Deuteronomium 28 - Herero Revision Bible (HRR)

Ozondaya zOnḓuviro

1 “Tji mo puratene nawa keraka ra Muhona, Ndjambi woye, noṱakamisa nawa omatwako we aehe ngu me ku rakiza ndinondi, Muhona, Ndjambi woye, otji me ku tongamisa kombanda yoviwaṋa avihe, mbi ri kombanda yehi. 2 Tji mo puratene keraka ra Muhona, Ndjambi woye, ozondaya azehe nḓa maze rire ozoye:

3 “Muhona ma sere otjihuro tjoye nehi romakunino woye ondaya.

4 “Muhona me ku sere ondaya norukwato orungi, novihape ovingi, nozongombe nozongombo ozengi.

5 “Muhona ma sere ondaya kovihape na kovikurya vyoye.

6 “Muhona ma sere ondaya ku avihe mbi mo tjiti.

7 “Muhona ma havere ovanavita na ove tji mave ku rwisa. Owo mave ku rwisa okuzira mukuma umwe, nungwari mave taura komurungu woye okuhungama komikuma pekepeke.

8 “Muhona ma sere ondaya kovipwikiro vyoye, na ku avihe mbi mo ungura. Neye me ku sere ondaya mehi Muhona, Ndjambi woye, ndi me ku pe.

9 “Tji mo ṱakamisa omatwako wa Muhona, Ndjambi woye, nokuryanga mozondjira ze, eye me ku tjiti u rire otjiwaṋa tje otjiyapuke otja pe ku yanena. 10 Noviwaṋa avihe, mbi ri kombanda yehi mavi munu kutja Muhona we ku toorora kutja u rire otjiwaṋa tje omuini, novyo mavi ku tira. 11 Muhona me ku pe ovanatje ovengi, nozongombe ozengi, novihape ovingi mbi mavi takavara mehi eye nda kwizikira ooiho mukururume kutja me ku pe. 12 Muhona me ku rokisire ombura moruveze orusemba, okuza mondjuwo ye yomapwikiro wovihuze meyuru, na sere ondaya koviungura vyoye avihe kutja u kare noviṋa okuyazemisa koviwaṋa ovingi, nungwari ove o ha hepa okukayazema otjiṋa ku vyo. 13 Muhona me ku tjiti kutja u rire omunane mokati koviwaṋa, nu a ha rire omukarere; ove aruhe mo kara nouṋingandu, nu ko nakuhepauka tji mo ṱakamisa nawa nokukara nonḓuviro komatwako wa Muhona, Ndjambi woye, ngu me ku rakiza ndinondi nokuyetjita. 14 Ko nakusokukara nokuhinonḓuviro kuwo momuano auhe ngamwa, poo okurikotamena nokukarera oomukuru vovisenginina.

Ozosengiro zOkuhinonḓuviro

(Lev 26:14-46)

15 “Nungwari tji u hi nokukara nonḓuviro ku Muhona, Ndjambi woye, nu tji u hi nokuṱakamisa nawa omatwako we aehe, nomazikamisiro we ngu mbe ku rakiza ndinondi, ozosengiro azehe nḓa maze ya kombanda yoye:

16 “Muhona ma sengi ovihuro vyoye nehi romakunino woye.

17 “Muhona ma sengi ovihape vyoye novikurya mbi mo isa mu vyo.

18 “Muhona me ku sengi mokuhinakukupa ovanatje ovengi, novihape ovingi, nozongombe nozonḓu ozengi.

19 “Muhona ma sengi avihe mbi mo tjiti.

20 “Tji wa tjiti ouvi no isa Muhona, eye me ku hindire osengiro, nomapurukiro, noviwonga mu avihe mbi mo tjiti ngandu tji wa nyonwa tjimanga okumanuka. 21 Muhona me ku hindire omutjise omunene mbu mau ku seseta ngandu tji pe hi nokuhupa umwe mehi ndi ku mo i okukerikambura ri rire ouini woye. 22 Muhona me ku vere tjinene nomutjise womapunga, notjindjumba, notjindjumba tjoupyu, nohoko, nourumbu, nomitjise novihape, novyo mavi ku kongorere nga tji wa koka. 23 Ombura kai nakuroka, nehi mari rire ekukutu tjimuna otjitenda. 24 Moruveze rwokurokisa ombura Muhona ma hindi ovivepo vyoruuma novyeheke nga tji wa yandekwa.

