Omutambo mbwa tjitirwa ozohivirikwa za Israel
1 Muhona wa raera ku ami okutjitira ozohivirikwa za Israel omutambo mbwi:
2 Nyoko, tjiri, wa ri ongeyama onḓenḓu!
Oyo ye kurisira ovikeyamona vyayo
mokati kozongeyama ozondwezu.
3 Ye kurisa otjikeyamona tjimwe
tjayo nai tji hongo okuyeva;
kombunda otji tja karira otjiryavandu.
4 Oviwaṋa vya zuva ongeyama ndji,
notji vye i kamburira moruhoro nave
i kokozorere kOengipte nozombate.
5 Ongeyama onḓenḓu ndji tji ya muna
kutja kai tji nomaundjiro rukwao,
arire tji ye kurisa otjikeyamona
tjayo otjikwao;
notjo tja karira ongeyama onamasa.
6 Notjo tji tje kura aatji tjingauka puna
ozongeyama ozongwao.
Otjo wina tje rihonga okuyeva
natji karira otjiryavandu.
7 Iyatji teya oviṱunga nu atji nyono ovihuro.
Ovature vehi aave zezera aruhe
tjaa tji tye ovimboro.
8 Oviwaṋa vya wongara okuketjirwisa;
ovandu ave zu komikuma avihe.
Owo va yara ozombate zawo nave
tji kamburire moruhoro.
9 Owo ve tji twa motjiwongo nave tji
twara kombara ya Babilon.
Owo ave tji tjevere kokutja ombosiro
yeraka ratjo ai ha kazuvaka
rukwao kozondundu za Israel.
10 Nyoko wa ri otja omuvite mbwa
kuninwe meṋe yomupupo womeva;
mena rokutja pa ri omeva omengi omuvite
wa potere nomaso novihape.
11 Otutavi twawo twa ri otunamasa nu twa
hapere kutja tu rire outi wouhona.
Omuvite mbwi wa hapere okurira omure
pu pa yenene okuvaza ovikamba.
Omundu auhe aa yenene okumuna oure
nomapotero womaso wawo e ri kokure.
12 Nungwari omize vyawo vya zukurwa
momapindi navi nakaurirwa pehi;
ombepo yokomuhuka ya kukutisa ovihape vyawo;
otutavi twawo twa teyewa,
oto twa kukuta natu nyosiwa.
13 Nambano omuvite mbwi wa kuninwe
mokuti orunguza,
mehi ekukutu nu ndi hi nomeva.
14 Omukono wa yakura nomuriro au
seseta otutavi novihape vyawo.
Otutavi twi kamaatu karira otunamasa rukwao,
nu kamaatu karira outi wozombara rukwao.
Eimburiro ndi oromutambo; nu iyari imburwa aruhe.
© Herero Revision Bible © Bible Society in Namibia, 2021.
