1 Isaneye Ovaisrael ovakweṋu mu tje “Tjiwaṋa tja Ndjambi”, nokutja “Mwa suverwa i Muhona”.
Gomer omuhaṱakama u ri otja Israel otjihaṱakama
2 Vanatje vandje, rondoreye nyoko, nandarire kutja eye kamukazendu wandje rukwao, nami kawami omurumendu we rukwao. Riyarikaṋeye ku ye kutja a ise oukorondu na ha katuka orukupo. 3 Nu tje ha tjitire nao, ami me mu hukura ozombanda kutja a kare muzu tjimuna meyuva ndi eye ma kwatwa. Ami me mu sanisa kehi nda kukuta nongaango, neye ma ṱu i onyota. 4-5 Ami hi nokuṱira ovanatje ve ondjenda; owo ovanatje vomukorondu ngu ha ṱohoṋi. Omukazendu omuini wa tja nai: “Ami me i kozombarise zandje, owo mave kendjipa ovikurya nomeva, nomainya wozonḓu notupera, nomaze womiṋinga nomavinu.”
6 Ami otji me mu patere movihwa vyomakuiya, nu me tungu orumbo ndu maru mu tjaere akuhe ku ma vanga okuyenda. 7 Eye ma tezere ozombarise ze, nungwari kemee kezevaza ko. Me ze paha, nungwari kemee kezemuna ko. Tjazumba otji ma tja nai: “Ami me yaruka komurumendu wandje ingwi omutenga, orondu ami ee kara nawa komeho yaindu tjinga ambi ri nambano.”
8 Omukazendu wandje ngwi kamaa itavere kutja owami ngwi nguye mu pe ovikokotwa nomavinu nomaze womiṋinga nosilveri nongoldo aihe okuungura po oviserekarera vya Baal. 9 Moruveze rwomakondero ami otji me kotora oviyandjewa vyovikokotwa novyomavinu, nu me mu yeka omainya wozonḓu notupera mbi mbe mu pa a ungure po ozombanda ze. 10 Ami me mu hukura ozombanda ze a sewe muzu momurungu wozombarise ze, nu kape na ngu ma yenene okumukutura momake wandje. 11 Ami me yandisa omayuva we aehe wOmatendameno wOmueze nomikandi vye vyOmasabata nomayuva we aehe warwe omanene.
12 Ami me nyono omivite nomikuyu vye eye mbya tjere wa pewa i ozombarise ze mena rokutja eye we ze karera. Me hapisa ovikunino vye vyomivite vi rire ehwa; novipuka vyokuti mavi vi nyono. 13 Ami me mu verere otuveze eye twe ndji zemba, indu tjaa twimisire Baal ovyomoro omuwa, nu tjaa zara oviwerawere vye kutja a kongorere ozombarise ze. OMuhona ongwa hungire.
Orusuvero rwa Ndjambi kotjiwaṋa tje
14 Ami otji me twara omukazendu wandje ngwi mokuti onguza rukwao; ingo ami me kemupopa nomambo worusuvero. 15 Ami me mu yarurire ovikunino vye vyomivite mbya ri na vyo, nu me rundurura Omukutu wOumba u rire Omuvero wOmaundjiro. Eye ma kapuratena ku ami koṋa ngo tjimuna tjaa tjiti indu tja ri omutanda tja zire kOengipte. 16 Tjazumba eye otji me ndji vara rukwao otja omurumendu we, nu ke nokuuhara ame ndji vara otja Baal we. 17 Ami hi nokumuyandjera ko kutja a tamune ena ra Baal rukwao.
18 Moruveze ndo ami me tjiti omerikutiropamwe novipuka vyokuti avihe nozonḓera azehe noupuka auhe mbu honahona pehi kokutja ovyo avi ha tjiti otjipo kotjiwaṋa tjandje. Ami wina me isa mo ovirwise avihe mehi, nomangaruvyo nomauta aehe, nu me hupisa otjiwaṋa tjandje mohange na mouṋingandu.
19 Israel, me ku vareke u rire omukazendu wandje; me kara nouatjiri nu me rire omuṱakame kove; me ku raisire orusuvero orukarerere ne ku ṱire otjari wina, nu mo rire owandje nga aruhe.
20 Ami me ṱakamisa omakwizikiro wandje, nove mo rire owandje, nu otji mo ndji tjiwa kutja owami ngu mbi ri Muhona.
21-22 Moruveze ndo ami me ziri ozongumbiro zotjiwaṋa tjandje tja Israel. Me rokisa ombura kombanda yehi, nehi mari hapisa ovikokotwa nomandjembere nozoṋinga.
23 Ami me turisa otjiwaṋa tjandje mehi, nu me tji ṋingaparisa. Me raisa orusuvero ku imba mbaa ve isanewa kutja “Vahasuverwa”, na ku imba mbaa ve isanewa kutja “Katjiwaṋa tjandje”. Ami me tja: “Oweṋe otjiwaṋa tjandje”, nowo mave ziri nai: “Oove Ndjambi wetu”.
© Herero Revision Bible © Bible Society in Namibia, 2021.
