Ovanatje nOvanene
1 Vanatje, kareye nonḓuviro kovanene veṋu otja mbu mu ri ovakambure tjinga e ri ombango ya Muhona. 2 “Yozika iho na nyoko”, oro ondi ri etwako enanḓengu; noro wina ri nomakwizikiro nga: 3 “kutja u kare nawa, nu u kare nomuinyo orure kombanda yehi.” 4 Neṋe vanene, amu handjisa ovanatje veṋu, nungwari ve kuriseye nokuvevyura nokuveronga otja Muhona pe vanga.
Ovakarere nOvahona
5 Neṋe vakarere, kareye nonḓuviro kovahona veṋu wokombanda yehi amamu tjiti nao nondiriro nomazezerero nu wina nomitima omisemba aayo mamu tjitire Kristus. 6 Amu ungurire okumunika kovahona veṋu nokuritjatisa kovandu; nungwari ungureye otja ovakarere va Kristus mbe yenenisa ombango ya Ndjambi nomutima auhe. 7 Ungureye oviungura vyeṋu otja ovakarere amu nenyando aayo mamu karere Muhona nu kavandu. 8 Eṋe mamu tjiwa nawa kutja Muhona ma yandja ondjambi ku auhe kotjiungura tji ma ungura, kutja omukarere poo kutja omundu ngu ri mouyara.
9 Neṋe vahona, zareye ovakarere veṋu momuhingo tjingewo, nu mu ritjaere kozombeze. Tjiweye nawa kutja eṋe novakarere veṋu mu na Muhona tjingeye umwe meyuru. Eye u pangura avehe nokuhinandoorora.
Ovirwise vya Ndjambi
10 Omambo omasenina me tja nai: Zeupareye moruwano na Muhona na momasa we omanene. 11 Ripangaṋeye novirwise Ndjambi mbi me mu pe kokutja mu sore okupirukira omatjendje wa Satan. 12 Orondu eṱe katu nokurwa novandu, nungwari matu ru nozombepo ozonamasa zouye ourunde mbwi, nomauhona nomauvara nozombara zouye mbwi wonḓorera. 13 Opu mamu sokuripangaṋa novirwise vya Ndjambi nambano! Kutja, eyuva roumba tji re ya, eṋe otji mamu yenene okupirukira omarwisiro womunavita. Nu tji mwa zu nokurwa nga komaandero, ingee mamu zikama.
14 Opu mwa sokurirongera amwa kutwa nekwamo rouatjiri pomahuri namwa zara ousemba otja mbu ri ombanda yotjitenda yomorukoro, 15 namwa zara omerirongerero wokuzuvarisa Ombuze Ombwa yohange otja nge ri ozongaku kozombaze zeṋu. 16 Nu aruhe tjindeye ongamburiro otja oruvao meke reṋu; orondu nongamburiro ndji mamu sora okuzemisa oviku vyomuriro vyaingwi umwe Omunauvi. 17 Nu zareye ondjamo otja ekori rotjitenda, nu mu toore embo ra Muhona otja engaruvyo rOmbepo. 18 Avihe mbi tjiteye amamu kumbu nu mu ningire ku Ndjambi aruhe mOmbepo. Kareye katumba nu aruhe mu kumbire ovakwetu ovakambure avehe. 19 Wina ndji kumbireye kokutja tji me zuvarisa, Ndjambi e ndji pe omambo omasemba wokutjivisa omahorekwa wOmbuze Ombwa nokuhinooma. 20 Nu motjimbe tjOmbuze Ombwa ndji owami omuhindwa, nambano ngu mbi ri motjovakamburwa. Kumbeye kutja mbi zuvarise indji Ombuze Ombwa nokuhinooma otja tji mba raerwa.
Ozombinika
21 Tikikus, omukwetu omusuverwa nomukarere omuṱakame motjiungura tja Muhona, me mu raere avihe, mu tjiwe kutja mbi ri vi nu mbi ungura tjike. 22 Ami opu me zu okumuhinda ku eṋe okuyekumuraera kutja eṱe atuhe tu ri vi nokuyekumuyandiparisa.
23 Ndjambi Tate na Muhona Jesus Kristus nga yandje ohange norusuvero nongamburiro kovakwetu ovakambure avehe. 24 Otjari tja Ndjambi ngatji kare na imba avehe mba suvera Muhona wetu Jesus Kristus norusuvero ndu ha yanda.
© Herero Revision Bible © Bible Society in Namibia, 2021.
