Hosea 10 - Herero Revision Bible (HRR)

1 Ovaisrael va ri otja omuvite mbwe ura nomapunda womandjembere. Otja punga ava ririra ko ovaṋingandu opunga ava tungira ko ovipunguhiro. Nehi rawo punga ara etera ko ovihape opunga ava harekera ko ozongunḓe ozonḓere zomawe ku ve rikotamena, ze rire ozombwa ozomanise. 2 Otjiwaṋa tji tji ripura pevari pokati ka Ndjambi na Baal, nambano matji sokuhihamisirwa omauvi watjo. Ndjambi ma teya ovipunguhiro vyatjo, nu ma hahaura ozongunḓe zatjo ozonḓere zomawe.

3 Otjiwaṋa hi matji tja nai tjimanga: “Eṱe katu nombara tjinga atu ha karere nondira ku Muhona. Nu hapo indji ombara itjai tu tjitira tjike?” 4 Owo ve nyomborora omambo wakauriri, nu ve tjita omakwizikiro woposyo nomazuvasaneno womungandjo. Ousemba wa rira ouhasemba amau kurire ko tjimuna ozohongwe zouzuwo motjikunino tjehi nda taurwa.

5 Ovandu, mba tura motjihuro Samaria mave tira nu mave toora oruhoze kotjiserekarera tjondwezu yongombe tjongoldo tji va pandjarisa mObet-Awen. Owo novapristeri mbe karera otjiserakarera hi mave rire tjo. Mave uru otjo tji matji teturwa ongoldo youwa oumanise watjo. 6 Otjiserekarera tjondwezu yongombe hi matji twarewa kOasirie tji karire otjiyandjewa tjondjozikiro kombara onene. Israel matji yambururwa nu matji ṱisiwa ohoṋi mena rotjiserekarera hi. 7 Samaria matji yandekwa; ombara yatjo mai twarewa tjimuna otjindimbu tjomuti mozongazona zomeva. 8 Poṋa pomerikotameneno kozondunda za Bet-Awen, Ovaisrael pu ve rikotamenena kovisenginina, mape hahaurwa. Omakuiya nozohongwe mavi hapa kovipunguhiro vyawo. Ovandu otji mave ravaere kozondundu ave tja: “Tu horekeye!” nu kozondunda mave ravaere nai: “Wireye kombanda yetu!”

Muhona ma tjivisa ombanguriro kOvaisrael

9 Muhona ma tja nai: “Otjiwaṋa tja Israel katjiya isa okutjita ourunde komurungu wandje okuza koruveze ndwi rwourunde watjo mOgibea. MOgibea ovita otji mavi tji vaza. 10 Ami me rwisa otjiwaṋa otjirunde hi, nu me tji vere. Oviwaṋa mavi rikutu kumwe okutjirwisa, notjo matji vererwa ourunde watjo.

11 “Otjikando tjimwe otjiwaṋa tja Israel tja ri ohamukwao nondana ondema ndja hongwa nawa nu ndje rirongerera okuyata ovikokotwa. Nungwari ami mba tya okutwa ko otjiyoke kosengo yayo ombwa omanise nokuikutira oviungura ovizeu tjinene komeho. Ami mba tjita kutja Efraim a nane otjitaure tjehi, nokutja Israel a nane otjiserure tjehi. 12 Ami mba tja nai: ‘Ritaurireye oveni ehi epe, kuneye ousemba nu mu nikore ozondaya nḓu maze etwa i omeriyamekero weṋu ku ami. Oruveze rwa yenene ku eṋe okuritanaurira ku ami, ngu mbi ri Muhona weṋu, nami meya okutirira ozondaya kombanda yeṋu.’ 13 Nungwari moruveze rwanao eṋe mwa kuna ourunde namu nikora ovinikora vyawo. Eṋe mwa rya ovihape mbya etwa i ovizeze vyeṋu.

“Eṋe tjinga amwe riyameka komatemba weṋu wovita na kovarwe veṋu wovita ovengi tjinene, 14 ovita otjinga amavi ya kotjiwaṋa tjeṋu, noviṱunga vyeṋu avihe mavi hahaurwa. Mape sana tjimuna eyuva ndi ombara Salman ma haṋene otjihuro Bet-Arbel motjirwa, nooina novanatje vawo mu va ṱa okuṱukuṱuka. 15 Ihi otji matji tjitwa ku eṋe, vature va Betel, mena rourunde outirise mbu mwa tjita. Tjimanga otjirwa tjinga atja utu, ombara ya Israel otji mai ṱu.”