Esekiel 20 - Herero Revision Bible (HRR)

1 Meyuva oritjamurongo komueze outjatano wombura oitjahambombari tji twa ri mouhuura, ovanane tjiva wombongo yOvaisrael ve ya ku ami okundjipura ombango ya Muhona, nowo va kara pehi momurungu wandje. 2 Tjazumba Muhona wa hungira ku ami a tja: 3 “Muatje womundu, hungira novarumendu mba u ve raere kutja Muhona Ndjambi ma tja nai: Eṋe mwe ya okupura ombango yandje, katjo are? Tjiri, otja ngu mbi ri Ndjambi omunamuinyo, ami hi nakumuyandjera ko okundjipura otjiṋa. Ami, ngu mbi ri Muhona Ndjambi, owami ngu mba hungire nao.

4 “Muatje womundu, ove we rirongerere okuvepangura are? Nu tjita nao. Ve zemburukisa ozondjito ozondjaukise ooihe nḓu va tjita. 5 Ve raera imbi mbi me hungire. Tji mba toorora Ovaisrael, mbe ve tjitira omakwizikiro. Ami mbe rimunikisa omuini ku wo mOengipte ne ve raere nai: Owami Muhona Ndjambi weṋu. 6 Meyuva ndo otji mbe ve kwizikira kutja meve pitisa mehi ra Engipte nokuvehongorera kehi, ndi mbe ve toororera, ehi etumbe nehapise, newa emanise pomahi aehe. 7 Ami mbe ve raera kutja ve imbirahi oviserekarera vyoomukuru vovisenginina oviyaukise mbi va suverere, nokutja ave he rizunḓa oveni noomukuru woposyo va Engipte, orondu owami ngu mbi ri Muhona, Ndjambi wawo. 8 Nungwari owo ve ndji pirukira nave panḓa okupuratena. Kave imbirahire oviserekarera vyoomukuru vovisenginina vyawo, nu kave isire oomukuru vOvaengipte. Ami mbe rimana okuveraisira omasa aehe womazenge wandje imo mOengipte. 9 Nungwari hi tjitire nao, orondu okutjita nao itjaku eta ondjambu kena randje, tjinga amba tjivisire kOvaisrael momurungu woviwaṋa mu va turire kutja ami meve pitisa mehi ra Engipte.

10 “Ami otji mbe ve pitisa mehi ra Engipte ne ve twara mokuti orunguza. 11 Mbe ve pa omazikamisiro wandje ne ve hongo omatwako wandje nge hupisa ngamwa auhe ngu ma kara nonḓuviro ku wo. 12 Ami mba tjita kutja okuṱakamisa esabata ku rire otjiraisiro tjomerikutiropamwe pokati ka ami na wo; nu mbe ve zemburukisa kutja ami, ngu mbi ri Muhona, mbe ve yapura. 13 Nungwari nangarire mokuti onguza owo ve ndji pirukira. Va teya omazikamisiro wandje nave nakaura omatwako wandje nge hupisa ngamwa auhe ngu ma kara nonḓuviro ku wo. Owo va yamburura oparukaze indi esabata. Ami otji mbe rimana okutjita kutja ve mune omasa womazenge wandje imo mokuti orunguza nokuveyandeka. 14 Nungwari hi tjitire nao, orondu okutjita nao itjaku eta ondjambu kena randje mokati koviwaṋa mbyaa vi ndji munu tji me pitisa Ovaisrael mehi ra Engipte. 15 Otji mba tjita omakwizikiro mokuti onguza wokutja hi nokuvetwara kehi, ndi mbe ve pere, ehi etumbe nehapise, newa emanise pomahi aehe. 16 Ami mba tjita omakwizikiro nga, owo tjinga ava nakaura omatwako wandje nu ava teya omazikamisiro wandje nu ava yamburura esabata owo ve ri rivangera nomitima vyawo okurikotamena koomukuru vovisenginina.

