Esekiel 28 - Herero Revision Bible (HRR)

Omaukiro kombara ya Tirus

1 Muhona wa hungira ku ami 2 a tja: “Muatje womundu, raera omunane wotjihuro Tirus kutja ami, ngu mbi ri Muhona Ndjambi, me tja nai ku ye: ‘Momeritongamisiro womutima woye ove we rihiva kutja oove omukuru. Ove wa tja u haama kotjihavero tjouhona otja omukuru, awa koverwa i okuvare. U ritjinda aayo oove omukuru, nungwari, tjiri, oove omundu uriri nu kaove omukuru. 3 Tjiri, u tjangovasi oove onongo pu Daniel, nokutja kape noviundikwa mbya horekwa kove. 4 Ounongo nozondunge zoye vye ku tumbisa novihuze vyongoldo novyosilveri. 5 Ove wa ungura oviungura vyomarandisiro nozondunge, notji wa kara pokumuna ovihohe. Ove, tjiri, u rihivira outumbe woye!’

6 “Nambano, ami, ngu mbi ri Muhona Ndjambi, me tja nai: ‘Ove tjinga au tjangovasi oove onongo otja omukuru, 7 otjinga ame ku etere ovanavita ovindandi okukurwisa. Owo mave nyono oviṋa vyoye oviwa ovimanise, mbi wa muna mozondunge zoye na mounongo woye. 8 Mave ku yumbu morutjiva, nove mo ṱu onḓiro ombi mourekoto wokuvare. 9 Tji mave ya okukuzepa, ove hapo nai ingee mo yenene okutja oove omukuru are? Tji wa hakaene novekuzepe tjandje ove oove omundu uriri nu kaove omukuru. 10 Mo ṱu otja ombwa i ovandu wozonganda.’ ” Ami, ngu mbi ri Muhona Ndjambi, owami ngu mba hungire.

Omawiro wombara ya Tirus

11 Muhona wa hungira ku ami rukwao 12 a tja: “Muatje womundu, tjitira ombara ya Tirus omutambo mena roumba mbu mau i yendere. Raera ombara ndji kutja ami, ngu mbi ri Muhona Ndjambi, me tja nai: ‘Rukuru ove wa ri otjihorera tjokuyenenisa avihe. Ove, tjiri, wa ri nounongo ouingi nu wa ri omuwa omumanise! 13 Ove wa turire mOeden, ihi otjikunino tja Ndjambi, nu we riharekere nomawe omahuze pekepeke, okutja omawe omaserandu pyu nondiamanta notopas nojaspis nokrisolit nooniks nosardoniks nosafir nokarbonkel nosmarag. Wa ri noviharekwa vyongoldo. Oviṋa avihe mbi vya ungurirwa ove meyuva ndi wa memwa. 14 Ami mba zika po omuengeri a kare puna ove kutja e ku tjevere. Ove wa turire kondundu yandje ondjapuke, nu wa ryangere mokati komawe omakeṋakeṋe. 15 Omeritjindiro woye ya ri omawa tjinene okuza keyuva, ndi wa memwa ngandu ndi tji wa uta okutjita ouvi. 16 Ove iyo ungura tjinene amo randa nokurandisa, notjiṋa hi tje ku pa outwe nourunde. Ami otji mbe ku nakaura kondundu yandje ondjapuke, nomuengeri nguye ku tjevere we ku ramba kutja u ze mo mokati komawe omakeṋakeṋe. 17 Ove iyo rihivire ouwa woye oumanise, nondangu yoye ye ku yovaparisa. Mena roviṋa mbi ami mbe ku vanda pehi ne ku esa kutja u rire otjiraisiro tjomaronga kozombara zarwe. 18 Ove wa tjitira ouvi ounene nai mokuranda nokurandisa oviṋa, nga poṋa poye apehe pomerikotameneno tji pa yamburuka. Ami otji mba hwika otjihuro nga tji tja ningirire. Nambano avehe mbu mave tara kove mave ku munu awa rire omutwe. 19 Ove wa zenga, wa zenga nga aruhe, nomihoko mbye ku tjivirwe mavi kumwa nu mavi tira kutja mavi munu oumba otja imbwi owoye.’ ”

Omaukiro kOsidon

20 Muhona wa tja nai ku ami: 21 “Muatje womundu, senga otjihuro kOsidon nu u tji uke. 22 Raera ovature vatjo kutja ami, ngu mbi ri Muhona Ndjambi, me tja nai ku wo: ‘KOsidon, ami owami omunavita na ove; ovandu mave ndji hivire imbi mbi me tjiti kove. Owo mave tjiwa kutja owami ngu mbi ri Muhona, tji mba vere imba mba tura move, nowo tji va munu ouyapuke wandje. 23 Ami me hindi omutjise omuzeu nu me tjiti kutja ombinḓu i pupe momivanda vyoye. Ove mo rwisirwa kominda avihe, novature voye mave ṱu. Notji mo tjiwa kutja owami ngu mbi ri Muhona.’ ”

Israel matji serwa ondaya

24 Muhona wa tja nai: “Kape notjiwaṋa nangarire tjimwe tji tja kondoroka Israel nu tji tja nyekerera Israel, tji matji kasana rukwao komakuiya nozohongwe okuhihamisa Israel. Novyo mavi tjiwa kutja owami ngu mbi ri Muhona Ndjambi.”

25 Muhona Ndjambi ma tja nai: “Ami me kotora otjiwaṋa tja Israel okuketjiisa mo mokati koviwaṋa mu mbe tji rimba, noviwaṋa avihe otji mavi tjiwa kutja owami ngu mbi ri Omuyapuke. Otjiwaṋa tja Israel matji tura mehi ratjo otjini, ehi ndi mba yandjere komukarere wandje Jakob. 26 Owo mave tura mehi ndi mohange. Mave tungu ozondjuwo nu ave kunu ovikunino vyomivite. Ami me vere oviwaṋa ovararanganda na wo mbu mave ve nyekererere, nu Israel atji tura mouyara. Notjo otji matji tjiwa kutja owami ngu mbi ri Muhona Ndjambi watjo.”