1 Ami mba muna otjipo tjimwe tji tji ṋiṋikiza ovandu mouye mbwi: 2 Porumwe Ndjambi ma yandja outumbe nouini nondjozikiro komundu, kokutja a ha kaere otjiṋa mu imbi avihe mbi ma zeri; nu vari Ndjambi ke nokumuyandjera kutja a vyare mu vyo; nungwari omundu wozonganda ongu ma vyara mu vyo. Avihe mbi omungandjo, nu ma rire omuhihamo omuzeu. 3 Porumwe omundu ma kwata ovanatje esere rimwe na hupu orure; nungwari nandarire kutja eye wa hupu orure pu pe ṱeki pi, eye tje hi nokukara nondjoroka na ha munu ombakero ombwa, ami me tja okanatje ku ka kwatwa nokuhinomuinyo oko okananḓengu pu ye. 4 Oko ka yenda monḓorera, nu make yaruka monḓorera; nandarire ena rako mari vandekwa i onḓorera. 5 Oko kamaake munu ondjerera yeyuva, nu kamaake tjiwa kutja omuinyo otjikeṋa, nungwari oko ka muna omasuviro pu ye. 6 Nandarire kutja omundu kaaṋi ma hupu oure wozombura omayovi yevari, eye kamaa kara nenyando mehupiro re. Indu nai aveyevari kave nokuyenda koṋa kumwe are?
7 Omundu u ungura oviungura vye avihe kokutja a mune otjiṋa okurya, nungwari onḓero ye kai kovisiwa. 8 Omundu onongo u nonḓengu yatjike peyova? Nu mape vatere tjike komusyona, nanda tjiwa okuritjinda nawa komurungu wovandu ovakwao? 9 Okokuwa okukara nohange na imbi mbi u na vyo komeho yokuvanga okukara notjiṋa tjarwe aruhe. Imbi wina omungandjo, nu vi ri tjimuna okurambera ombepo uriri.
10 Otjiṋa atjihe tji tja kara okuza koruveze orukuru tji nena ratjo; omundu wina u tjiukwa kutja eye otjikeṋa; eye kamaa sora okupatasana na ingwi ngu nomasa pu ye. 11 Punga amo patasana tjinene, omambo woye opunga amaye ririre ko omungandjo; nomundu hapo ma munine po tjike mu wo? 12 Owaṋi ngu ma tjiwa kutja otjiṋa otjikeṋa tji tji ri otjiwa komundu moure womuinyo we omusupi mbu kapita otja otjizire? Owaṋi ngu ma sora okuserekarera omundu imbi mbi maavi katjitwa mouye mbwi kombunda yonḓiro ye?
© Herero Revision Bible © Bible Society in Namibia, 2021.
