Esekiel 38 - Herero Revision Bible (HRR)

Gog ma rwisa Ovaisrael

1 Muhona wa hungira ku ami 2 a tja: “Muatje womundu, vera Gog, omunane otjiuru wotjiwaṋa tja Mesek notja Tubal mehi ra Magog. Uka ye 3 nu u mu raere kutja ami, ngu mbi ri Muhona Ndjambi, owami omunavita na ye. 4 Ami me mu ngundiparisa, e mu hweke ozombate mozondjeo nu e mu nanene kwarwe pamwe notjimbumba tje tjovita. Otjimbumba tje tjovita noukambe we novakavire mbe ripangaṋa novirwise owo ovengi tjinene, novarwe ve wovita avehe ve tjinda otuvao nu ve nomangaruvyo. 5 Ovarumendu va Persie nova Sudan nOvalibie ve ri puna ye, navehe ve notuvao nomakori wovita. 6 Ovarwe wovita avehe vehi ra Gomer nora Bet-Togarma, komukuma wokokunene kweyuva, ve ri puna ye, novarumendu voviwaṋa vyarwe ovingi wina. 7 Raera Gog kutja nge rirongere nu a rakize otjimbumba tje tjovita atjihe kutja tji rirongere wina. 8 Kombunda yozombura ozengi ami me mu rakiza kutja a rwise ehi mu mu novandu, mba kotorwa okuza koviwaṋa ovingi nu mba tura mo nokuhinokutira ovita. Eye ma rwisa ozondundu za Israel, nḓa kara ongaango nu nḓa isiwa tjo oruveze orure, nungwari nambano mu mwa tura ovandu avehe nokuhinooma. 9 Eye notjimbumba tje tjovita noviwaṋa ovingi, mbi ri puna ye, mave rwisa ehi komuhingo wotjivepo nave ri vandeke otja otjikamba.”

10 Muhona Ndjambi ma tja nai ku Gog: “Eyuva ndo tji re ya, ove mo utu okuripura ondunge yomatjendje. 11 Ove mo tye okurwisa ehi, ndi hi nokuriyeura, ovandu mu va tura mohange nokuhinooma, movirongo, mbi hi notumbo nu mbi hi nomivero novipate. 12 Ove mo pundu nokuyeka ovandu oviṋa; ovandu mba va tura movihuro mbya ri ovitambatundu rukuru. Owo va wongwa moviwaṋa, nu nambano ve novinamuinyo nouini, nu va tura pomahakaeneno wozondjira zouye. 13 Ovandu va Seba na Dedan novarandise, mba zire kovirongo vya Spanie, mave ku pura nai: ‘Ove wa woronganisa otjimbumba tjoye tjovita nu wa rwisa ovandu kokutja u ve yeke nokuvepunda oviṋa are? Mo vanga okukambura osilveri nongoldo nozongombe nouini nokutwara ovipundwa avihe mbi are?’ ”

14 Muhona Ndjambi otje ndji hinda mbi karaere Gog kutja eye ma tja nai ku ye: “Nambano otjiwaṋa tjandje Israel ngunda atji tura nokuhinooma, ove mo womboroka 15 momaturiro woye kokure komukuma wokeyuva kokunene, nu mo hongorere otjimbumba otjinene otjinamasa tjovarwe wovita voviwaṋa ovingi, avehe mba kavire koukambe. 16 Ove mo rwisa otjiwaṋa tjandje Israel tjimuna otjivepo tji matji hingi okutapakaṋa ehi. Omayuva nga tji ye ya, ami me hindi ove, Gog, u karwise ehi kutja u raisire oviwaṋa kutja owami uṋe, u vi raisire ouyapuke wandje mu imbi mbi me tjiti move. 17 Oove ngu u ri ingwi ngu mba hungirire rukuru, indu tji mba tjivisire novinyo vyovakarere vandje, imba ovaprofete va Israel, kutja momayuva ngu maye ya ami me ku eta u rwise Israel.” Muhona Ndjambi ongwa hungire nai.

Ndjambi ma vere Gog

18 Muhona Ndjambi ma tja nai: “Meyuva Gog mu ma rwisa Israel ami me pindike tjinene. 19 Ami me tjivisa meruru na momazenge wandje omanene kutja meyuva ndo mamu kara omungunda wehi omunene mehi ra Israel. 20 Ozohi nozonḓera azehe, novipuka avihe ovinene noviṱiṱi, novandu avehe mbe ri kombanda yehi mave zezera amave tira ami. Ozondundu maze pamuka, nomatjo maye wire pehi, notumbo atuhe matu musukire. 21 Ami me tirisa Gog noviwonga ngamwa avihe. Ami, ngu mbi ri Muhona Ndjambi, owami ngu mba hungire. Ovarwe ve wovita mave rwisasana nomangaruvyo. 22 Ami me mu vere nomutjise omuzeu nomatirahiro wombinḓu. Me rokisire ombura onamasa nozombawe zombura nomuriro nozosurungu kombanda ye na kotjimbumba tje tjovita na koviwaṋa ovingi mbye rikuta kuna ye. 23 Komuhingo mbwi ami otji me raisire oviwaṋa avihe kutja owami omunene, nokutja owami omuyapuke. Otji mavi tjiwa kutja owami ngu mbi ri Muhona.”