Eksodus 8 - Herero Revision Bible (HRR)

Ovisume

1 Komurungu wanao Muhona wa hungira ku Moses a tja: “Twende ku Farao nu u katje nai ku ye: ‘Muhona ma tja tji esa otjiwaṋa tjandje tji tjinde kutja tji kendjikarere. 2 Nu tji mo panḓa otjiwaṋa tjandje kutja tji tjinde, me vere ehi roye arihe novisume, 3 nga onḓonḓu tji mai nyangatara novisume. Novyo mavi rondo navi hiti mondjuwo yoye na metuwo roye romara nombete yoye, na wina mozondjuwo zovakarere voye nozotjiwaṋa tjoye, na momazuko mu mu terekerwa ozomboroto, na moviyaha ovirungiriro vyozomboroto. 4 Novisume mavi rurumine kove na kotjiwaṋa tjoye na kovakarere voye avehe.’ ”

5 Norukwao Muhona wa hungira ku Moses a tja: “Raera Aron a roporore eke re rokati kombanda yozonḓonḓu nomikungu na kombanda yomarindi, nu u pitise mo ovisume, vi vandeke ehi arihe ra Engipte.” 6 Nu Aron wa roporora eke re kombanda yomeva wa Engipte, novisume arire tji vya piti navi vandeke ehi arihe ra Engipte. 7 Nozondjai za tjita nai wina noundjai wazo, naze pitisa ovisume mbya vandeka ehi arihe ra Engipte.

8 Nu Farao arire tja isana ooMoses na Aron na tja ku wo: “Kumbeye ku Muhona kutja a ise ko ovisume mbi ku ami na kotjiwaṋa tjandje nu ami otji me isa otjiwaṋa tjeṋu kutja tji tjinde nu tji kapunguhire Muhona.”

9 Nu Moses wa tja ku Farao: “Ondjozikiro kombara! Nu oruveze ruṋe ndu mbi sokukukumbira novakarere voye notjiwaṋa tjoye kutja ovisume vi isiwe ko kove na mozondjuwo zoye, posi yomonḓonḓu Nil porwayo?”

10 NOmbara ya zira nai tja: “Muhuka.”

Nu Moses arire tja tja: “Ami me tjiti otja pu wa hee, kokutja u tjiwe kutja kape na warwe ngu ṱeki pu Muhona Ndjambi wetu. 11 Novisume mavi zu po pove na mozondjuwo zoye na povakarere voye na moṱjiwana tjoye. Nu mavi sewa monḓonḓu Nil porwayo.” 12 Moses na Aron otji va zapo pu Farao nave i. Nu Moses wa kumba ku Ndjambi mena rovisume Muhona mbya eta kombanda ya Farao. 13 Nu Muhona wa tjita otja kembo ra Moses; ovisume mozondjuwo na motupanda na mokuti vya koka. 14 Nowo ve vi kombera kumwe, nehi arihe ra wora. 15 Nu Farao tja muna kutja pe ya osuviriro otja kukutisa omutima we, nu ka puratenene ku wo otja Muhona pa hungira.

Otumwe

16 Norukwao Muhona wa tja ku Moses: “Raera Aron a tone ehi nokati ke, nu mehi arihe ra Engipte oruuma rwehi ma ru tanauka okurira otumwe.” 17 Aron wa yera okati ke na tono na ko ehi, nu oruuma aruhe mOengipte rwa tanauka okurira otumwe, tu twe ya kombanda yovandu novinamuinyo. 18 Nozondjai za tjita nai rukwao noundjai wazo okupendura otumwe, nungwari ozo kaze sorere. Komuhingo mbwi otumwe otji twa ri kombanda yovandu novinamuinyo. 19 Nozondjai arire tji za tja ku Farao: “ONdjambi ongwa tjiti nai!” Nungwari omutima wa Farao wa kukutira ko, nga tjaa ha puratene ku wo otja Muhona pa hungira.

Omaze

20 Komurungu wanao Muhona wa hingira ku Moses a tja: “Muhuka ritupuka, nu kakurame komurungu wa Farao; tara, eye ma i konḓonḓu, nu katje nai ku ye: ‘Muhona ma tja: Tji esa otjiwaṋa tjandje tji tjinde kutja tji kendjikarere. 21 Orondu tji u hi nokuisa otjiwaṋa tjandje tji tjinde, ove novakarere voye notjiwaṋa tjoye nozondjuwo zoye me mu hindire omaze. Inḓa ozondjuwo zOvaengipte maze ura nomaze, na indi ehi wina mu va tura. 22 Nungwari meyuva ndi ami me yapura ehi ra Gosen peke, mu mwa tura otjiwaṋa tjandje kutja amu ha kara nomaze. Otjinga amo tjiwa kutja owami, ngu mbi ri Muhona mehi. 23 Nu ami me twa po ombangu pokati kotjiwaṋa tjandje notjoye. Muhuka mape ya otjiraisiro hi.’ ” 24 Nu Muhona wa tjita nao. Omahapu womaze ye ya mondjuwo ya Farao na mozondjuwo zovakarere ve na mOengipte arihe. Ehi ra nyonwa i omahapu womaze.

25 Farao arire tja isana ooMoses na Aron na tja: “Twendeye, kapunguhireye Ndjambi weṋu muno mehi ndi!”

26 Nungwari Moses wa zira a tja: “Kakokuwa okutjita nao; orondu ihi tji matu punguhire Muhona, Ndjambi wetu, otjiyaukise kOvaengipte. Eṱe tji matu punguha ombunguhiro notjiṋa otjiyaukise kOvaengipte, kaave tu zepa nomawe are? 27 Eṱe matu i ondjira youre womayuva yetatu kokure mokuti onguza, tu kapunguhire Muhona, Ndjambi wetu, otja tje tu raera.”

28 Farao arire tja tja: “Ami me mu esa mu tjinde kutja mu kapunguhire Muhona, Ndjambi weṋu, mokuti onguza. Nu amu kaseka kokure tjinene. Ndji kumbireye!”

29 Nu Moses wa zira nai: “Tara, ami me zu po pove, nu me kekukumbira ku Muhona kutja muhuka omaze ye ze ko ku Farao na kovakarere ve na kotjiwaṋa tje. Nu o tu tikura rukwao, amo tjaere otjiwaṋa okukapunguhira Muhona.”

30 Moses arire tja zu po pu Farao, na kakumba ku Muhona. 31 Nu Muhona wa tjita otja kembo ra Moses: Eye wa isa ko omaze nga ku Farao na kovakarere ve na kotjiwaṋa tje. Nu kape serwe eze rimwe. 32 Nungwari Farao wina otjikando hi wa kukutisa omutima we, nu ka isire otjiwaṋa okutjinda.