Omatwako wa Ndjambi ya tjangwa komawe
1 Nu Moses puna ovanane vOvaisrael va rakiza nai kotjiwaṋa: “Kareye nonḓuviro komatwako aehe ngu me mu rakiza ndinondi. 2 Meyuva, ndi mamu kakonda onḓonḓu Jordan nokukahita mehi Muhona, Ndjambi weṋu, ndi me mu pe, rizikireye omawe omanene, nu ye hweye nomunoko omuvapa. 3 Nu tji wa zu nokukakonda komukuma mbwina okukahita mehi Muhona, Ndjambi woye, ndi me ku pe, ehi nde ura nomaihi nouitji wokuti, otja Muhona, Ndjambi wooiho mukurume, pe ku kwizikira, nu katjange inga omambo aehe womatwako komawe omanene nga. 4 Tji mwa kakonda Jordan, kazikeye omawe nga kondundu Ebal otja pu me mu rakiza ndinondi, nu keyehweye nomunoko omuvapa. 5 Nu koṋa ngo ove katungire Muhona, Ndjambi woye, otjipunguhiro tjomawe ngu u hi nakuhonga notjiungure tjotjitenda. 6 Tunga otjipunguhire tja Muhona, Ndjambi woye, pomawe nge ha kerwe; punguhira Muhona, Ndjambi woye, ozombunguhiro ozoningiririsiwa ku tjo. 7 Wina punguhira ko ozombunguhiro zokutja okuhepa, u rye nokuyoroka komurungu wa Muhona, Ndjambi woye. 8 Komawe nga tjanga ko omambo womatwako nga nawa ongahukiro.”
9 Tjazumba Moses puna ovapristeri Ovalevi va hungira kotjiwaṋa atjihe tja Israel ave tja: “Mwineye nu purateneye, Vaisrael! Ndino eṋe mwa rire otjiwaṋa tja Muhona, Ndjambi weṋu. 10 Otji mo sokupuratena keraka ra Muhona, Ndjambi woye, nokuṱakamisa omatwako nomazikamisiro we ngu me ku rakiza ndinondi.”
11 Meyuva tjingero Moses wa rakiza kotjiwaṋa a tja: 12 “Tji mwa zu nokukonda onḓonḓu Jordan, omihoko mbi ngavi kakurame kondundu Garisim vi sere otjiwaṋa ondaya, okutja omuhoko wa Simeon nowa Levi nowa Juda nowa Isakar nowa Josef nowa Benjamin. 13 Nomihoko mbi ngavi kakurame kondundu Ebal vi kasenge, okutja omuhoko wa Ruben nowa Gad nowa Sebulon nowa Dan nowa Naftali.
Omambo omurongo na yevari wosengiro
14 “Novalevi ngave ravaere omambo nga neraka romasa kOvaisrael avehe.
15 “ ‘Nga sengwe ngamwa auhe ngu ma ungura otjiserekarera tji tja hongwa poo tji tja hamburwa, otjiyaukise ku Muhona, otjiungura tjomake wonongo, nu ngu tji zikamisa mongumumu!’ Notjiwaṋa atjihe ngatji zire tji tje: ‘Amen.’
16 “ ‘Nga sengwe ngamwa auhe ngu ma nyengura ihe poo ina!’ Notjiwaṋa atjihe ngatji zire tji tje: ‘Amen.’
17 “ ‘Nga sengwe ngamwa auhe ngu ma rundurura omuruko wopopezu na ye!’ Notjiwaṋa atjihe ngatji zire tji tje: ‘Amen.’
18 “ ‘Nga sengwe ngamwa auhe ngu ma pukisa omupoṱu mondjira!’ Notjiwaṋa atjihe ngatji zire tji tje: ‘Amen.’
19 “ ‘Nga sengwe ngamwa auhe ngu ma rundurura ousemba wozonganda nowozosewa nowovahepundu!’ Notjiwaṋa atjihe ngatji zire tji tje: ‘Amen.’
20 “ ‘Nga sengwe ngamwa auhe ngu ma rara pomukazendu wa ihe, orondu mokutjita nao wa yamburura ihe!’ Notjiwaṋa atjihe ngatji zire tji tje: ‘Amen.’
21 “ ‘Nga sengwe ngamwa auhe ngu ma tunduka kotjinamuinyo!’ Notjiwaṋa atjihe ngatji zire tji tje: ‘Amen.’
22 “ ‘Nga sengwe ngamwa auhe ngu ma rara pomuṱena, omuatje wa ihe poo waina!’ Notjiwaṋa atjihe ngatji zire tji tje: ‘Amen.’
23 “ ‘Nga sengwe ngamwa auhe ngu ma rara pu ina yomukazendu we!’ Notjiwaṋa atjihe ngatji zire tji tje: ‘Amen.’
24 “ ‘Nga sengwe ngamwa auhe ngu ma zepa owopopezu na ye mongumumu!’ Notjiwaṋa atjihe ngatji zire tji tje: ‘Amen.’
25 “ ‘Nga sengwe ngamwa auhe ngu ma kambura otjimariva tjombopero kutja a zepe omundu omuhinandjo!’ Notjiwaṋa atjihe ngatji zire tji tje: ‘Amen.’
26 “ ‘Nga sengwe ngamwa auhe ngu hi nokuṱakamisa omambo womatwako nga nokuyetjita!’ Notjiwaṋa atjihe ngatji zire tji tje: ‘Amen.’
© Herero Revision Bible © Bible Society in Namibia, 2021.