17 “Nungwari ami mbe ve ṱira ondjenda. Ami mba tya kutja hi nokuvezepera avehe mokuti orunguza. 18 Moruveze rwanao, ami mba ronga omitanda vyawo e tja: Amu ṱakamisa ko omazikamisiro ooiho mukururume ngu va tjita, amu horere ko kovikaro vyawo nu amu rizunḓa ko noviserekarera vyoomukuru vovisenginina vyawo. 19 Owami Muhona, Ndjambi weṋu. Ṱakamiseye omazikamisiro nomatwako wandje. 20 Yapureye esabata, kokutja oro ri rire otjiraisiro tjomerikutiropamwe ngu twa tjita, nokutja ri mu zemburukise kutja owami ngu mbi ri Muhona, Ndjambi weṋu.

21 “Nungwari omitanda mbi wina vye ndji pirukira. Ovyo vya teya omazikamisiro wandje nu kavi ṱakamisire omatwako wandje omahupise ku ngamwa auhe ngu nonḓuviro kuwo. Ovyo vya yamburura esabata. Ami otji mbe rimana okuviraisira omasa womazenge wandje imo mokuti orunguza nokuvizepa avihe. 22 Nungwari hi tjitire nao, orondu okutjita nao itjaku eta ondjambu kena randje mokati koviwaṋa mbye ndji munine ame pitisa Ovaisrael mehi ra Engipte. 23 Otji mba tjita omakwizikiro warwe mokuti onguza. Ami mba yana kutja meve rimbi mouye auhe. 24 Mba tjita nao, tjinga ava nakaura omazikamisiro wandje nu ava katuka omatwako wandje nu ava yamburura esabata nu ave rikotamena koomukuru vovisenginina ooihe mukururume mbaa ve karere.

25 “Tjazumba otji mbe ve pa omazikamisiro ngaa e ha tjata ku wo, nomatwako nguyave ha sora okuṱakamisa. 26 Ami mbe ve yandjera kutja ve riyamburure nozombunguhiro zawo oveni, nokutja wina ve punguhe ovanatje vawo ovazandu omaveri. Ihi mba tjitira kutja mbi ve vere nokuveraisira kutja owami ngu mbi ri Muhona.

27 “Nambano, muatje womundu, raera kOvaisrael imbi ami, ngu mbi ri Muhona Ndjambi, mbi me hungire ku wo. Imbwi owo omuhingo ooihe wina mbu ve ndji yamburura na wo mouhaṱakama wawo. 28 Ami mbe ve twara kehi, ndi mba kwizikirire kutja meve pe. Tji va muna ozondunda ozonde nomiti otuhapo, otji va punguhira ozombunguhiro poṋa apehe. Owo ve ndji pindikira mokupunguha ozombunguhiro ozoningiririsiwa na mokutwimisa ozombunguhiro zovyomoro omuwa, na mokutirira ozombunguhiro zomanuwa. 29 Mbe ve pura e tja: Ozondunda ozonde nḓa ku mu yenda ozo ozatjike? Ozo ze isanewa kutja ‘Ozondunda Ozonde’ nga ku ndinondi. 30 Nambano raera nai kOvaisrael imbi ami, ngu mbi ri Muhona Ndjambi, mbi me hungire: Okutjavi tji mu tjita omauvi tjingewo nga ooiho ngu va tjitire, nokukongorera oomukuru vawo vovisenginina? 31 Nga ku ndinondi mu punguha oviyandjewa tjingevyo nu mu riyamburura oveni noomukuru tjingewo vovisenginina mokupunguha ovanatje veṋu momuriro. Nu tjazumba eṋe, Vaisrael, ingee mamu yekupura kutja ombango yandje oiṋe! Tjiri, otja ngu mbi ri Muhona Ndjambi omunamuinyo, ami hi nokumuyandjera okundjipura otjiṋa. 32 Eṋe mwa tya kutja mamu vanga okukara otja oviwaṋa vyarwe, otja ovandu mba tura momahi warwe nu mbe rikotamena komiti na komawe. Nungwari otjiṋa hi kamaatji tjitwa ko.

