Okukara noruwano mombongo
1 Nu nambano ami ngu mbi ri omupandekwa motjimbe tjokutja mbi karera Muhona, me mu rongo kutja mu hupe otja komaisaneno ngunga amwa isanewa na wo i Ndjambi. 2 Aruhe risusupariseye nu mu rire ozongozu nu mu kare nomuretima. Nu zarasaneye norusuvero. 3 Kondjeye okuṱakamisa oruwano ndu mu pewa i Ombepo ya Ndjambi. Nohange ndji za ku Ndjambi ngai mu waneke kumwe. 4 Eṱe oweṱe orutu rumwe uriri, neṱe atuhe tuna Ombepo imwe uriri, punga ape nomaundjiro yemwe uriri Ndjambi ke mu isanena. 5 Muhona iumwe uriri, nongamburiro iimwe uriri, nombapitisimo iimwe uriri. 6 Ndjambi nu Ihe yovandu avehe eye iumwe uriri. Eye oMuhona waavehe, nu u ungura mu avehe nu u ri mu avehe.
7 Auhe mokati ketu wa pewa otjiungura tjapeke tjotjari otja kotjisanekero Kristus tje tu pa. 8 Omatjangwa opu maye zu okutja:
“Eye tja ronda kombandambanda
wa twaerera ovahuurwa ovengi
nu wa yandja oviyandjewa kovandu.”
9 Nambano ingwi okutja “Eye wa ronda” maku hee tjike? Okwo maku hee kutja eye rutenga wa punda kehi nguno kombanda yehi. 10 Nu ingwi ngwa pundire kehi ongunga e ri ye ngwi ngwa rondere kombanda yomayuru aehe kutja e keurise avihe. 11 Nu “oviyandjewa” Eye “mbya yandja” ovyo mbi: Tjiva we ve toorora okurira ovaapostele, tjiva okurira ovaprofete, tjiva okurira ovazuvarise vombuze Ombwa, tjiva okurira ovanene wombongo na tjiva okurira ovahonge. 12 Eye we ve toororera okurongerisa otjiwaṋa tja Ndjambi otjiungura tjoukriste, kokutja ve tunge orutu rwa Kristus. 13 Eṱe atuhe otji matu kaworongana moruwano rumwe mongamburiro yetu na mondjiviro yetu yOmuna wa Ndjambi, notji matu rire ovandu mbe kura okuvaza omuseka ohamukwao na imbwi owa Kristus. 14 Notji tu hi nokuuhara amatu rire ovanatje rukwao; eṱe katu tji nakukandakandisiwa rukwao tjimuna ozongazona nokuhingwa i ombepo ngamwa aihe yomahongero omapukise, ovahonge woposyo tji mave vanga okutupopa nomapopero nomatjendje wawo. 15 Nu moruveze rwanao, mena rorusuvero eṱe matu panḓere pokuhungira ouatjiri, nu komuhingo mbwi matu kuru okusana ku Kristus, ngu ri otjiuru tjombongo. 16 Nu mu ye omu mu za orutu aruhe. Ouṋepo auhe worutu u yenenasana, nu auhe pamwe au rire otjiṋa tjimwe; norutu otji ru ritunga oruini morusuvero.
Ongarero ombe mu Kristus
17 Mena ra Muhona ami me mu rongo tjinene: Amu panḓere pokuhupa otja ovandu mbe ha tjiwa ombango ya Ndjambi. Omerizemburukiro wawo owo opouriri, 18 omeripuriro wawo owo onḓorera. Nowo kave norupa momuinyo Ndjambi mbwe yandja, tjinga ave ha vanga okutjiwa Ndjambi nu tjinga averi ovirangaranga. 19 Owo kave tji nahoṋi nangarire kaṱiṱi; ve riyandja oveni kouvi ngamwa auhe, nu ve tjita ouhakohoke nokuhinomeritjaerero.
20 Neṋe katji mwe rihonga Kristus nao. 21 Eṋe, tjiri, mwe mu zuva, neṋe mbu mu ri ovakongorere ve mwa hongwa imbwi ouatjiri mbu ri mu Jesus. 22 Hukureye omundu omukuru ngwe mu kareka mongarero yeṋu onguru, ingwi omundu omukuru ngwaa nyonwa i ozonḓuma ze ozombukise. 23 Omitima vyeṋu nomeripuriro weṋu vi sokuyarurwa koupe. 24 Neṋe mamu sokuzara omundu omupe ngwa utwa kosaneno ya Ndjambi nu ngu riraisa mongarero osemba nondjapuke youatjiri.
25 Opu mwa sokuisa okukora ovizeze; auhe nga hungire ouatjiri komukambure omukwao, atuhe pamwe tjinga atu ri ouṋepo morutu rwa Kristus. 26 Amu tjiti ourunde nandi mwa ṱomazenge, nu hanganeye eyuva ngunda ari hiya hita, 27 Satan amu mu pe oruveze kutja e mu kambure. 28 Omundu ngwaa vaka, a ha vaka rukwao; nu nga ute okuungura e rimwine omuini ondjambi ombwa, nu a yenene okuvatera ovasyona. 29 Ngaamu hungire omambo omatwe novinyo vyeṋu; nungwari hungireye omambo omawa nomatunge otja pu pe ri ohepero, kokutja inga ngu mamu hungire, ye yandje onyuṋe kovapuratena. 30 Amu yandja oruhoze kOmbepo Ondjapuke ya Ndjambi, orondu eye me mu haka notjihako okurira ouini wa Ndjambi keyuva ronguturiro. 31 Iseye ongore ngamwa aihe, nomapindi nomazenge. Amu rokoha nokuyamburura ovakweṋu, nu amu tjiti otjiṋa ngamwa atjihe otjivi. 32 Karasaneye nouwa nomitima omitarazu, nu mu isirasane otja Ndjambi wina punga e mu isira mu Kristus.
© Herero Revision Bible © Bible Society in Namibia, 2021.
