1 Omupristeri Otjiuru auhe eye omundu ngwa toororwa movandu, nu ngwa zikirwa okukarera Ndjambi mena rovandu nokupunguha oviyandjewa nozombunguhiro mena rourunde. 2 Neye tjinga e ri omundu omupore, u sora okuṱondjenda na imba ovahatjiwa novapuke. 3 Punao, eye omuini, u sokuripunguhira ombunguhiro mena rourunde we, otja tje punguhira ourunde wovandu varwe. 4 Kape nomundu ngu ritoororera omuini ondjozikiro yokurira Omupristeri Otjiuru, nungwari eye u isanewa i Ndjambi porwe okurira Omupristeri Otjiuru otja Aron.
5 Nu momuhingo tjingewo wina Kristus ke ritoororerere omuini ondjozikiro yokurira Omupristeri Otjiuru, nungwari Ndjambi ongwe mu pa ondjozikiro ndji, indu tja tja:
“Oove Omuna wandje,
ndinondi ami ondi mbe ku kwata.”
6 Nu poṋa parwe eye ma tja:
“Oove omupristeri nga aruhe otja komuhingo woupristeri wa Melkisedek.”
7 Nu Jesus ngunda e nomuinyo kombanda yehi, eye wa kumba nokuriyarikaṋa mozongumbiro ze nondjuriro onene nomahoze ku Ndjambi, ngwa yenenene okumuyama konḓiro. Neye wa zuvirwa ozongumbiro ze motjimbe tjomerisusuparisiro nomeriyamekero ku Ndjambi. 8 Nu nandarire kutja eye wa ri Omuna wa Ndjambi, we rihonga okukara nonḓuviro momahihamisiro we aehe. 9 Neye tja yenenisa imbi mbye sokuyenenisa, wa rira oruharwi rwondjamo yaaruhe ku imba mbe nonḓuviro ku ye, 10 nu Ndjambi we mu zika okurira Omupristeri Otjiuru otja komuhingo woupristeri wa Melkisedek.
Omaronga otja kokupoka kongamburiro
11 Eṱe tu novingi tjinene okuhungirira otjiṋa hi, nungwari ouzeu tjinene okumumangururira, tjinga amu toora orure okuzuva nawa. 12 Eṋe oveni mwa ri noruveze ndwa yenena okurira ovahonge, nungwari nga mba mu hepa omundu okumuhonga ovirihongwa ovitenga vyombuze ya Ndjambi. Eṋe ingee mu hepa omaihi, nu kamu hepa ovikurya oviṱaṱunwa. 13 Omundu ngu hupa momaihi kamaa sora okutyasana puna ovandu varwe kutja oviṋa ovisemba poo kavisemba, orondu eye tjinga e ri otja okanatje. 14 Ovikurya oviṱaṱunwa ovyo ovyovandu ovanene, okutja ovandu mbe nozondunge nu mba iririra okupangura pokati kouwa nouvi.
© Herero Revision Bible © Bible Society in Namibia, 2021.
