Eimburiro romutambo komawiro wa Tirus
1 Muhona wa hungira ku ami a tja: 2 “Muatje womundu, imburira Tirus eimburiro romutambo, 3 ihi otjihuro tji tji ri pomukuro wokuvare, nu tji tji ri otjomarandasaneno wovandu, mba tura momakoverwa omengi, nu itja Muhona Ndjambi ma tja nai ku tjo: Tirus, ove u rihivira ouwa woye oumanise.
4 Omaturiro woye ye ri mokuvare;
ovatunge voye ve ku ungura okusana
kondjuwoyomomeva ombwa omanise.
5 Owo ve ku ungura pomiti omitunge vyomizema,
mbya hapa kondundu Hermon;
nu wina va ungura ongunḓe ndji ṱiza omarapi
wondjuwoyomomeva,
potupapa tu twa hapa kondundu Libanon.
6 Owo ve ku ungurira oviti ovihinge
vyondjuwoyomomeva pomimborombonga
vyehi ra Basan,
na wina orupare rwondjuwoyomomeva
pomiparara vyehi ra Siprus,
nu ave i hareke nomayo wozondjou.
7 Omarapi woye ya ungurwa porupera
oruheze rwovivaravara,
nu ndwa zire kOengipte,
nove iyo zemburukirwa mena
romarapi nga.
Omarapi woye womututu ya ungurwa
potupera oturovazu notuserarovazu
tu twa zire kokakoverwa Siprus.
8 Ovarumendu ovahinge
vozondjuwozomomeva
zoye va ri ovature vovihuro
kOsidon na Arwad.
Ovarumendu voye omuini ozonongo,
Tirus, va ri ovaungure
vomondjuwoyomomeva.
9 Ovahonge vomiti vondjuwoyomomeva
va ri ovarumendu mba hongwa nawa,
nu mba zire kObiblos.
Ovaungure vomozondjuwozomomeva
ngamwa azehe zomokuvare va tjita
omarandasaneno mozondjuwo zoye
zomarandero.
10 “Ovarumendu va Persie na Lidie na Libie va ungura motjimbumba tjoyo tjovita otja ovarwe wovita. Owo va turika otuvao twawo nomakori wawo wovita mozondanda zovarwe voye wovita. Owo ombe ri ovarumendu mbe ku etera ondangu. 11 Ovarwe wovita, mba zire kOarwad, ave tjevere orumbo rwoye, novarumendu va Gamad ave tjevere otuhungu twoye. Owo va turika otuvao twawo korumbo rwoye. Owo ombe ku hareka u rire omuwa omumanise nao.
12 “Ove wa tjita omarandasaneno mOspanie, notji wa kambura osilveri notjitenda notina nohanga vi rire ovisuta moruveze rwoviṋa vyoye ovingi. 13 Ove wa randasana nOvagrike nOvatubal nOvamesek, notji wa randisa oviṋa vyoye kutja u mwine po ovakarere noviṋa vyongoporo. 14 Wa randisa oviṋa vyoye kutja u mwine po ovakarere noviṋa vyoye kovandu va Bet-Togarma mokumwina po oukambe ounane na imbwi oukavirwa nousinokambe. 15 Ovandu va Rodos va tjita omarandaseneno kuna ove; novature voukoverwa ouingi ve ku pa omayo wozondjou nomiti vyomuzema moruveze rwovirandisiwa vyoye. 16 Ovature va Sirie va randa ovirandisiwa vyoye noviṋa vyoye ovingi vyongongo, mbi wa ungura. Owo va yandja omawe omahuze omakarbonkel nomaserandu pyu, nozombanda ozoserarovazu nozovivaravara, notupera otuheze, nozongwendu mokupimbasana novirandisiwa vyoye. 17 Ovajuda nOvaisrael va randa ovirandisiwa vyoye mokupimbasana novirya nouitji wozonyutji nomaze womiṋinga novyomoro omuwa. 18-19 Ovature va Damaskus va randa ovirandisiwa vyoye noviṋa vyoye vyongongo amave vi sutu nomavinu ngaa ezu kOhelbon, nomainya wozonḓu ngaa ezu kOsahar. Owo va yandja otjitenda otjihamburwa novyomoro omuwa mokupimbasana novirandisiwa vyoye. 20 Ovature va Dedan va yandja ovikaviriro mokupimbasana novirandisiwa vyoye. 21 Ovaaraba novanane avehe vehi ra Kedar va randa ovirandisiwa vyoye mokupimbasana nozondjona nozonḓu nozongombo. 22 Ovandu va Seba na Rama va yandja oviwerawere nongoldo novyomoro omuwa oviwa tjinene mokupimbasana novirandisiwa vyoye. 23 Ovandu vovihuro ooHaran na Kane na Eden, novarande va Seba na imba vovihuro ooAsur na Kilmad, avehe va tjita omarandasaneno kuna ove. 24 Owo va randisa ozombanda ozombwa ozomanise kove, na inḓa ozoserarovazu nozovivaravara, novinguma vyovivara oviyere, nozongoze nḓa wozewa na inḓa nḓa mangwa nawa. 25 Ovirandisiwa vyoye aavi turikwa mozondjuwozomomeva ozonene tjinene ozengi zomitwaro.
Ove wa ri otja ondjuwoyomomeva mokuvare
ndja turikwa nomitwaro omizeu.
26 Ovahinge voye vozondjuwozomomeva
tji ve ku hinga okukutwara mokuvare,
ombepo yokomuhuka otji ye ku teya
ai ku twara mokuvare kokure nomukuro.
27 Outumbe woye auhe novirandisiwa vyoye,
novaungure voye avehe vomondjuwoyomomeva,
novahonge voye vomiti vomondjuwoyomomeva,
novarandise voye,
novarwe avehe wovita mba ri mondjuwoyomomeva,
avehe kumwe va pandjarera mokuvare,
indu ondjuwoyomomeva yoye tji ya teka.
28 Ondjuriro yovaungure vomondjuwoyomomeva
mbaa ve ṋiṋiwa i omeva aa i kaposira
komukuro wokuvare.
29 “Ozondjuwozomomeva azehe nambano za isiwa tjo,
novaungure avehe vomozondjuwozomomeva va i.
30 Owo avehe mave ku riri tjinene amave ritirire
ehi moviuru namave rangere momutwe.
31 Owo mave rikurura oviuru mena roye,
nu mave zara ozombanda zomakutu.
Omitima vyawo mavi hihamwa
tjinene ngunda amave riri nao.
32 Mave ku imburire eimburiro
romutambo amave tja nai:
‘Owaṋi ngu ma sasanekwa notjihuro Tirus,
otjo nambano tji tji ri kumwi meṋe yokuvare?
33 Ovirandisiwa vyoye tji
vya ya komauye wopendje,
ove wa yenenisa ouhepe womihoko omingi.
Ozombara za tumbisiwa i outumbe
womitwaro vyoye.
34 Nambano ove wa tekere mokuvare;
ove wa ṱomwine mourekoto wokuvare.
Omitwaro vyoye na imba avehe mbe ku ungurira
va zengire mokuvare puna ove.’
35 “Avehe mba tura moukoverwa va kumisiwa i oumba mbwa tjitwa kove. Nangarire ozombara zawo za uruma, nu momirungu vyazo mu nomburuma. 36 Ove wa zengi, wa zengi nga aruhe, novarandise mouye auhe mave ku nyekerere, mave tira kutja mave munu oumba otja imbwi owoye.”
© Herero Revision Bible © Bible Society in Namibia, 2021.
