Esekiel 33 - Herero Revision Bible (HRR)

Ndjambi ma ziki Esekiel a rire omutjevere

1 Muhona wa hungira ku ami 2 a tja: “Muatje womundu, tjivisa otjiwaṋa tjeṋu kutja mape tjitwa tjike ami tji me eta ovita kehi rorive. Otjiwaṋa tjehi ndo matji toorora umwe watjo okurira omutjevere. 3 Eye tji ma munu omunavita a meya okurwisa ehi, u posisa ohiva okutirisa ovandu avehe. 4 Tji pena ngu me i zuu na ha kara ko na tja, nomunavita tje ya nu e mu zepa, neye omuini ma kara nomerizirira konḓiro ye. 5 Eye omuini ma tura ondjo konḓiro ye, tjinga e ha karerere ko na tja nomaronga womutjevere. Eye andakuzu wa ningire ko na tja, andakuzu wa taura. 6 Nungwari omutjevere tji ma munu omunavita a meya okurwisa ehi na ha posisa ohiva, nomunavita tje ya a zepa ovanauvi mbo, ami me yandja ondjo yonḓiro yawo komutjevere ngwi.

7 “Nambano, muatje womundu, ami me ku ziki u rire omutjevere wotjiwaṋa tja Israel. Mo sokuyandja ku wo inga omaronga ngu me ku pe. 8 Ami tji mba tjivisa kutja omunauvi ma koka, nungwari ove tji u hi nokumuronga kutja a rundurure ongarero ye, kokutja a yame omuinyo we, neye ma koka e ri omunauvi, nami me yandja ondjo yonḓiro ye kove. 9 Ove tji wa rongo omundu, neye, tjiri, a ha isa okutjita ouvi, neye ma koka e ri omunauvi, nungwari omuinyo woye mau yamwa.”

Omerizirira womundu omuini kourike

10 Muhona wa hungira ku ami a tja: “Muatje womundu, hungira kOvaisrael omambo ngu ve kara pokuhungira nga: ‘Ourunde nozongatukiro zetu nḓu twa tjita ze ri kombanda yetu, nu mena roviṋa mbi otji matu sepunuka kouṱiṱiṱiṱi. Matu sora vi okukara nomuinyo?’ 11 Ve raera kutja ami, ngu mbi ri Muhona Ndjambi, tjiri, otja ngu mbi ri Ndjambi omunamuinyo, hi kara nonyuṋe tji me munu omurunde ama ṱu. Ami etje vanga okumumuna a poka kouvi kutja a kare nomuinyo. Israel, isa ouvi mbu u tjita! Okutjavi tji u vanga okuṱa?

12 “Nambano, muatje womundu, raera Ovaisrael kutja omusemba tji ma tjiti ouvi, imbwi ouwa mbwa tjita kamaau mu yama. Omunauvi tja isa okutjita ouvi, ke nokuverwa, nomusemba tji ma utu okutjita ourunde, omuinyo we kau nokuyamwa, nangarire kutja rukuru aa tjiti ouwa. 13 Porumwe me kwizikire omusemba kutja ma kara nomuinyo, nungwari tja utu okuripura kutja ouwa we warukuru wa yenena opuwo, na utu okutjita ouvi, ami hi nokuzemburuka ko ouwa auhe mbwa tjita. Eye ma ṱire omauvi we. 14 Porumwe ami me rongo omundu omunauvi kutja ma ṱu, nungwari eye tja isa ourunde we na tjiti ousemba nouwa, 15 ngatu tje eye tja yarura ihi tja vaka, eye tja isa okutjita ourunde na kongorere omatwako nge yandja omuinyo, neye ke nakuṱa, nungwari, tjiri, ma kara nomuinyo. 16 Ami me mu isire ourunde mbwa tjita, neye ma kara nomuinyo, tjinga a tjita ousemba nouwa.

