Esekiel 47 - Herero Revision Bible (HRR)

Omupupo mbu pupa okuza pondjuwo ya Muhona

1 Omurumendu we ndji yarura komahitiro wondjuwo ya Muhona, nu tara, pa ri omeva ngaa e piti okuza kehi yomuti omutyakaṋa womuvero, nu ngaa e pupu okuyenda komuhuka momuhunga mu mwa tarere ondjuwo ya Muhona. Owo iyaye pupu okuza kehi yokomukuma wokeyuva kokumuho kwondjuwo ya Muhona naye kapita komukuma wokeyuva kokumuho kwotjipunguhiro.

2 Omurumendu we ndji pitisira momuvero wokeyuva kokunene nu e ndji kondorokisa komuvero mbwa tarere komuhuka. Omupupo omuṱiṱi womeva aa u pupu okuza komukuma wokeyuva kokumuho kwomuvero. 3 Omurumendu wa saneka nokati ke ozometa omasere yetano okupunda komuhuka nu e ndji raere kutja mbi kondoroke omupupo poṋa mbo. Omeva iyaye vaza kovingombwe vyandje uriri. 4 Tjazumba arire tja saneke ozometa ozongwao omasere yetano, nomeva iyaye vaza nga kozongoro zandje. Ozombeta ozongwao omasere yetano komurungu omeva iyaye vaza pomavango wandje. 5 Eye wa saneka ozometa omasere yetano komurungu, nu poṋa mbo omupupo wa ri omukoto tjinene kutja e ha sora okukonda. Owo wa ri omukoto tjinene okukonda posiya andakuzu mbi tendeza. 6 Eye wa tja nai ku ami: “Muatje womundu, tara avihe mbi nawa.”

Omurumendu we ndji yarura komukuro wonḓonḓu, 7 nu tji mbe ya ngo e munu kutja ku nomiti omingi tjinene komikuro aviyevari. 8 Omurumendu wa tja nai ku ami: “Omeva nga ye pupa okutuurunga ehi okuyenda komuhuka nga komukutu wa Jordan na kOmuronga wOmongwa. Owo tji ya pupire mOmuronga wOmongwa ye tjitukisa omeva womongwa nga okurira omeva omawa. 9 Ngamwa akuhe onḓonḓu ndji ku mai pupire, oku maku kakara ovipuka ngamwa avihe nozohi. Onḓonḓu mai tjitukisa omeva wOmuronga wOmongwa okurira omawa, nu ngamwa akuhe ku mai pupire mai eta omuinyo. 10 Okuza koruharwi rwa Engedi ondjira aihe nga koruharwi rwa Eneglajim mape kara ovapate vozohi komukuro womuronga, nowo mave yara ozombate zawo mba kutja ze kahe. Mamu kara omihoko omingi pekepeke vyozohi tjimuna inga nge ri mOmuronga Mediterania. 11 Nungwari omeva nge ri motjinoko na momarindi meṋe yomuronga kaye nokurira omakohoke. Owo maye kara mo aye rire omburo yomongwa. 12 Komikuro aviyevari vyonḓonḓu maku hapa omiti ngamwa avihe, novyo mavi eta ovikurya. Omaso wavyo kamaaye kukuta ko, novyo kamaavi isa okueta ovihape. Ovyo mavi twako ovihape oviwa omueze auhe, tjinga avi tjatjwa i onḓonḓu, ndji pupa okuza pondjuwo ya Muhona. Omiti mavi eta ovikurya nomaso wavyo aye ungurisiwa kokuverukisa na wo ovandu.”

Omiruko vyehi

13 Muhona Ndjambi wa tja nai: “Imbi ovyo omiruko vyehi, mbi mavi haṋewa momihoko omurongo na vivari, nu imbwi omuhoko wa Josef mau pewa otukondwa tuvari. 14 Ami tjiri, mba kwizikira ooiho mukururume kutja meve pe ehi ndi ri rire otjirumatwa tjawo; nambano haṋasaneye pu pe ṱeki pamwe.

15 “Omuruko wokeyuva kokunene wa ya kuṱa komuhuka okuza kOmuronga Mediterania, au i kotjihuro Etlon na kOmakapitiro wa Hamat na kotjihuro Sedad, 16 na kovihuro Berota na Sibrajim; ovyo vi ri pokati kehi rouhona ra Damaskus na indi rouhona ra Hamat nga kotjihuro Hasar-Enan tji tji ri komukuro wouhona wa Hauran. 17 Omuruko wokeyuva kokunene otji wa za mOmuronga Mediterania okuyenda komuhuka kotjihuro Enan; nomuruko worukondwa rwa Damaskus norwa Hamat wa ri komukuma wokeyuva kokunene kwawo.

18 “Omuruko wokomuhuka wa ya komukuma wokeyuva kokumuho okuza kotjikoro tji tji ri pokati kehi ra Damaskus na indi ora Hauran puna onḓonḓu Jordan, ndji ri omuruko pokati kehi ra Israel kongurova nora Gilead komuhuka, nau i nga kOtamar kOmuronga wOmongwa.

19 “Omuruko wokeyuva kokumuho wa ya kuṱa keyuva kokumuho okuza kOtamar nga kOmeva wOzombata wa Kades, tjazumba au i komukuma wokeyuva kokunene meṋe yomuruko wa Engipte nga kOmuronga Mediterania.

20 “Omuruko wokongurova wa utira meṋe yOmuronga Mediterania nau i kuṱa keyuva kokunene nga kotjikoro tji tji ri komukuma wokongurova kwomakapitiro wa Hamat.

21 “Haṋeye ehi ndi mokati komihoko vyeṋu vya Israel 22 oro ondi mari rire ouini weṋu oukarerere. Ovandu wozonganda mba tura mokati keṋu, nu mbe novanatje mba kwaterwa muno, wina mave pewa outukondwa wawo wehi tji mamu ri haṋa. Owo mave varwa otja Ovaisrael ovakwatera nu mave veterwa okumuna otukondwa twehi puna omihoko vya Israel. 23 Omundu wozonganda auhe omuture ma pewa okarukondwa ke puna ovandu vomuhoko mbu va tura mumwe. Ami, ngu mbi ri Muhona Ndjambi, owami ngu mba hungire.”