Esekiel 14 - Herero Revision Bible (HRR)

Ndjambi ma vere ovakarere vovisenginina

1 Ovanane tjiva vOvaisrael ve ya okundjipura ombango ya Muhona. 2 Okuzambo Muhona wa hungira ku ami a tja: 3 “Muatje womundu, ovandu mba va yandja omitima vyawo koomukuru vovisenginina, nu ve yandjera kutja oomukuru mba ve ve pukisire kouvi. Nu nambano mave ripura kutja ami meve pe eziriro.

4 “Nambano hungira na wo nu u ve raere imbi ami, ngu mbi ri Muhona Ndjambi, mbi me hungire: Omuisrael auhe ngwe riyandja koomukuru vovisenginina nu ngu yandjera kutja ve mu pukisire kouvi, nu tjazumba ngu yekupura komuprofete worive, Omuisrael ngwi ma pewa eziriro i ami, eziriro oomukuru ve ovengi vovisenginina ndi ve sokupewa. 5 Oomukuru avehe vovisenginina mbo va pukisa Ovaisrael kutja ve poke ku ami; nungwari ami me undju okuvekotora ku ami neziriro randje.

6 “Nambano raera Ovaisrael imbi ami, ngu mbi ri Muhona Ndjambi, mbi me hungire ku wo: Ritanaureye nu mu ise oomukuru veṋu ovayaukise vovisenginina.

7 “Aruhe Omuisrael umwe poo owozonganda ngwa tura mokati kOvaisrael tja poka ku ami nu e rikotamene koomukuru vovisenginina, nu tjazumba a kapura komuprofete worive, ami, ngu mbi ri Muhona, me mu pe eziriro! 8 Ami me mu sekamene. Nu me mu tjiti kutja a rire otjihorera tjomaronga. Ami me mu kondo kotjiwaṋa tjandje kokutja mu tjiwe kutja owami ngu mbi ri Muhona.

9 “Omuprofete worive tja wovisiwa kokutja a yandje eziriro roposyo okutja nao owami, Muhona, ngu mbe mu wovisa. Ami me mu kondo kotjiwaṋa tja Israel. 10 Omuprofete na ingwi ngu me mu pura, aveyevari mba mave munu omberero tjingeyo. 11 Ami me tjiti nai okutjaera Ovaisrael kutja ave he ndji esa, nokutja ave he riyamburura oveni nomauvi wawo. Owo mave rire otjiwaṋa tjandje, nami me rire Ndjambi wawo.” Muhona Ndjambi ongwa hungire.

Noa na Daniel na Job

12 Muhona wa hungira ku ami a tja: 13 “Muatje womundu ehi rorive tji ra tura ondjo nu ari ha kara nouṱakame mu ami, ami me roporora eke randje nu e nyono ovikurya mbya hapa mehi ndo, me hindi ondjara nu e yandeke ovandu novinamuinyo wina. 14 Nangarire kutja ovarumendu vetatu mbo oo Noa na Daniel na Job andakuzu va turire mo ousemba wawo itjau yama ominyo vyawo porwavyo.” Muhona Ndjambi wa hungire.

15 “Rumwe mape ya ami e hindi ovipuka vyokuti okuzepa ovandu amavi tjiti ehi okurira ongaango, nga tji pe hi nomundu ngu ma sora okutuurunga ro, 16 nu nangarire kutja ovarumendu vetatu mbo andakuzu va turire mu ro, tjiri, ami, ngu mbi ri Muhona Ndjambi, otja ngu mbi ri Ndjambi omunamuinyo, katjave sora okuyama nangarire ovanatje vawo oveni. Owo atjave yama ominyo vyawo oveni porwavyo, nehi itjari rira okuti ongaango.

17 “Rumwe mape ya ami e eta ovita mehi ndo ne hindi ovirwise ovinyone okuyandeka ovandu novinamuinyo wina, 18 nu nandarire kutja ovarumendu vetatu mbo andakuzu va turire mu ro, tjiri, ami, ngu mbi ri Muhona Ndjambi, otja ngu mbi ri Ndjambi omunamuinyo, katjave sora okuyama nandarire ovanatje vawo oveni, nungwari atjave yama ominyo vyawo oveni porwavyo.

19 “Rumwe mape ya e hindi omutjise kehi ndo, nu momazenge wandje e zepa ominyo omingi, ovandu novinamuinyo wina, 20 nu nandarire kutja Noa na Daniel na Job andakuzu va turire mu ro, tjiri, ami, ngu mbi ri Muhona Ndjambi, otja ngu mbi ri Ndjambi omunamuinyo, katjave sora okuyama nangarire ovanatje vawo oveni. Ousemba wawo itjau yama ominyo vyawo oveni porwavyo.”

21 Muhona Ndjambi ma tja nai: “Ami me hindire Jerusalem ozomberero zandje ine inḓa ozombi tjinene, okutja ovita nondjara, novipuka vyokuti nomutjise omuzeu okuyandeka na vyo ovandu novinamuinyo wina. 22 Tji pena tjiva mba hupu po nave taurisa ovanatje vawo, tareye ku wo tji mave ya ku eṋe. Tareye kozongaro na kozondjito zawo ozombi, notji mamu rimwine oveni kutja ozomberero nḓu mba eta kOjerusalem ze ri osemba. 23 Notji mamu tjiwa kutja mba ri nomeripuriro omasemba, indu tji mba tjita oviṋa avihe mbi.” Muhona Ndjambi ongwa hungire.