Esekiel 31 - Herero Revision Bible (HRR)

Engipte mari sasanekwa norupapa

1 Meyuva etenga komueze outjatatu wombura oitjamurongo na imwe youhuura wetu, Muhona wa hungira ku ami 2 a tja: “Muatje womundu, raera nai kombara ya Engipte na kovandu vayo avehe:

Oove omunamasa, tjiri!

Ounene woye me u sasaneke pu tjike?

3 Ove u ri otja orupapa mOlibanon

ndu nozondavi ozombwa zomuzire,

omuti omure tjinene nai

nga tji mau vaza kovikamba.

4 Imbo pa ri omeva okuuhapisa

nozonḓonḓu zokehi yehi okuuparura.

Ozo ze tjatja poṋa pu pa hapa omuti mbwi,

nu ze twara omipupo komiti avihe vyokuti.

5 Orupapa ndwi tjinga arwa tjatjwa nawa

otjinga arwa hapa okurira

orure pomiti omikwao.

Ozondavi zarwo za rira ozondindi nozonde.

6 Ozonḓera zomihoko avihe aaze

tungu oviruwo mozondavi zarwo;

ovipuka vyokuti aavi kwatere

ounatje wavyo momuzire warwo;

oviwaṋa vyouye aavi suva momuzire warwo.

7 Omuti mbwi wa ri omuwa tjinene,

omure tjinene nu wa ri nozondavi ozonde.

Omize vyawo vya vaza komipupo vyokehikehi.

8 Kapa ri norupapa orukwao motjikunino

tja Ndjambi ndwa sasanekwa na rwo;

nu kapa ri nomuzema mbwa ri nozondavi

nḓa sana kozondavi zarwo;

nu kapa ri nomuṱati mbwe ru vaza.

Kapa ri nomuti motjikunino tja

Ndjambi omuini mbwa ri

omuwa tjinene nai.

9 Ami mbe ru ungura oruwa orumanise,

ndwa ri nozondavi nḓa tandavara.

Orwo iyaru ṱirwa eruru i omiti avihe mOeden,

ihi otjikunino tja Ndjambi.

10 “Nambano ami, ngu mbi ri Muhona Ndjambi, me ku raere imbi mbi mavi tjitwa komuti mbo mbwa hapa nga tji wa kavaza kovikamba. Tji wa rira omure tjinene we ritongamisa; 11 Ami otji mbe u nakaura nu e u yandja mouvara womunane umwe womihoko vyozonganda. Eye me u pe imbi mbya pwa ku wo mena rourunde wawo. 12 Ovandu wozonganda voviwaṋa ovindandi tjinene mave u kondo ave u wisa. Ozondavi zawo maze wire mozondundu na momikutu avihe, nomaso wawo maye tekere motupoko. Omihoko avihe mbyaa vi suva momuzire wawo mavi i, avi isa omuti mbwi. 13 Ozonḓera azehe maze ya nu aze wirire komuti mbwa wa, novipuka vyokuti mavi yata kozondavi zawo. 14 Nu okuza ku nai kape nomuti warwe nangarire kutja u tjatjwa nawa mbu mau hapa okurira omure otja imbwi rukwao poo mbu mau vasisa ondomba yawo kovikamba. Omiti avihe vya kekerwa onḓiro tjimuna omuatje womundu, vya kekerwa kutja vi kawane na imba mba punda motjovakoke.”

15 Muhona Ndjambi ma tja nai: “Meyuva omuti mbwi tji mau wire motjovakoke, ami me u vandeke nomeva wokehi yehi otja otjiraisiro tjoruhoze. Ami me tjaere ozonḓonḓu nu me pwirisa omipupo. Omuti tjinga awa koka, ami otjinga ame eta onḓorera kozondundu za Libanon, nu me kukutisa omiti avihe vyokuti. 16 Nami tji mbe u wisire motjovakoke, omungunda womawiro wawo mau zezerisa oviwaṋa. Omiti avihe vya Eden nomiti avihe omitoororwa vya Libanon mbya tjatjwa nawa nu mbya wira motjovakoke, mavi yorokere omawiro womuti mbo. 17 Ovyo wina mavi u puna wo motjovakoke okukawana na imbi mbya wire rukuru. Nu avehe mbaa ve tura momuzire wawo mave rimbwa mokati koviwaṋa.

18 “Omuti mbwi wa sasanekwa nombara ya Engipte novandu vayo avehe. Kapa ri nomuti nangarire mOeden mbwa ri omure nai nomuhimise. Nungwari nambano, otja omiti vya Eden, ove, mbara ya Engipte, mo pundu motjovakoke, nu mo kawana na imba ovehina Ndjambi na imba mba ṱa movita wina. Ami owami ngu mba hungire.” Muhona Ndjambi ma tja nao.