Eksodus 25 - Herero Revision Bible (HRR)

Oviyandjewa kokutunga otjouyapuke

1 Muhona wa hungira ku Moses a tja: 2 “Karaere Ovaisrael kutja ve ndji etere otjiyandjewa; ku auhe ngu nombango okuyandja, ndji kamburireye otjiyandjewa. 3 Oviyandjewa, mbi mamu kambura ku wo, ovyo mbi: Ongoldo nosilveri nongoporo; 4 nomarapi omarovazu nomaserarovazu nomaserandu pyu, norupera oruheze, nozombanda nḓa ungurwa pomainya wozongombo; 5 nomikova vyozondwezu zozonḓu mbya seraerisiwa, nomikova vyozombwa zomeva mbya ṱukara, nomiti vyomue; 6 nomaze womamunine, noviṋuke vyomaze omatwirise, noviṋuke vyomoro omuwa; 7 nomawe omahuze omaserandu, nomawe omahuze omakwao okutuwa kombanda yOmupristeri Otjiuru koviṱuve na kokayaṱu komorukoro. 8 Nu ngave ndji ungurire ondjuwo kutja mbi ture mokati kawo. 9 Ungureye inga omaturiro noviṋa, mbi ri mu wo otja komasanekero ngu me mu raisire.

Otjipwikiro tjOmerikutiropamwe

(Eks 37:1-9)

10 “Owo ngave ungure otjipwikiro pomue ozosentimeta esere nomurongo koure, nozosentimeta omirongo hamboumwe na hamboumwe koupapi na koutonga. 11 Nove twako ongoldo ongohoke moukoto nopendje. Nu twako omukuro wongoldo okukondorokisa tjo. 12 Nu tji hamburira ozongoho ine ozongoldo, nu u ze twe koviryo vyatjo vine, ozongoho mbari komukuma umwe watjo, na mbari komukuma warwe watjo. 13 Ungura ovinḓe pomue, nu u twe ko ongoldo. 14 Hweka ovinḓe mbi mozongoho komunda auhe wotjipwikiro okutjitjinda na vyo. 15 Ovinḓe mbi ngavi kare mozongoho nḓa zotjipwikiro, nu avi homonwa mu zo. 16 Kombunda yanao otji mo twa mo motjipwikiro hi ovitjangero vyomawe vivari vyomatwako, mbi me ku pe.

17 “Wina ungura otjikamo tjongoldo ongohoke ozosentimeta esere nomurongo koure nozosentimeta omirongo hamboumwe na hamboumwe koupapi. 18 Kovikoro aviyevari vyomayandero wotjikamo twako ovakerubi vevari, mba hamburwa pongoldo, umwe kotjikoro atjihe. 19 Ve ungura nai kutja ve rire otjiṋa tjimwe notjikamo. 20 Ovakerubi mba ngave kare novivava mbya yeruruka kombanda kutja ve tjizikize ihi otjikamo novivava vyawo. Nomirungu vyawo ngavi hungamasane amavi tara kotjikamo. 21 Nu twako otjikamo hi kotjipwikiro; nu imwi moukoto watjo twa mo ovitjangero vyomawe vivari vyomatwako, mbi me ku pe. 22 Imbo opu me hakaenene na ove; okuza kombanda yotjikamo na pokati kovakerubi aveyevari, mbe ri kombanda yOtjipwikiro tjOmerikutiropamwe, opu me ku raerere avihe, mbi me raya kOvaisrael.

Otjiriro tjozomboroto nḓe yandjwa ku Ndjambi

(Eks 37:10-16)

23 “Ungura otjiriro pomue ozosentimeta mangara omirongo muvyu koure nozosentimeta omirongo vine na ine kouparanga nozosentimeta omirongo hamboumwe na hamboumwe koutonga. 24 Nu twako ongoldo ongohoke. Nu tji kondorokisa nomukuro wongoldo. 25 Tjazumba twako orutapo kominda avihe rwoupapi wozosentimeta hambombari nohinga. Nu kombanda yarwo twako omukuro wongoldo. 26 Nu ungurira tjo ozongoho ine ozongoldo, nu u ze papere kovikoro poune wavyo pu pe noviryo. 27 Inḓa ozongoho zokuṱiza ovinḓe vyomatjindiro wotjiriro ngaze tuwe keṋe yorutapo. 28 Nu ungura ovinḓe pomue, nu u twe ko ongoldo, a rire ku kwa tjindirwa otjiriro hi. 29 Wina ungura oviyaha, novikangero vyomatwimisiro, nomahoro, novinwino vyatjo mu mamu yandjerwa ombunguhiro yomanuwa; avihe mbi vi ungura pongoldo ongohoke. 30 Nu kotjiriro hi momurungu wandje aruhe twako ozomboroto nḓe yandjwa ku ami.

Otjikurameno tjomamunine

(Eks 37:17-24)

31 “Wina ungura otjikurameno tjomamunine tjongoldo ongohoke. Ombaze nomukuro watjo ngavi hamburwe pongoldo. Nu ouyaha watjo nozondundo nozongara zatjo avihe mbi ngavi rire otjiṋa tjimwe. 32 Omaoko hamboumwe ngaye pite momikuma vyatjo: Komukuma auhe omaoko yetatu. 33 Nu mape kara ozongara ndatu nḓa sana kozongara zomuama, kondundo aihe ongara imwe. Nu komaoko aehe hamboumwe ngape kare nao. 34 Nu omukono ouini ngau kare nozongara ine, nḓa sana kozongara zomuama, nozondundo, nozongara. 35 Ngape kare ondundo imwe kehi yomapitiro womaoko kouvarivari wawo. 36 Ozondundo nomaoko ngavi rire otjiṋa tjimwe notjikurameno tjomamunine. Avihe ngavi rire otjiṋa tjimwe tji tja hamburwa pongoldo ongohoke. 37 Ove ungura omamunine hambombari wotjikurameno tjomamunine, nu u ye twe po kutja ondjerera yawo i yerere komunda wokomurungu. 38 Notjikonde tjongoze yemunine, nouyaha wovikangero ngavi rire vyongoldo ongohoke. 39 Oviṋa mbi avihe kumwe ungura pongoldo ongohoke porwayo yondjinda yozokirograma omirongo vitatu nandano. 40 Tjita ouatjiri kutja moungura otja kotjisanekero tji wa raisirwa kondundu.