Deuteronomium 30 - Herero Revision Bible (HRR)

Omayakuriro kombunda yondanaukiro

1 “Oviṋa mbi avihe, ondaya nosengiro, mbi mbe ku serekarerera, tji mavi ya kombanda yoye, nove tji we vi zemburuka nomutima woye mokati koviwaṋa avihe Muhona, Ndjambi woye, mu me ku rimbi, 2 nove nozondekurona zoye tji mamu ritanaura ku Muhona, Ndjambi weṋu, namu puratene keraka re nomitima vyeṋu avihe nominyo vyeṋu avihe otja pu me mu rakiza ndinondi, 3 Muhona, Ndjambi voye, ma virura oumba auhe nokukutjariparera; neye me ku woronganisa rukwao okuza moviwaṋa avihe me ku rimba. 4 Nandarire kutja wa rimbiwa nga kokure kovikoro vyehi, Muhona, Ndjambi woye, me kekuwonga ne kekueta okuza ngo. 5 Nu Muhona, Ndjambi woye, me ku eta rukwao mehi ooiho mukururume ndi va kambura otja ouini wawo ri rire ouini woye; neye me ku ṋingaparisa ne ku takavarisa komeho yooiho mukururume. 6 Muhona, Ndjambi woye, ma isa mo ourunde momutima woye nowozondekurona zoye kutja u suvere Muhona, Ndjambi woye, nomutima woye auhe nomuinyo woye auhe, nu u kare nomuinyo. 7 Nu Muhona, Ndjambi woye, ma tjiti kutja ozosengiro azehe nḓa ze wire kombanda yovanavita na ove na kombanda yaimba mbe ku tonda nokukutjera. 8 Nungwari ove mo puratene keraka ra Muhona rukwao, nokutjita omatwako we aehe ngu mbe ku rakiza ndinondi. 9 Nu Muhona, Ndjambi woye, me ku ṋingaparisa mu avihe mbi mo tjiti, okutja omorukwato rwezumo ranyoko, na morukwato rwovinamuinyo vyoye, na movihape vyehi roye romakunino; orondu Muhona ma kara nenyando na ove otja punga a ri nenyando nooiho mukururume. 10 Muhona, Ndjambi woye, ma tjiti nao tji wa puratene keraka re nokuṱakamisa omatwako nomazikamisiro we aehe nga tjangwa membo ndi romatwako. Nove ritanaura ku ye nomutima woye auhe, nomuinyo woye auhe.

11 “Etwako, ndi me ku rakiza ndinondi, kazeu kove nu kari ri kokure. 12 Oro kari ri meyuru kutja motja: ‘Owaṋi ngu me tu rondere keyuru nokuketupahera ro, nokutuzuvisa ro kutja tu sore okuvitjita?’ 13 Oro wina kari ri munda mbwina yomuronga kutja motja: ‘Owaṋi ngu me tu kondere munda mbwina yokuvare okuketuetera ro kutja tu ri zuve nu tu kare nonḓuviro ku ro?’ 14 Ayee, kako, embo kove ri ri popezu tjinene, ove u na ro motjinyo tjoye na momutima woye; nambano kara nonḓuviro ku ro.

15 “Tara, ami ndinondi me ku pe okuritoororera ouṋingandu nomuinyo woye poo onḓiro nouhumandu. 16 Ihi ami tji me ku rakiza ndinondi okongwi okusuvera Muhona, Ndjambi woye, nokuryanga mozondjira ze, nokuṱakamisa omatwako nomazikamisiro nomaraerero we kutja u kare nomuinyo nu u takavere, nu Muhona, Ndjambi woye, e ku sere ondaya mehi ndi ove ku mo i okukerikambura ri rire ouini woye. 17 Nungwari omutima woye tji wa yepe, nu o ha puratene no pukisiwa, kokutja u rikotamene koomukuru varwe nokuvekarera, 18 otji me mu zuvarisire ndinondi kutja, tjiri, mamu koka; kamu nokuhupa orure mehi, ndi ri munda mbwina na Jordan ku mamu i okukerikambura ri rire ouini weṋu. 19 Ami ndinondi me isana eyuru nehi kutja vi hongonone eṋe; omuinyo nonḓiro, nondaya nosengiro ami mbe mu raisira. Ritoororera omuinyo ove nozondekurona zoye kutja mu hupe. 20 Suvera Muhona, Ndjambi woye, puratena keraka re, nu panḓera pu ye, ove nozondekurona zoye kutja mu kare nomuinyo orure mehi Muhona nda kwizikira ooiho mukururume Abraham na Isak na Jakob noruyano okuriyandja ku wo.”