi nohepero. Ombepo yandje i ri otja omuriro mbu mau mu seseta. 12 Oviwaṋa mavi nyanyauka tjimuna oruuwa ndwa ningiririsiwa okurira otjitwetwe, tjimuna omakuiya ngu maye ningiririsiwa okurira omutwe. 13 Eṋe mbu mu ri kokure, zuveye oviṋa imbi mbi mba tjita; neṋe mbu mu ri popezu, tjiweye ouvara wandje.”
14 Ovandu ovarunde va Sion mave zezera nokuuruma. Owo mave tja: “ombanguriro ya Ndjambi i ri otja omuriro mbu seseta. Umwe wetu maa yenene okuhupa momuriro mbwi mbu nyosa nga aruhe are?” 15 Mo hupu, indu tji mo hungire ouatjiri, nu tji mo tjiti imbi mbi ri ovisemba. O tjiti omasa okutikura omusyona, nu o kambura oviṋa vyombopero; o rikutu kuna imba mbe ripura okuzepa nu mbe tjita oviṋa vyarwe ovivi. 16 Otji mo kara nawa nokuhinoumba; mo kara nokuhinatjipo aayo u ri motjiṱunga otjinamasa. Mo kara novikurya okurya nomeva okunwa.
Oruveze oruwa ndu maru ya
17 Otjikando tjimwe rukwao mo munu ombara, ndji honapara mouwa wayo kombanda yehi nda tandavara komikuma avihe. 18 Okutira kwoye okukuru kwovozonganda nozohoze mbaa ve sutisa otjisuta tjouhona, maku rire ourizemburuka uriri kove. 19 Komoo uhara amo munu ovozonganda ovirangaranga mbu mave hungire eraka ove ndi u hi nokuzuva. 20 Tara kOsion, otjihuro mu tu tjitira omikandi vyetu vyongamburiro! Tara kOjerusalem! Otjo otjihuro mu mu hi noumba okutura mo. Tji ri otja ondanda ndji ha tjindisiwa, yozomboha nḓe ha homonwa, nu yozongoze nḓe ha porwa. 21 Muhona me tu raisire ouvara we. Eṱe matu tura meṋe yozonḓonḓu nomipupo omiparanga, nungwari ozondjuwozomomeva ozonavita, nangarire ouyaha womeva, kamaavi tendeza ko mu zo. 22 Orondu Muhona omupangure wetu, Muhona omuhonapare wetu, Muhona ombara yetu; eye me tu yama. 23 Ozongoze zozondjuwozomomeva ze rekareka ohuru, ozo kamaaze ṱizire ozombaze zozongunḓe zazo potuveze twazo, ozo kaze nokunyaturura omarapi wokuzehinga; ovipunda ovingi mavi haṋewa, nangarire ovaremane mave pewa ovipunda. 24 Nu kape nomundu ngwa tura mehi retu, ngu ma unauna rukwao kutja eye wa vera, nomauvi aehe maye isirwa.
© Herero Revision Bible © Bible Society in Namibia, 2021.
