Esekiel 46 - Herero Revision Bible (HRR)

Omunane Ohivirikwa nOmikandi

1 Muhona Ndjambi ma tja nai: “Omuvero wokuhita morupanda rwomoukoto u sokukara awa patwa oure womayuva hamboumwe woviungura, nungwari u sokupatururwa mesabata na meyuva romukandi wOmatendameno wOmueze. 2 Omunane ohivirikwa ma zu morupanda rwopendje na hiti metuwo ndi enene moruhito na kakurama meṋe yozongambezero zomuvero, ovapristeri ngunda amave punguha ozombunguhiro ze ozoningiririsiwa nozokutja okuhepa. Pomuvero eye u sokurikotamena, tjazumba a piti rukwao. Omuvero mau patwa ongurova. 3 Mesabata arihe na mEyuva arihe enene rOmatendameno womueze ovandu wina ve sokurikota nave rikotamene ku Muhona momurungu womuvero.

4 “Mesabata omunane ohivirikwa u sokueta ozondjona hamboumwe ku Muhona, nondwezu imwe yonḓu, azehe nḓe hi novipo, ze rire ozombunguhiro ozoningiririsiwa. 5 Puna ondwezu aihe peke yonḓu eye u sokueta ovikokotwa vyozorita omurongo na hambombari nohinga, nu puna ondjona aihe peke eye u sokueta ngamwa atjihe tji ma vanga okuyandja. Kombunguhiro aihe peke yovikurya u sokueta omaze womiṋinga ozorita ndatu. 6 Meyuva romukandi wOmatendameno wOmueze eye ma sokupunguha ondwiyona yongombe, nozondjona hamboumwe, nondwezu yonḓu, azehe nde hi novipo. 7 Puna ondwiyona aihe peke, nondwezu yonḓu aihe peke eye u sokueta ovikokotwa vyozorita omurongo na hambombari nohinga, nu puna ondjona aihe peke eye u sokueta atjihe ohivirikwa tji mai vanga okuyandja. Ozorita ndatu zomaze womiṋinga maze sokupunguhwa puna ombunguhiro ndji yovikokotwa. 8 Ohivirikwa i sokuza mo metuwo ndi enene roruhito nai pitire momuvero tjingewo mbwi oyo mu ya hitire.

9 “Ovandu tji mave ya okurikotamena ku Muhona mEyuva ngamwa arihe enene, imba mbu mave hitire momuvero wokeyuva kokunene mave pitire momuvero wokeyuva kokumuho, tji va zu nokurikotamena ku Muhona; nu imba mbu mave hitire momuvero wokeyuva kokumuho mave pitire mu imbwi wokeyuva kokunene. Kape nomundu ngu ma pitire momuvero tjingewo mbwi ma hitire, nungwari u sokupitira momuvero mbwa hungamasana na imbwi ma hitire. 10 Ohivirikwa ngai hite ovandu tji mave hiti, nu wina ngai yende ovandu tji mave i. 11 Meyuva romukandi ombunguhiro yovikurya ngai rire omaze womiṋinga wozorita omurongo na hambombari nohinga puna ondwezu yongombe noyonḓu; nomundu ngu me rikotamene ku Muhona ma yandja ngamwa atjihe tji ma vanga puna ondjona aihe peke. Ozorita ndatu zomaze womiṋinga maze punguhwa puna ombunguhiro aihe yovikurya ndji.

12 “Omunane ohivirikwa tji ma vanga okupunguhira Muhona ombunguhiro yombango ye omuini, nga punguhe ombunguhiro oningiririsiwa poo yokutja okuhepa, nomuvero wokomuhuka wokuhita morupanda rwomoukoto mau patururirwa ye. Eye ma punguha ombunguhiro ndji momuhingo tjingewo otja tje tjita mesabata, nomuvero mau patwa eye tja zu nokupita.”

Ombunguhiro yeyuva arihe

13 Muhona ma tja nai: “Omuhuka auhe ondjona yombura imwe ndji hi notjipo i sokupunguhirwa Muhona i rire ombunguhiro oningiririsiwa. Ombunguhiro ndji mai punguhwa eyuva arihe. 14 Wina ombunguhiro yoruhere orunḓunḓura rwozokirograma mbari mai punguhwa omuhuka auhe puna orita imwe yomaze womiṋinga ngu maye rungwa noruhere ndwi. Omazikamisiro wombunguhiro ndji ku Muhona maye rire omakarerere. 15 Ondjona noruhere orunḓunḓura nomaze womiṋinga mavi punguhirwa Muhona omuhuka auhe nga aruhe.”

Omunane ohivirikwa nehi

16 Muhona Ndjambi ma rakiza nai: “Omunane ohivirikwa tji ma yandja ehi, ndi ri ouini we omuini komuzandu we umwe otja otjiyandjewa, noro mari rire oromuzandu ngwi otja orukondwa rwouini weṱunḓu re. 17 Nungwari omunane ohivirikwa tji ma yandja ehi re ngamwa komukarere we umwe, noro mari rire ouini wohivirikwa rukwao, indu Ombura yOmayaruriro wokoupe nonguturiro tji ye ya. Oro ore omuini, neye erike novazandu ve porwe ombu mave sora okukara na ro nga aruhe. 18 Omunane ohivirikwa ke nokusokuyeka otjiwaṋa ouini watjo. Ehi arihe ngamwa ndi ma yandja kovandu ve mari sokuza mehi ndi ndi ri ouini we, kokutja a ha ṋiṋikiza otjiwaṋa tjandje atjihe mokutjiyeka ehi ratjo.”

Omatuwo womaterekero wondjuwo ya Muhona

19 Tjazumba omurumendu we ndji twara komahitiro womatuwo nga tarere komukuma wokokunene kweyuva, popezu nomuvero wokomukuma wokeyuva kokumuho kworumbo rwomoukoto. Inga onge ri omatuwo omayapuke wovapristeri. Eye we ndji urikira poṋa pu pa ri komaandero komukuma wokongurova, 20 na tja: “Imbo opu pe ri poṋa ovapristeri pu mave terekere onyama, ndji mai punguhwa i rire ombunguhiro yokuisapo ourunde poo yokusuta ondjo, na wina pu mave punguhire ombunguhiro yoruhere orunḓunḓura kutja ape ha ningi otjiṋa otjiyapuke tji matji pitisiwa korupanda rwopendje, ku matji yenene okukatjita otjipo kotjiwaṋa.”

21-22 Tjazumba arire tje ndji twara korupanda rwopendje, e kendjiraisira kutja movikoro vyarwo avihe vine mu noutupanda, akehe peke ku ke noure wozometa omirongo vivari, nouparanga wozometa omurongo nandano. 23 Okarupanda akehe ka ri nokarumbo komawe, nu ka ri nomazuko, nga tungirwe kehi keṋe yokarumbo. 24 Omurumendu we ndji raera a tja: “Inga onge ri omatuwo womaterekero ovakarere vondjuwo ya Muhona mu ve terekera oviyandjewa vyozombunguhiro zovinamuinyo, mbi etwa i otjiwaṋa.”