25 “Muhona ma tjiti ovanavita na ove kutja ve ku havere. Ove mo ve rwisire komukuma umwe, nungwari mo taura komurungu wawo momikuma avihe. Novandu avehe kombanda yehi mave tira tji va munu imbi mbi mavi tjitwa kove. 26 Omitundu vyeṋu mavi riwa i ozonḓera novipuka vyokuti, nu kape na ngu me vi tirisa. 27 Muhona, me ku vere novirwaro vya Engipte, nomisuro notjikoroha neyaze mbi hi nokusora okuveruka. 28 Muhona me ku verisa oviyoze ne ku poṱuparisa ne ku zunganisa mombepo. 29 Ove mo vyavyanga mutenya tjimuna omupoṱu tje vyavyanga monḓorera, nu ko nokuṋingapara mu atjihe tji mo tjiti. Aruhe mo ṋiṋikiziwa nokupundwa, nu kape na umwe ngu me ku vatere.

30 “Mo vareke omukazendu, nungwari warwe ma rara pu ye; mo tungu ondjuwo, nu komoo tura mo; mo kunu omuvite, nu ovihape vyawo komoo ri. 31 Ongombe yoye mai ṱire momeho woye, nungwari onyama yayo ko nakurya; okasino koye make pundirwa momeho woye, nu ko nakukotorerwa; ozonyanda zoye maze yandjewa kovanavita na ove, nu kape na ngu me ku vatere.

32 “Ovazandu novakazona voye mave yandjewa momake wotjiwaṋa tjarwe ngunda amo tarere; nu mo ve zeri eyuva arihe, nu ko notjiṋa tji mo tjiti. 33 Ovihape vyehi roye romakunino nondjambi aihe yoviungura vyoye mavi riwa i otjiwaṋa tji u hi nokutjiwa; aruhe mo ṋiṋikiziwa nu mo tatumisiwa noutwe. 34 Mo vere oviyoze mena raimbi avihe mbi mo munu nomeho woye. 35 Muhona ma verisa orutu rwoye aruhe novirwaro ovizeu, mbi hi nokusora okuveruka.

36 “Muhona ma hindi ove nombara, ndji mo ziki kombanda yoye, kotjiwaṋa ove nooiho mukururume tji mu hi na mwe tji tjivirwe; nu ingo mo kakarera oomukuru vovisenginina mba ungurwa pomiti na pomawe. 37 Ove mo karira otjiwaṋa tjomburuma notjinyekererwa mokati koviwaṋa avihe Muhona me ku rimba.

38 “Ove mo kunu ozondwi ozengi, nungwari mo kondo ouṱiṱi, ozombahu tjinga amaze ri ovikunwa. 39 Ove mo kunu omivite nokuviungura, nungwari komoo nu omavinu wavyo poo okuyepwika, omativa tjinga amaye ri omandjembere. 40 Omiti vyomiṋinga mavi hapa ngamwa apehe mehi roye, nungwari ko nokumuna omaze womiṋinga okurivava, ozoṋinga tjinga amaze wire pehi. 41 Ove mo kara novanatje ovazandu novakazona, nungwari kave nokurira ovoye, owo tjinga amave huurwa. 42 Omiti novihape vyehi roye romakunino avihe mavi nyonwa i ozombahu.

43 “Owozonganda ngu tura pove, ma rire omunanḓengu tjinene kombanda yoye, nove mo huhunuka kehi tjinene. 44 Eye ma kara notjimariva okukuyazema, nungwari ove ko nokukara notjimariva okumuyazema; neye ma honapara kombanda yoye.

45 “Ozosengiro azehe nḓa maze ku teza naze ku vaza nga tji wa yandekwa, tjinga au ha karere nonḓuviro ku Muhona, Ndjambi woye, nokuṱakamisa nawa omatwako nomazikamisiro we nge ku rakiza. 46 Nozo maze rire oviraisiro noviṋa ovihimise kove na kozondekurona zoye nga ko nga aruhe. 47 Muhona, Ndjambi woye, we ku sera ondaya mu avihe, nungwari ove ko vangere okumukarera nenyando nomutima wondjoroka. 48 Komuhingo mbwi otji mo karere ovanavita na ove Muhona mbu ma hindi kove amo ṱondjara nonyota nomuzu nouhepe mu avihe. Ovanavita na ove mave ku ṋiṋikiza noutwe ngandu tji ve ku yandeke. 49 Muhona me ku hindire otjiwaṋa okuza kokure, komayandero wehi tjeraka ndi u hi nokutjiwa. Otjo matji wirire kombanda yoye tjimuna onguvi. 50 Otjo matji kara otjikukutu, nokuhinandengero nomukurundu, nokuhinandjenda nokanatje. 51 Owo mave ri ovinamuinyo vyoye, novihape vyehi roye romakunino nga tji wa ṱondjara. Owo kave nakukusera po otjikokotwa na tjimwe poo omavinu poo omaze womiṋinga poo ozongombe poo ozonyanda nga tji wa koka. 52 Owo mave ku rwisire movirongo vyoye avihe mehi Muhona, Ndjambi woye, ndi me ku pe, notumbo twoye otutonga notunamasa mu we riyameka matu wire pehi.

