Jesaja 11 - Herero Revision Bible (HRR)

Omatjivisiro womeero wa Mesias, Omutwirisiwa wa Muhona

1 Ondekura yomuze wa David iri tjimuna omuti mbwa kondwa; norutavi maru nyomoka motjiunda, nomukono mbu mau piti momize vyatjo mau eta ovihape. Ombara ombe mai zu mozondekurona za David.

2 Ombepo ya Muhona mai ya kombanda ye,

Ombepo younongo noyozondunge,

Ombepo yomavyuriro noyomasa,

Ombepo yondjiviro noyondira ku Muhona.

3 Eye ma kara nonyuṋe mondira ku Muhona.

Eye ke nakupangura otja kombunikiro yomundu,

notja komambo ngu ma zuu uriri nao.

4 Nungwari eye ma pangura ovasyona

nokuhinandoorora,

nu ma karere kovanandjenda

mousemba wawo.

Eye ma vere ingwi otjindandi otja

komarakiza we omanamasa,

nu ma zepa ovanauvi nombanguriro ye.

5 Eye ma honaparere otjiwaṋa tje nousemba,

na wina nouṱakame.

6 Ombungu mai kara puna ondjona mohange,

notjitotongwe matji rangavara puna ongombona.

Ondana notjikeyamona mavi ri pamwe,

nokazandona make rire okarise kavyo.

7 Ongombe onḓenḓu nongu onḓenḓu

mavi kara nomaryo yemwe;

nozondana zazo maze rangavara pamwe

mohange.

Ongeyama mai ri ehozu otja

ongombe.

8 Nangarire okanatje okanyame make nyandere

pomuina wonyoka youzuwo,

nu inga ku ka tongatonga,

make ropororere eke rako

pomuina womuzorongondo.

9 Kaku nokutjitirwa otjipo poo ourunde kOsion,

indji ondundu ondjapuke ya Ndjambi.

Ehi mari ura nondjiviro ya Muhona

tjimuna okuvare tji kwe ura nomeva.

Omakotokero wovahuurwa

10 Eyuva mari ya ombara ombe ndji mai zu momuze wozondekurona za David, ndji mai rire otjiraisiro koviwaṋa. Ovyo mavi woronganene motjihuro tjayo navi yandja ondjozikiro kuyo. 11 Eyuva ndo tji reya, Muhona ma ungurisa omasa nouvara we rukwao na kotora konganda imba ovandu votjiwaṋa tje mba sewa mOasirie na mOengipte, mehi ra Patros nora Sudan nora Elam nora Babilon nora Hamat na momakoverwa. 12 Muhona ma yere erapi rotjihako okuraisira oviwaṋa kutja eye ma woronganisa rukwao imba Ovaisrael nOvajuda mba rimbara, nokutja meve kotora okuza kovikoro avihe vine vyehi. 13 Ouhona wa Israel kamaau uhara amau ṱeruru na imbwi owa Juda, nOvajuda kamaave uhara amave rire ovanavita nOvaisrael. 14 Owo pamwe mave rwisa Ovafilisti komukuma wokongurova, nu mave pundu ovandu, mba tura komukuma wokomuhuka. Owo mave havere Ovaedom nOvamoab, nu imba Ovaamoni mave kara kehi yawo. 15 Muhona ma kahisa Omuronga wa Sues, nu ma eta ombepo ombyu kutja i kahise onḓonḓu Eufrat, nu ma sye po oturonḓu otuṱiṱi hambombari uriri, kokutja omundu ngamwa auhe a yenene okukonda. 16 Nu mape kara ondjira ombaranga okuza kOasirie mu mamu kotoka otjiwaṋa tja Israel, ihi tji tja hupa mehi ndo, otja tji pa ri kooihe mukururume indu tji va pitire mOengipte.