Esra 7 - Herero Revision Bible (HRR)

Esra meya mOjerusalem

1 Kombunda yozombura ozengi, Artakerkes tja ri ombara mOpersie, mwa ri omurumendu wena Esra. Tji wa teza omuhoko we, ooihe mukururume va zire mu Aron, Omupristeri Otjiuru, otja tji pa kongorerere mba: Esra wa ri omuzandu wa Seraja, omuzandu wa Asarja, omuzandu wa Hilkija, 2 omuzandu wa Salum, omuzandu wa Sadok, omuzandu wa Ahitub, 3 omuzandu wa Amarja, omuzandu wa Asarja, omuzandu wa Merajot, 4 omuzandu wa Israkja, omuzandu wa Usi, omuzandu wa Buki, 5 omuzandu wa Abisua, omuzandu wa Pinhas, omuzandu wa Eleasar, omuzandu wOmupristeri Otjiuru Aron.

6 Esra wa ri omuhongwa wanawa nu wa ri onongo mOmatwako Muhona, Ndjambi wa Israel, nga yandjere ku Moses. Esra tjinga a ri nondaya ya Muhona, Ndjambi we, ombara otjaa i mu pe otjiṋa ngamwa atjihe tja ningire. 7 Mombura oitjahambombari youhona wa Artakerkes, Esra wa kumuka mObabilon na i kOjerusalem puna otjimbumba tjOvaisrael mu mwa ri ovapristeri nOvalevi, novaimbure vondjuwo ya Muhona, novatjevere novaungure vayo. 8-9 Owo va sekama mObabilon meyuva etenga komueze omutenga, nave kavaza kOjerusalem puna ombatero ya Ndjambi meyuva etenga komueze outjatano.

10 Esra ngunda e nomuinyo wa kara pokukonḓonona Omatwako wa Muhona kutja e ye ungurise nu a honge omazikamisiro nomihingo vyOmatwako nga kotjiwaṋa tja Israel.

Orutuu rwomatjivisiro Artakerkes ndwa yandja ku Esra

11 Artakerkes wa yandja orutuu rwomatjivisiro ku Esra, omupristeri nomuhongwa wanawa ngwa ri onongo mOmatwako na momazikamisiro Muhona nga yandjere kOvaisrael. Orwo maru tja nai: 12 “Orutuu ndwi maru zu ku Artakerkes, ombara, nu maru i ku Esra, omupristeri nomuhongwa onongo mOmatwako wa Ndjambi weyuru.

13 “Ami me rakiza kutja mouhona wandje Ovaisrael avehe novapristeri nOvalevi mbe nombango okuyenda kOjerusalem ve yende puna ove. 14 Ami, puna ovayandjandunge vandje hambombari, me ku hindi u kakonḓonone ongarero mOjerusalem na mOjuda, nu u katjiwe kutja ovandu, tjiri, ve kara nawa nonḓuviro kOmatwako wa Ndjambi weṋu eye nge mu pa. 15 Ove mo twara oviyandjewa vyongoldo novyosilveri ami novayandjandunge vandje mbi matu vanga okuyandja ku Ndjambi wa Israel, ngwa tura mondjuwo ye mOjerusalem. 16 Wina mo twara osilveri nongoldo aihe, ndji mo wongo morukondwa rwa Babilon, noviyandjewa Ovaisrael novapristeri vawo mbi mave yandjere ondjuwo ya Ndjambi wawo mOjerusalem otja kombango yawo oveni.

17 “Novimariva mbi mo sokuviungurisa nawa nu randa na vyo ozondwezu zozongombe nozozonḓu nozondjona, novikokotwa nomavinu, noviṋa mbi mo punguhire kotjipunguhiro tjondjuwo ya Muhona mOjerusalem. 18 Osilveri nongoldo ndja hupu, ungura na yo ngamwa atjihe ove novakweṋu tji mamu vanga otja kombango ya Ndjambi weṋu. 19 Ovitjuma avihe mbya yandjewa kove okuungura na vyo oviungura vyondjuwo ya Muhona yandja ku Ndjambi mOjerusalem. 20 Noviṋa avihe ovikwao mbi mo hepere ondjuwo ya Muhona mo pewa okuza mombwiko youhona.

21 “Ami me rakiza kovatjevere avehe vombwiko youhona morukondwa rokongurova kwa Eufrat kutja ve yandje tjimanga ku Esra, ingwi omupristeri nonongo mOmatwako wa Ndjambi weyuru, otjiṋa ngamwa atjihe tji ma ningire, 22 nga kosilveri yozokirograma 3 400, novikokotwa vyozokirograma 10,000, nomavinu wozorita 2,000, nomaze womiṋinga wozorita 2,000, nomongwa omuingi otja pu mape hepwa. 23 Ove tjita ouatjiri kutja mo yandja ngamwa atjihe Muhona weyuru tja rakiza otja otjihepwa kondjuwo ye, nu u ṱakamise kutja eye a ha pindikire ami poo imba mbu maave kahonapara kombunda yandje. 24 Eṋe mwa tjaerwa okuwonga otjisuta ngamwa tjouhona movapristeri na mOvalevi na movaimbure na movatjevere na movaungure poo mu ngamwa auhe warwe ngu ri motjiungura tjondjuwo ya Muhona.

25 “Ove, Esra, ungurisa ounongo Ndjambi woye mbwe ku pa, nu u zike ovatye novapangure, ve honaparere ovandu avehe mehi rokongurova kwa Eufrat mbe tjiwa Omatwako wa Ndjambi woye. Honga Omatwako nga ku ngamwa auhe ngu hi nokuyetjiwa. 26 Ngamwa auhe ngu hi nokukara nonḓuviro kOmatwako wa Ndjambi poo omatwako wouhona nga verwe tjimanga, okutja nga ṱe poo nga twarewe kouhuura poo nga yekwe ouini we poo nga tuwe motjovakamburwa.”

Esra ma tanga Ndjambi

27 Esra wa tja nai: “Muhona, Ndjambi wootate mukururume nga tangwe! Eye wa tjita kutja ombara i kare nouvanga wokuyozika ondjuwo ya Muhona mOjerusalem komuhingo mbwi. 28 Motjari tja Ndjambi ami mba muna ondjingonekero kombara na kovayandjandunge ve na kovahongore ve avehe ovanauvara; Muhona, Ndjambi wandje we ndji panḓiparisa, nami mba yenene okuworonganisa oviuru ovingi vyozonganda za Israel kutja vi kotoke puna ami.”