Deuteronomium 9 - Herero Revision Bible (HRR)

Okuhazuva kwOvaisrael

1 “Puratena, tjiwaṋa tja Israel, ove ndino mo kondo onḓonḓu Jordan okukakambura ehi roviwaṋa ovinene novinamasa pove ri rire ouini woye. Ovihuro vyawo ovinene, nu vi notumbo tu twa vaza keyuru. 2 Ovandu votjiwaṋa ho ovare novanamasa; owo Ovaanakim mbu mo tjiwa omuini, nu mbu wa zuva amaku zu nai: ‘Owaṋi ngu ma sora okupirukira Ovanakim?’ 3 Ove nambano mo rimwine omuini kutja Muhona, Ndjambi woye, onguri ngwi ngu me ku hongorere tjimuna omuriro omusesete. Eye meve nyono ne ve susuparisa komurungu woye kutja u ve rambe nokuvenyona tjimanga otja Muhona pe ku kwizikira.

4 “Nu Muhona, Ndjambi woye, tje ve ramba komurungu woye, o rihungirire momutima woye no tja: ‘Muhona we ndji hitisa mehi ndi okurikambura ri rire ouini wandje mena rousemba wandje.’ Orondu mena rourunde woviwaṋa mbi Muhona opu me vi rambere komurungu woye. 5 Kakutja orondu tji u ri omuwa nu tji u tjita ousemba Muhona tji me ku hitisa mehi ravyo, u ri kambure okurira ouini woye. Eye me vi rambere ourunde wavyo, nokuyenenisa oruyano ndwa tjita kooiho mukururume Abraham na Isak na Jakob. 6 Otji mo sokuripura nawa kutja Muhona, Ndjambi woye, ke nakukupa ehi ndi ewa okurikambura ri rire ouini woye mena rousemba woye, tjinga au ri otjiwaṋa otjirangaranga.

7 “O zembi indu tji wa pindikisa Muhona, Ndjambi woye, mokuti onguza. Okuza keyuva, ndi wa za mOengipte, nga keyuva, ndi wa vaza ngunongwi, ove wa pirukira Muhona. 8 Nangarire kondundu Sinai mwa pindikisa Muhona nga eye tja vanga okumunyona. 9 Ami mba karondere kondundu okukakambura ovitjangero vyomawe vyomerikutiropamwe Muhona nga tjita puna eṋe. Ami mba kakara ngo oure womayuva nomauṱuku omirongo vine, nokuhinakurya nokuhinakunwa. 10 Muhona we ndji pa imbi ovitjangero vyomawe. Ku vyo Ndjambi wa tjangere ko neke re omuini omambo nga nga hungirire momuriro, indu tji mwa woronganene pondundu. 11 Kombunda yomayuva nomauṱuku omirongo vine Muhona we ndji pa ovitjangero mbi vivari vyomawe, okutja ovyo mbi vyomerikutiropamwe.

12 “Nu Muhona wa tja nai ku ami: ‘Sekama, u heruke tjimanga kondundu, orondu otjiwaṋa tjoye tji wa pitisa mOengipte tja tjiti ourunde. Otjo tja yepe tjimanga mondjira ami ndji mbe tji rakiza; nu tje rihamburire otjiserekarera tjotjisenginina.’

13 “Norukwao Muhona wa tja ku ami: ‘Ami mba munu otjiwaṋa hi, nu tara, otjo otjirangaranga. 14 Nambano ndji esa mbi tji yandeke, nu mbi zemise ena ratjo kehi yeyuru; nungwari ami me ku tjiti u karire otjiwaṋa otjinamasa notjingi pu tjo.’

15 “Tjazumba ami otji mba tanauka ne heruka kondundu, ngunda ambi novitjangero mbi vivari vyomerikutiropamwe momake wandje. Notururumo twomuriro aa tu yaka mondundu. 16 Ami mba muna kutja, tjiri, mwa tjita ourunde ku Muhona, Ndjambi weṋu; eṋe mwe rihamburira ondana ondume yotjisenginina; nu mwa yepa tjimanga mondjira Muhona ndje mu rakiza. 17 Otji mba kambura imbi ovitjangero vivari vyomawe ne vi nakaura, ne vi nyanyaurire momeho weṋu. 18 Tjazumba otji mba wa onḓurumika komurungu wa Muhona tjimuna otjikando ihi otjitenga, oure womayuva nomauṱuku omirongo vine; ami hi rire ovikurya, nu hi nwine omeva mena rourunde weṋu auhe mbu mwa tjita mokutataiza komurungu wa Muhona nokumupindikisa. 19 Orondu ami tjinga amba tira omazenge nomapindi Muhona nga ri na wo na eṋe nga tja vanga okumunyona. Nungwari Muhona otjikando hi we ndji zuvira. 20 Muhona wina wa pindikire tjinene na Aron nga tja vanga okumuzepa; nungwari ami mba kumbira Aron wina moruveze ndo. 21 Nu ami mba kambura otjiṋa hi tjouvi, indji ondana ondume, ndji mwa ungura, ne i yumbu momuriro. Mbe i nyanyaura ne i kweye nga tji ya rire orunguvize; norunguvize ndwi mbe ru yumba momupupo mbwaa u rauka kondundu.

22 “Nu mwa pindikisa Muhona wina mOtabera na mOmasa na mOkibrot-Hataawa. 23 Muhona tje mu hinda okuza mOkades-Barnea nomambo nga: ‘Twendeye nu mu kakambure ehi, ndi mbe mu pa ri rire ouini weṋu,’ mwa pirukira omarakiza wa Muhona, Ndjambi weṋu; eṋe kamu kamburire mu ye, nu kamu zuvire keraka re. 24 Okuza koruveze ndu mbe mu tjiwa eṋe mu pirukira Muhona.

25 “Ami otji mba wa onḓurumika komurungu wa Muhona oure womayuva nomauṱuku omirongo vine, Muhona tjinga a tanda okumunyona. 26 Ami mba kumba ku Muhona e tja: ‘Muhona Ndjambi, o nyono otjiwaṋa tjoye tji tji ri ouini woye, tji wa kutura nomasa woye omanene, nokutjipitisa neke roye enamasa mOengipte. 27 Rizemburuka novakarere voye ooAbraham na Isak na Jakob; o tara kourangaranga wotjiwaṋa hi, na kourunde na kouvi watjo. 28 Ovaengipte tjapo ngaave tja nai: “Muhona kaa sora okuhitisa otjiwaṋa hi mehi nde tji kwizikira. Eye we tji pitisa mokuti onguza okuketjizepera ngo, tjinga e tji nyengwa.” 29 Nungwari otjo otjiwaṋa tjoye nouini woye ove tji wa pitisa nomasa woye omanene nokuoko kwoye okutandavare.’ ”