Ovaisrael mave huura ombara Og
(Num 21:31-35)1 “Kombunda yanao otji twa kumuka natu twara ondjira yokuyenda kObasan; nu Og, ombara ya Basan, notjiwaṋa tje atjihe va pita okututjakanena, nave tu rwisire mOedrei. 2 Nu Muhona wa tja nai ku ami: ‘O mu tira! Ami tjinga ame mu yandja puna otjiwaṋa tje atjihe nehi re arihe mouvara woye. Nu tjita ku ye tjimuna tji wa tjitire ku Sihon, ombara yOvaamori, ngwa turire mOhesbon.’
3 “Nu Muhona, Ndjambi wetu, wina wa yandja Og, ombara ya Basan, notjiwaṋa tje atjihe mouvara wetu; neṱe twe mu havera nga tji pe ha ningire omundu ngwa taura. 4 Moruveze tjingero ndo twa kambura ovihuro vye avihe; nu kapa ri otjiṱunga tji tu ha kamburire ku ye, okutja ovihuro omirongo hamboumwe, norukondwa aruhe rwehi ra Argob, mouhona wa Og mObasan. 5 Ovihuro avihe mbi vya zeuparisirwe notumbo otutongame, nomivero ominene, novipate, nu posi yaimbyo pa ri ovihuro vyarwe, mbi ha ri notumbo. 6 Neṱe twe vi nyona otja tji twa tjita ku Sihon, ombara ya Hesbon, indu tji twa nyona ovihuro avihe, natu zepa ovarumendu novakazendu novanatje. 7 Nungwari ovinamuinyo avihe novihuro twe vi huura.
8 “Moruveze ndo otji twa kambura ehi rozombara nḓa mbari zOvaamori, mukuma mbuno wa Jordan, okuza konḓonḓu Arnon nga konḓonḓu Hermon. 9 Ondundu Hermon Ovasidoni ve i isana kutja Sirjon; nungwari imba Ovaamori ve i isana kutja Senir. 10 Nu wina twa kambura ovihuro avihe vyorutjandja, na Gilead arihe, na Basan arihe nga kOsalka na Edrei, imbi ovihuro vyouhona wa Og mObasan.”
11 Orondu Og, ombara ya Basan, ongwa hupire erike mOvarefai. Otjipirangi tjorurova rwe tja ri otjotjitenda, nu tja ri noure wozometa ine, nouparanga wozometa mbari. Otja tji pe tjiukwa otjipirangi hi nga mba tji ri mOraba, otjihuro tjOvaamoni.
Omihoko mbya turire komuhuka wa Jordan
(Num 32:1-42)12 “Moruveze ndo twa kambura ehi ndi ri rire ouini wetu, okutja okuza kOaroer, tji tji ri ponḓonḓu Arnon, norukondwa rwehi rozondundu ra Gilead puna ovihuro vyaro; ehi arihe ndi ondi mba yandja kOvaruben na kOvagad. 13 Notjihupe tjehi ra Gilead puna Basan arihe nda ri ouhona wa Og, mba yandja korumbembera romuhoko wa Manasse, okutja ehi arihe ra Argob.”
Indi Basan arihe ri isanewa kutja ehi rOvarefai. 14 Jair, omuzandu wa Manasse, wa kambura ehi arihe ra Argob nga komukuro wehi ra Argob nga komukuro wehi rOvagesuri norOvamaaka; novirongo mbi we vi rukira mena re a tja: “Ovirongo vya Jair,” nga ku ndinondi.
15 “Nu ku Makir mba yandja ko ehi ra Gilead. 16 Nu komuhoko wa Ruben nowa Gad mba yandja ko ehi okuza kOgilead nga konḓonḓu Arnon. Omuruko wa ri mokati konḓonḓu ndji, nga konḓonḓu Jabok, ndji ri omuruko wehi rOvaamoni. 17 Wina mba yandja orutjandja Araba nonḓonḓu Jordan puna ehi rayo ku wo, okuza kOmuronga wa Galilea nga kOmuronga wOmongwa, komiṱurukira vyondundu Pisga, kuṱa komuhuka.
18 “Moruveze tjingero ndo otji mbe ve pa omarakiza nga ne tja: ‘Muhona, Ndjambi weṋu, we mu pe ehi ndi ri rire ouini weṋu; ovarumendu omapenda avehe ngave ripangaṋe novirwise mu konde onḓonḓu Jordan amamu hongorere momuhoko weṋu imba Ovaisrael. 19 Posi yovakazendu novanatje veṋu novinamuinyo porwavyo, me tjiwa uri kutja mu novinamuinyo ovingi, ngavi kare movihuro vyeṋu, mbi mbe mu pa. 20 Muhona tja yandja ohange komuhoko weṋu tjimuna tja tjita ku eṋe, nowo tji va kambura ehi ndi otja ouini wawo, Muhona, Ndjambi weṋu, ndi meve pe munda mbwina na Jordan, yarukeye auhe kouini we mbu mbe mu pa.’
21 “Nu wina mba rakizire ku Josua moruveze ndo, ne tja: ‘Ove wa muna nomeho woye omuini avihe Muhona, Ndjambi weṋu, mbya tjita kozombara nḓa mbari ooSihon na Og. Muhona opunga ama tjiti komauhona warwe aehe ku mo tjindire. 22 Amu tira, Muhona, Ndjambi weṋu, tjinga ame mu rwire po.’
Moses ke nokuyandjerwa okuhita mehi ra Kanaan
23 “Moruveze ndo mbe riyarikaṋa ku Muhona e tja: 24 ‘Muhona Ndjambi, me tjiwa kutja ove wa raisire omukarere woye omautiro wounene woye na wina eke roye enemasa. Omukuru uṋe nguri meyuru poo kombanda yehi ngu nomasa okutjita oviungura ovinamasa otja ove. 25 Arikana, ndji esa mbi kakonde nokukamuna ehi ehapise ewa, ndi ri munda mbwina na Jordan, indi ehi rovivanda nozondundu za Libanon.’
26 “Nungwari Muhona wa ṱomazenge na ami mena reṋu ne he ndji zuvire; neye wa tja nai ku ami: ‘Nga rire opuwo! O hungire na ami otjiṋa hi rukwao! 27 Karonde kondomba yondundu Pisga, nu kayevayeve kongurova na keyuva kokunene na keyuva kokumuho na komuhuka, nu u tare nawa; orondu ove tjinga au hi nokuyenena okukonda onḓonḓu ndji Jordan. 28 Rakiza ku Josua okuyenda, mu vanḓiparisa nu mu zeuparisa, eye tjinga e ri ngu ma hongorere otjiwaṋa hi, nu e ri ngu meve pe ehi ndi ndi mo munu.’
29 “Neṱe otji twa kara motjana tji tja ri ouhunga notjirongo Bet-Peor.
© Herero Revision Bible © Bible Society in Namibia, 2021.
