Omeriyarikaṋeno wa Hosea kOvaisrael
1 Ritanaureye ku Muhona, Ndjambi weṋu, tjiwaṋa tja Israel. Ourunde weṋu we mu putarisa au mu wisa. 2 Ritanaureye ku Muhona, nu ongumbiro ndji ngai rire ombunguhiro yeṋu ku ye: “Tu isira ourunde wetu auhe nu u yakure ongumbiro yetu, neṱe matu ku tanga otja pu twa kwizika. 3 Asirie kamaatji tu yama, noukambe wovita kamaau tu vatere. Eṱe kamaatu tja nai koviserekarera, mbi twa ungura nomake wetu: ‘Oweṋe Ndjambi wetu!’ Muhona, ove u ṱotjari na imba mbe hi nomundu ku mave sora okuriyameka.”
Muhona ma kwizikire Ovaisrael omuinyo omupe
4 Muhona ma tja nai: “Ami me kotora otjiwaṋa tjandje ku ami omuini. Me tji suvere nomutima wandje auhe, orondu hi tji nomazenge na tjo rukwao. 5 Ami me rire otja ombura mehi nda kukuta kotjiwaṋa tja Israel. Owo mave nyomoka otja ozongara zozonyanga; mave zikama nomasa tjimuna otupapa twa Libanon. 6 Owo mave nyomoka nave tandavara tjimuna omikono, nu mave rire ovawa ovamanise tjimuna omiṋinga. Owo mave kara nomoro omuwa tjimuna otupapa twa Libanon. 7 Owo mave hupu kehi yondjeverero yandje rukwao. Mave kunu ovikokotwa rukwao; nowo oveni mave nyomoka tjimuna omivite. Mave rire ovatjiukwa otja omavinu wa Libanon. 8 Ovaisrael kave nokukara ko na tja noomukuru vovisenginina. Owami erike ngu me yakura ozongumbiro zawo, nowami ngu meve tjevere; otja omuti mbu kara noruhapo aruhe, ami otjinga ame ve yama; nami owami omburo yozondaya zawo azehe.”
Omambo womaandero
9 Avehe mbe ri ozonongo ngave zuve imbi mbya tjangwa mba, nowo ngave vi ṱakamise momitima vyawo. Orondu ozondjira za Muhona ozo ozosemba, novasemba ve hupa mokuzetwara, nungwari ovarunde ve putara ave u, tjinga ave nakaura ozondjira nḓa.
© Herero Revision Bible © Bible Society in Namibia, 2021.
