Eksodus 11 - Herero Revision Bible (HRR)

Onḓiro yomaveri mai tjivisiwa

1 Kombunda yanao Muhona wa tja ku Moses: “Me eta rukwao otjiwonga tjimwe uriri kombanda ya Farao na kombanda ya Engipte. Tjazumba eye otji me mu esa mu tjinde. Neye tje mu esa okutjinda, tjiri, me mu ramba oparukaze omuini okuzamba. 2 Raera kotjiwaṋa, omurumendu nomukazendu auhe, kutja a ningire komuraranganda we oviwerawere ovisilveri novingoldo.” 3 Nu Muhona wa tjita kutja Ovaengipte ve kare nondengero kOvaisrael. Nu ovahongore va Farao na ihi otjiwaṋa tja Engipte va yozika Moses tjinene otja omurumendu omunene.

4 Moses arire tja tja ku Farao: “Muhona ma tja nai: ‘Mangara mokati kouṱuku me tuurunga Engipte. 5 Nu inga omaveri aehe mehi ra Engipte maye koka, okuza keveri ra Farao ngu ma kahaama kotjihavero tjouhona we, nga keveri romukarere we omukazendu ngu kweya ombako yovikokotwa, nomaveri aehe wovinamuinyo wina. 6 Nu maku kara ondjuriro onene mehi ra Engipte arihe, ndji hi na pu ya ri ko, nu ndji hi na maai kakara ko rukwao. 7 Nungwari kape na umwe wOvaisrael, ombwa ku mai ukire okuza kovandu nga kovinamuinyo, mu tjiwe kutja Muhona ma tjiti ombangu pokati kOvaengipte nOvaisrael.’ 8 Ovahongore voye avehe mave ya okuripeta ku ami nave tja: ‘Tjindeye, ove notjiwaṋa tjoye atjihe tji tji ku kongorera.’ Nu tjazumba ami otji me tjindi.” Nu Moses otja zapo pu Farao nomazenge omanene.

9 Nu Muhona wa tja ku Moses: “Farao ke nakupuratena ku eṋe kutja ovihimise vyandje vi takavare mehi ra Engipte.” 10 OoMoses na Aron va tjita ovihimise mbi avihe momurungu wa Farao. Nungwari Muhona wa kukutisa omutima wa Farao, kokutja a ha isa Ovaisrael okutjinda mehi re.