17 “Notjiwaṋa tjeṋu tji tja imbi ami mbi mbi tjita ovihasemba! Kako, ozondjito zatjo onḓe he ri ozosemba. 18 Omusemba tja isa okutjita ouwa na utu okutjita ouvi, neye ma ṱire ouvi mbwi. 19 Omundu omunauvi tja isa ouvi na tjiti ouwa nousemba, neye ma yama omuinyo we. 20 Israel, ove u tja imbi ami, Muhona, mbi mbi tjita, ovihasemba; nungwari ami me ku pangurire imbi mbi mo tjiti.”

Ombuze yomawiro wa Jerusalem

21 Meyuva oritjatano komueze outjamurongo wombura oitjamurongo na mbari youhuura wetu, pa hena omurumendu kOjerusalem; neye weya okundjiraera kutja otjihuro tja haverwa. 22 Nungwari ongurova ndjo eye ngunda e hiye ya, ami mba mwine kutja Muhona u ri puna ami momasa we omanene. Omurumendu tje ya omuhuka weyuva rarwe, Muhona we ndji pa rukwao omurya okuhungira.

Omauvi wotjiwaṋa

23 Muhona wa hungira ku ami 24 a tja: “Muatje womundu, ovandu mba tura movihuro omatundu vyehi ra Israel mave tja nai: ‘Abraham wa ri omurumendu umwe uriri, nu wa perwe ehi arihe. Nungwari eṱe oweṱe ovengi, nambano ehi oretu.’

25 “Ve raera kutja ami, ngu mbi ri Muhona Ndjambi, me tja nai: ‘Eṋe mu rya onyama ngunda ai nombinḓu. Mu rikotamena koomukuru vovisenginina. Mu zepa ovandu. Mamu ripurire tjike kutja ehi oreṋu? 26 Mu riyameka komangaruvyo weṋu. Ozondjito zeṋu ozondjaukise. Amuhe mu katuka otukupo. Mamu ripurire tjike kutja ehi oreṋu?’

27 “Ve raera nai: ‘Ami, ngu mbi ri Muhona Ndjambi, meve rongo kutja otja ngu mbi ri Ndjambi omunamuinyo, ovandu, mba tura movihuro mbya nyonwa mave ṱu. Imba mba tura mouhaiya wokuti mave sasaurwa i ovipuka vyokuti. Imba mba ṱara moviṱunga na mozondimba mave ṱu i omutjise omuzeu. 28 Ami ehi me ri ririsa ongaango, nomasa wawo nguyave rihivire tjinene nai maye yanda. Wina ozondundu za Israel maze rire ongaango tjinene nai nga tji pe hi nomundu ngu ma sora okuzetuurunga. 29 Ami tji mba verere otjiwaṋa ozondjito zatjo azehe ozondjaukise, nu otjo otji matji tjiwa kutja owami ngu mbi ri Muhona.’ ”

Oviṋa, mbi mavi kakara po kombunda yombuze yomuprofete

30 Muhona wa hungira a tja: “Muatje womundu, ovandu votjiwaṋa tjoye ve ku hungira, tji mave hakaenene porumbo rwotjihuro poo pomahitiro wozondjuwo zawo. Owo verihungirire oveni ave tja: ‘Ngatu yende tu kazuve kutja embo riṋe nda zu ku Muhona nambano.’ 31 Otjiwaṋa tjandje otji tji worongana okuzuva imbi mbi me hungire, nungwari katji tjiti imbi mbi u tji raera. Otjo tji vara omambo woye otja omaimburiro wakauriri, notji tji panḓera pokukongorera ozondjira zatjo zeraru. 32 Ku tjo oove otjiṋa uriri, okutja omuyorokise ngu imbura omaimburiro worusuvero amo nyanda otjiharpe. Otjo tji puratena komambo woye aehe, nu katji kara nonḓuviro kembo nangarire rimwe roye. 33 Nungwari omambo woye aehe tji ya rire ouatjiri, nowo, tjiri, maye rire ouatjiri, notji matji tjiwa kutja omuprofete wa ri mokati katjo.”