53 “Ovanavita na ove tji ve ku kovere movirongo vyoye, mo hepa ovikurya nga tji mo ri ovanatje voye Muhona, Ndjambi woye, mbe ku pa. 54 Nandarire omurumendu ngwa iririra evyaro nehambaneno, ngu ri puna ove, ma tara nonyengo komuangu na komukazendu we ngwa suvera, na kovanatje ve mba sewa na wo. 55 Eye ke nokuvepa ko onyama yovanatje ve ndji ma ri, tjinga e hi notjikurya tjarwe mokukoverwa na mombamisiro, orondu omunavita na ye me mu koverere movirongo vye avihe. 56 Nandarire omukazendu ngwa iririra evyaro nehambaneno, ngu ri puna ove, nu ngu hi na wa ryangere mena routumbe we, ma tara nonyengo komurumendu we ngwa suvera, na kovanatje ve, 57 na wina kokanatje ku ka pandukwa nambano nai, na ku ihi otjiṋa tjokombunda yombandukiro, ovanavita na ye tji va kovere ovirongo vye, eye ma hepa ovikurya tjinene nai nga tji ma ri mongumumu inga okanatje ke ka panduka nambano nai, na ihi otjiṋa tjokombunda yombandukiro wina.

58 “Ṱakamisa nawa inga omambo aehe womatwako, nga tjangwa membo ndi, u yozike ena ehimise netirise ra Muhona, Ndjambi woye. 59 Tji u hi nokutjita nao, Muhona ma hindire ove nozondekurona zoye omitjise omihaveruka, noviwonga mbi hi na maavi yanda. 60 Eye me ku etere rukwao omitjise omiyaukise avihe, mbi wa muna mOengipte, nove komoo veruka. 61 Muhona wina me ku etere omitjise noviwonga pekepeke mbi ha tjangerwe membo romatwako nga, nga ove tji wa yandekwa. 62 Nandarire kutja mwa takavara tjimuna ozonyose keyuru mape hupu otjivaro otjiṱiṱi ku eṋe, tjinga amu ha puratenene keraka ra Muhona, Ndjambi weṋu. 63 Otja Muhona punga a ri nenyando okumutjitira ouwa nokumutakavarisa opunga ama kara nenyando okumunyona nokumuyandeka. Eṋe mamu zukurwa mehi ku mamu i okukerikambura ri rire ouini weṋu.

64 “Nu Muhona me ku rimbi mokati koviwaṋa avihe, okuza kotjikoro tjimwe nga kotjikoro tjarwe tjehi; nu ingo oku mo kakarera oomukuru vovisenginina, mba ungurwa pomiti na pomawe, ove nooiho mukururume mbu mu hi na indu mwe ve tjivirwe. 65 Nu mokati koviwaṋa mbi komoo kara nohange, nu komoo kara nopoṋa poye omuini; nungwari Muhona me ku pe omutima wekurungo, nomeho wonḓero, nomerihahiziro womuinyo. 66 Omuinyo woye aruhe mau kara moumba, nu mo kara nondiriro ouṱuku nomutenya, nomuinyo woye kau nokukara mouyara. 67 Omuhuka motja: ‘Andakuzu a ri ongurova!’ Nongurova motja: ‘Andakuzu a ri omuhuka!’ mena romutima woye mbwa kamburwa i omburuma, na mena roviṋa ovihimise mbi mo munu. 68 Nu Muhona me ku yarura kOengipte mozondjuwozomomeva mondjira, ndji mbe ku raera nai: ‘Ove ko nakuimuna rukwao komurungu,’ nu koṋa ngo mamu kakondja okurirandisa kovanavita na eṋe otja ovakarere ovarumendu novakazendu, nungwari kape nokukara omumurande.”