Ndjambi u vera nu u isira

33 “Tjiri, ami, ngu mbi ri Muhona Ndjambi omunamuinyo, me mu rongo kutja momazenge wandje me mu honaparere neke enamasa nouvara wandje auhe. 34 Ami me mu raisire omasa nouvara wandje nomazenge wandje, indu tji me mu woronganisa kumwe na tji me mu kotora okuza komahi aehe ku mwa rimbirwe. 35 Me mu twara ‘mOkuti Onguza kwOviwaṋa’, nu mu kwo omu me kemupangurira momurungu wandje. 36 Ami nambano me mu pangura otja tji mba pangurire ooiho mokuti onguza kwa Sinai.” Muhona Ndjambi ongu ma tja nao.

37 “Mamu kara kehi yondjeverero yandje, nu me mu ṋiṋikiza okukara nonḓuviro komerikutiropamwe wandje. 38 Ami me isa mo imba mbe ndji pirukira nu mba poka ku ami mokati keṋu. Meve pitisa momahi mu va tura nai, nungwari hi nokuveyarura kehi ra Israel. Notji mamu tjiwa kutja owami ngu mbi ri Muhona.”

39 Muhona Ndjambi ma tja nai: “Nambano, eṋe Vaisrael amuhe, twendeye uri mu kakarere oomukuru veṋu vovisenginina! Nungwari ami me mu raerere po kutja korusenina mamu kara nonḓuviro ku ami, nu kamu nakuyamburura ena randje eyapuke mokupunguhira oomukuru veṋu vovisenginina oviyandjewa. 40 Imo mehi kondundu yandje ondjapuke, indji ondundu onde ya Israel, eṋe amuhe otjiwaṋa tja Israel oku mamu rikotamene ku ami. Me kara nonyuṋe mu eṋe, nu me undju kutja mu ndji punguhire ozombunguhiro zeṋu, inḓa ozombwazombwa, nokundjietera oviyandjewa vyeṋu oviyapuke. 41 Tji mba zu nokumupitisa momahi mu mwa rimbwa ne mu woronganisa kumwe, me yakura ozombunguhiro zeṋu ozoningiririsiwa, noviwaṋa mavi munu kutja owami Omuyapuke. 42 Tji mbe mu yarura kehi ra Israel, indi ehi ndi mba kwizikirire kutja me ri yandja kooiho mukururume, notji mamu tjiwa kutja owami ngu mbi ri Muhona. 43 Nu mamu zemburuka ozondjito zeṋu azehe ozondjaukise nḓu mwe riyamburura na zo. Eṋe oveni mamu yaukisiwa i oviṋa avihe ovirunde mbi mwa tjita. 44 Neṋe mamu tjiwa kutja owami ngu mbi ri Muhona, tji mbe mu verere ondjozikiro yena randje, orondu ami hi mu tjiti otja kozondjito zeṋu nozondjira zeṋu zoposyo.” Muhona Ndjambi ongwa hungire nai.

Omuriro komukuma wokeyuva kokumuho

45 Muhona Ndjambi wa hungira ku ami a tja: 46 “Muatje womundu, tara komukuma wokeyuva kokumuho. Tena komukuma wokeyuva kokumuho nu u ukire ehwa rokeyuva kokumuho. 47 Raera ehwa rehi rokeyuva kokumuho kutja ri zuve imbi Muhona Ndjambi mbi ma hee, tji ma tja: Tara! Ami me yakisa omuriro, nowo mau nyosa omuti ngamwa auhe mbu ri move kutja oruhapo poo wa kukuta. Kape notjiṋa tji matji sora okuuzemisa. Owo mau tandavara okuza keyuva kokumuho nga keyuva kokunene, nomundu ngamwa auhe ma munu oupyu wotururumo twawo. 48 Ovandu avehe otji mave munu kutja ami, ngu mbi ri Muhona, owami ngu mbe u yakisa, nu kape na omundu ngu ma sora okuuzemisa.”

49 Nungwari ami mba unauna e tja: “Muhona Ndjambi, o ndji yandjere kutja mbi tjite nao! Ovandu avehe nai ve tja ami aruhe mbi hungira ovihakwa porwavyo.”