Hosea nomukazendu omuhaṱakama
1 Muhona wa tja nai ku ami: “Twende rukwao u kasuvere omukazendu ngu katuka orukupo puna ombarise. Mu suvera tjimuna ami nga mba tji mba suvera Ovaisrael, nangarire kutja owo ve tanaukira koomukuru varwe, nu ve vanga okutwara oviyandjewa vyozombunguhiro zomandjembere nga kahisiwa ku wo.”
2 Ami otji mba suta ovimariva ovisilveri omurongo na vitano, novirya vyozokirograma esere nomirongo vitano okuranda na vyo omukazendu ngwi. 3 Ami mbe mu raera kutja ma sokundjiundja oruveze orure, a ha rire omukorondu na ha katuka orukupo; nu moure woruveze ndwi ami wina me mu undju. 4 Momuhingo tjingewo mbwi otjiwaṋa tja Israel opunga ama tji kara oruveze orure nokuhinozombara novanane, nokuhinozombunguhiro nozongunḓe ozonḓere zomawe, nokuhinoviserekarera vyovisenginina okurikotamena ku vyo. 5 Nungwari oruveze maru ya otjiwaṋa tja Israel mu matji tanaukire ku Muhona, Ndjambi watjo rukwao, na kondekurona ya David, ombara yatjo. Notjo matji kara nondira ku Muhona nu atji pewa oviyandjewa vye oviwa.
© Herero Revision Bible © Bible Society in Namibia, 2021.
