1 Ndjambi wa tja nai: “Muatje womundu, ryaa embo emangwa ndi; tjazumba u kahungire kOvaisrael!”
2 Ami otji mba paturura otjinyo tjandje, neye we ndji pa embo emangwa ndi okurya. 3 Eye wa tja nai: “Muatje womundu, ryaa embo emangwa ndi ndi me ku pe; kutisa na ro ezumo roye.” Ami mbe ri rya, noro aa ri tjata omuzeze tjimuna ouitji wozonyutji.
4 Tjazumba Ndjambi wa tja nai ku ami: “Muatje womundu, twende kOvaisrael u keveraere imbi mbi mba heya. 5 Ami hi nakukutuma kotjiwaṋa tji tji hungira eraka ezeu rozonganda, nungwari okOvaisrael. 6 Ami andakuzu mbe ku tuma koviwaṋa ovinene, mbi hungira omaraka omazeu wozonganda, itjavi puratene kove. 7 Nungwari kape na umwe wOvaisrael ngu ma vanga okuzuva kove; owo kave vanga okupuratena nangarire ku ami. Owo avehe ovirangaranga noveritongamise. 8 Nambano, tara, ami me ku tjiti kutja u rire otjirangaranga nomukukutu otja owo tjinga averi. 9 Ami me ku tjiti omuzikame otja oruuwa, omukukutu otja ondiamanda. O tira ovapirukire mbo.”
10 Ndjambi wa hungira komurungu na tja: “Muatje womundu, puratena nawa nu u zemburuke omambo aehe ngu me ku raere. 11 Tjazumba u yende kovandu vehi roye mbe ri mouhuura, u keveraere omambo ami, ngu mbi ri Muhona Ndjambi, ngu me hungire ku wo kutja mave puratene kove poo indee.”
12 Ombepo ya Ndjambi ye ndji yera kombanda, nu kongotwe yandje ami mba zuva omungunda omunene weraka nda tja nai: “Tangeye ounene wa Muhona kombanda meyuru!” 13 Ami mba zuva ovivava vyovinamuinyo amavi pakapaka, nomaporokotero omanene woviryo tjimuna owomungunda wehi. 14 Ombepo ya Muhona ye ndji yera kombanda nai ndji twara, nami mba pindika ne ṱomazenge, nu Muhona weya ku ami nomasa omanene. 15 Otji mbe ya kOtel-Abib meṋe yonḓonḓu Kebar ku kwa turire ovahuurwa, nu mba kara mbo oure womayuva hambombari amba kumisiwa i imbi mbi mba muna na mbi mba zuva.
Muhona ma ziki Esekiel okurira omutjevere
(Esek 33:1-9)16 Omayuva nga hambombari tji ya kapita, Muhona wa hungira ku ami a tja: 17 “Muatje womundu, ami me ku ziki okurira omutjevere wotjiwaṋa tja Israel. Aruhe tji wa zuu embo mu ami, mo sokukeveronga mena randje. 18 Ami tji mba tjivisa kutja omundu omurunde ma ṱu, nove o he kemuronga kutja ma rundurure ongaro ye ombi okuyama omuinyo we, neye ma ṱire ouvi we, nungwari ove mo kara nomerizirira konḓiro ye. 19 Ove tji wa rongo omunauvi, neye a ha isa ouvi, eye ma ṱire ouvi we, nungwari ove tjandje wa yama omuinyo woye.
20 “Omundu omusemba, tjiri, tja isa ousemba na utu okutjita ouvi, nu ami e mu twa motjiwonga, eye ma ṱu, ove tjinga au he mu rongere. Ma ṱire omauvi we. Ami hi nakuzemburuka ozondjito ze ozombwa, nungwari ove mo kara nomerizirira konḓiro ye. 21 Nungwari ove tji wa rongo omundu omusemba, neye a zuu kove na ha tjiti ouvi, eye ma kara nomuinyo, nove wina mo yama omuinyo woye.”
Esekiel ke nokusora okuhungira
22 Ami mbe rimuna kutja omasa wa Muhona ye ri mu ami, nu mbe mu zuva ama tja nai ku ami: “Sekama u yende kotjana. Ami me kahungira na ove koṋa ngo.”
23 Ami otji mba ya kotjana, nu ingo e kamuna ko ongeṋangeṋeno ya Muhona otja tji mbe i munine meṋe yonḓonḓu Kebar. Nami mba wa onḓurumika, 24 nungwari omasa wOmbepo ya Ndjambi ya hita mu ami naye ndji kuramisa kozombaze. Muhona wa tja nai ku ami: “Yaruka konganda nu u keripatere mondjuwo. 25 Ove mo pandekwa nozongoze, muatje womundu kutja o ha sora okuryanga mokati kovandu. 26 Ami me remanisa eraka roye, noro mari seti kutja o ha sora okuronga ovandu ovapirukire mba. 27 Okuzambo tji mba hungire kove rukwao ne ku pe eraka okuhungira, nove mo ve raere imbi ami, ngu mbi ri Muhona Ndjambi, mbi me hungire. Tjiva vawo mave puratene, nungwari tjiva mave ku rangaranga, orondu owo omuhoko omupirukire.”
© Herero Revision Bible © Bible Society in Namibia, 2021.
