Omeva maye zu moruuwa
(Num 20:1-13)1 Otjimbumba atjihe tjOvaisrael tja kayenda natji tjindi okuza kovirongorongo, okuza mokuti onguza Sin otja kembo ra Muhona. Nu tja katunga ozondanda mOrefidim; nu ingo kakwa ri omeva kotjiwaṋa okunwa. 2 Otjiwaṋa otji tja posisa Moses, natji tja: “Tu pao omeva okunwa!”
Nungwari Moses we tji zira a tja: “Mamu ndji posisire tjike? Mamu rorere tjike Muhona?”
3 Notjiwaṋa tja zera tjinene okunwa omeva. Notjo tja unaunina Moses atji tja: “Ove we tu tjindisira tjike mOengipte? Okutja eṱe novanatje vetu novinamuinyo vyetu tu ye okuṱa i onyota are?”
4 Moses otja ravaera ku Muhona ama kumbu na tja: “Hi tjite vi notjiwaṋa hi? Tjapo ngaa tji ndji zepa nomawe.”
5 Nu Muhona wa zira ku Moses a tja: “Toora ovarumendu tjiva ovanane vOvaisrael nu kayende komurungu wotjiwaṋa. Nu toora okati koye wina, inga ku wa tona na ko onḓonḓu Nil, meke roye nu u kayende. 6 Tara, ami me kakurama komurungu woye koruuwa rwondundu Horeb. Tona oruuwa ndo, nu mamu piti omeva mu rwo kutja otjiwaṋa tji nwe.” Nu Moses wa tjita nao momurungu wovanane vOvaisrael.
7 Nu poṋa mbo Moses we pe ruka Masa, okutja omarorero, na Meriba, okutja oviposa. Orondu Ovaisrael tji va tjita oviposa na Muhona, nave mu roro amave tja: “Hapo, Muhona u ri mokati ketu?”
Ondoṋeno kombanda yOvaamalek
8 Ovaamalek ve ya nave rwisire Ovaisrael mOrefidim. 9 Nu Moses wa tja ku Josua: “Toorora ovarumendu tjiva, nu u karwe nOvaamalek. Muhuka me kakurama kombanda yotjivanda, nokati ka Ndjambi meke randje.” 10 Nu Josua wa tjita otja pa raerwa i Moses, na karwa nOvaamalek. Nungwari imba ooMoses na Aron na Hur va ronda kondomba yotjivanda. 11 Nu pa kara nai: Moses ngunda a yere okuoko kwe, Ovaisrael otjaave kara nomasa tjinene kombanda yambena. Nungwari tja wisa okuoko kwe pehi, Ovaamalek otjaave kara nomasa kombanda yOvaisrael. 12 Nomaoko wa Moses tji ya urwa, ooAron na Hur va toora ewe nave ri twa kehi ye, neye wa haama ku ro. Nu ooAron na Hur va ṱiza omaoko we, umwe komunda mbwi, nomukwao komunda mbwina. Omaoko we otji ya ṱirikwa nai, nga tji ratoko. 13 Nu Josua otja havera Ovaamalek nengaruvyo re okumana.
14 Tjazumba Muhona wa tja nai ku Moses: “Tjanga ihi membo otja otjizemburukiro, nu raera Josua kutja ami me zepa Ovaamalek avehe okumana nga tji pe hi na ngu me rizemburuka nawo.” 15 Nu Moses wa tunga otjipunguhiro ne tji ruku nai: “Muhona eye ohako yandje.” 16 Neye wa tja: “Tjiri, twako eke roye kohako ya Muhona! Muhona ma rwisa Ovaamalek okuza komuhoko nga komuhoko.”
© Herero Revision Bible © Bible Society in Namibia, 2021.
