Esekiel 42 - Herero Revision Bible (HRR)

Ozondjuwo mbari nḓa ri popezu nondjuwo ya Muhona

1 Tjazumba omurumendu arire tje ndji hitisa morupanda rwopendje, ne ndji hongorere kondjuwo ndja ri komukuma wokokunene kweyuva kwondjuwo ya Muhona, nu ndji ha ri kokure na indji ndja ri kotjikoro tjomukuma wokongurova kwondjuwo ya Muhona. 2 Ondjuwo ndji ya ri noure wozometa omirongo vitano, nouparanga wozometa omirongo vivari nandano. 3 Komunda umwe oyo ya tarere koruveze rwouparanga wozometa omurongo ndwa ri meṋe yondjuwo ya Muhona, nu komunda imbwi omukwao oyo ya tarere korupare rworupanda rwopendje. Oyo ya tungirwe motuteto tutatu okutendekasana, noruteto aruhe peke rwa hivire indwi rwokehi yarwo okuyaruka moukoto. 4 Meṋe yomukuma mbwi wokeyuva kokunene kwondjuwo ndji pa ri oruhito ndwa ri nouparanga wozometa ndano, noure wozometa omirongo vitano, wina pa ri omahitiro komukuma mbwi.

5 Omatuwo inga wokombanda wondjuwo ya ri omamango pu inga wopokati na inga wokehi, oyo tjinga aya tungirwe okuhiva omakwao okuyaruka moukoto. 6 Omatuwo motuteto atuyetatu ya ri kombanda yotupare, nu kaya ṱizirwe i ozongunḓe tjimuna inga wozondjuwo ozongwao morupanda. 7-8 Poruteto indwi rwokehi ekuma ropendje rondjuwo ra ri noure wozometa omirongo vivari nandano, owo wa ri ohinga youre wayo; nu mozometa nḓa omirongo vivari nandano, nḓa sewa po, mwa ri omatuwo. Moruteto indwi rwokombanda mwa ri omatuwo moure auhe wondjuwo. 9-10 Kehi yomatuwo yevari nga, komaandero komukuma wokomuhuka kwondjuwo, indi ekuma pu ra utira, pa ri omahitiro womorupanda rwopendje.

Komukuma wokeyuva kokumuho kwondjuwo ya Muhona kwa ri ondjuwo, ndja sanene ku indji nu ndji ha ri kokure nondjuwo ndji, ndja ri komukuma wokongurova kwondjuwo ya Muhona. 11 Momurungu womatuwo nga mwa ri oruhito tjimuna indwi rwokomukuma wokokunene kweyuva. Orwo rwa ri nomasanekero nombunikiro nomahitiro, nga sana ku inga woruhito indwi rwokokunene kweyuva. 12 Pa ri omuvero kehi yomatuwo komukuma wokokumuho kweyuva kwondjuwo, pomaandero wokomukuma wokomuhuka, pu pa utira ekuma.

13 Omurumendu wa tja nai ku ami: “Ozondjuwo azeyembari nḓa ozo ozondjapuke. Mu zo ovapristeri mbe ya komurungu wa Muhona okumukarera omu ve rira oviyandjewa vyozombunguhiro ozondjapukeyapuke. Omatuwo nga tjinga aye ri omayapuke, ovapristeri otjinga ave pwikira mo oviyandjewa vyozombunguhiro ozondjapukeyapuke nḓa, okutja ozombunguhiro zovikurya nozomauvi nozozondjo. 14 Ovapristeri tji va zu nokukarera Muhona mondjuwo ye nave vanga okuyenda korupanda rwopendje, ve sokuhukura ozombanda ozondjapuke nḓu va zarere ngunda amave karere Muhona nave ze esa momatuwo nga, nowo ve sokuzara ozombanda zarwe ngunda ave hiya ya koṋa ku kwa woronganene ovandu.”

Omasanekero wehi ku kwa tungwa ondjuwo ya Muhona

15 Omurumendu tja zire nokumana okusaneka ehi rondjuwo ya Muhona moukoto, arire tje ndji pitisire momuvero wokomuhuka, tjazumba a saneke omikuma avihe vyopendje vyehi. 16 Eye wa kambura okati okasaneke na saneke komukuma wokomuhuka, nowo wa ri noure wozometa omasere yevari nomirongo vitano. 17-19 Tjazumba wa saneka komukuma imbwi wokokunene kweyuva na imbwi wokokumuho kweyuva na imbwi wokongurova; komukuma auhe peke wa ri noure umwe wozometa omasere yevari nomirongo vitano, 20 kokutja orumbo ru kare nomikuma vine mbi ṱeki pamwe, auhe mbu noure wozometa omasere yevari nomirongo vitano. Orumbo ondwa ri oruhaṋe rworuveze oruyapuke ku indwi ndu ha ri oruyapuke.