Nebukadnesar ma rakiza kutja omundu auhe e rikotamene kotjiserekarera tjomundu tjongoldo
1 Ombara Nebukadnesar wa ungurisire otjiserekarera tjomundu tjongoldo tjoutonga wozometa omirongo vivari na hambombari nouparanga wozometa mangara ndatu; neye we tji zikire morutjandja rwa Dura morukondwa rwotjihuro Babilon. 2 Ombara ya yandja omarakiza kovahongore vayo avehe kutja ve worongane, okutja ovaingona nozongooneya, novanane ozohongora vokehi noviuru, novawonge vovimariva novapangure ovanene novokehi, novaungure avehe votukondwa twouhona. Owo va sere okukara po pomanyando womazikiro wotjiserekarera tjomundu ngwi tji tja zikirwe i ombara Nebukadnesar. 3 Ovahongore avehe mba tji va woronganena omazikiro nga nu tji va kurama momurungu wotjiserekarera tjomundu hi, 4 omuravaere otja tjivisa neraka enene na tja: “Vandu voviwaṋa novomihoko avihe novomaraka aehe! 5 Eṋe mamu zuu ombosiro yozohiva novanyande vozonya novozohiva novovinangoma noyoviharpe; nu tjazumba ovinangoma avihe vyarwe mavi posire mumwe. Mokamanga omaimburiro tji ya utu, eṋe mamu ripete namu rikotamene kotjiserekarera tjomundu tjongoldo tji tja zikwa i ombara Nebukadnesar. 6 Omundu ngamwa auhe ngu hi nokuwa onḓurumika nokurikotamena ku tjo ma yumbwa tjimanga mezuko romuriro.” 7 Nu komuhingo mbwi mokamanga tji va zuu ombosiro yovinangoma, ovandu voviwaṋa novomihoko avihe novomaraka aehe va wa onḓurumika nave rikotamene kotjiserekarera tjomundu tjongoldo tji tja zikirwe i ombara Nebukadnesar.
Omapanga wa Daniel yetatu maye pewa ondjo yokuhinanḓuviro
8 Moruveze tjingero ndo Ovababilon tjiva va horora Ovajuda movineya. 9 Owo va tja nai kombara Nebukadnesar: “omuhona ombara nga hupe orure! 10 Omuhona ombara wa rakiza kutja kamanga ombosiro yovinangoma tji ya utwa, omundu auhe nga we onḓurumika nu me rikotamene kotjiserekarera tjongoldo, 11 nokutja auhe ngu hi nokutjita nao ma yumbwa mezuko romuriro. 12 Pe nOvajuda tjiva mbu wa twa mokutjevera orukondwa rwotjihuro Babilon, ooSadrak na Mesak na Abed-Nego mbe hi nonḓuviro komarakiza woye, muhona ombara. Owo kave rikotamene komukuru woye, nu kave u onḓurumika kotjiserekarera tjongoldo tji wa zika.”
13 Komuhingo mbwi ombara ya ṱomazenge tjinene nai rakiza kutja ovarumendu vetatu mba ve etwe komurungu wayo. 14 Ombara ya tja nai ku wo: “Sadrak na Mesak na Abed-Nego, ouatjiri kutja eṋe mamu panḓa okurikotamena komukuru wandje nokuwa onḓurumika kotjiserekarera tjongoldo tji mba zika are? 15 Nambano mokamanga tji mwa zuu ombosiro yozohiva nozonya noviharpe novinangoma avihe vyarwe, wee onḓurumika nu mu rikotamene kotjiserekarera. Tji mu hi nokutjita nao mamu yumbwa tjimanga mezuko romuriro. Mamu tjangovasi pe nomukuru ngamwa ngu ma sora okumuyama momake wandje are?”
16 Sadrak na Mesak na Abed-Nego va zira ombara ave tja: “Muhona ombara, eṱe katu nakuhepa okuriyeura oveni. 17 Ndjambi ngu tu karera tji ma vanga okutuyama mezuko romuriro na kouvara woye, eye me tu yama. 18 Nungwari eye nanda ha tjitire nao, omuhona ombara nga tjiwe kutja, tjiri, eṱe kamaatu rikotamene komukuru woye, nu kamaatu u onḓurumika kotjiserekarera tjongoldo tji wa zika.”
Omapanga wa Daniel yetatu maye verwa kokuṱa
19 Nebukadnesar wa pindikira ko tjinene, neye wa tivaurisa omurungu we kooSadrak na Mesak na Abed-Nego. Eye otja rakiza kovarumendu ve kutja ve rundise ezuko potuhambombari komurungu waindu tji u kara aruhe. 20 Wina wa rakiza kutja ovarumendu ovanamasa tjinene votjimbumba tje tjovita ve pandeke ovarumendu vetatu mba nu ve ve yumbe mezuko romuriro. 21 Owo otji ve ve pandeka ngunda ave nozombanda azehe, okutja ozohema notupera nozonḓuru, nave ve yumbu mezuko romuriro. 22 Nambano ombara tjinga aya yandja omarakiza omazeu kutja ezuko ri rundisiwe tjinene, otururumo otjinga atwa nyosa ovatjevere mba twara ovarumendu vetatu mba kezuko. 23 Sadrak na Mesak na Abed-Nego ngunda ava pandekwa otji va wira mokati komuriro mbu mau ruruma.
24 Mokamanga Nebukadnesar wa sekama a kumwa na pura kovahongore ve a tja: “Katu pandekere ovarumendu vetatu mba nokuveyumba mezuko romuriro are?”
Owo va zira ave tja: “Ii, otji twa tjiti nao, muhona ombara.”
25 Nombara ya pura nai: “Okutjavi tji me munu ovarumendu vane mbu mave ryanga momuriro? Owo kave pandekerwe, nu kave nakumunika aayo mave hihamwa, nu ingwi outjaine ma munika otja omukuru.”
Ovarumendu vetatu mba mave kuturwa nave yerwa
26 Nebukadnesar otja ya komuvero wezuko romuriro na kaisana nai: “Sadrak! Mesak! Abed-Nego! Vakarere va Ndjambi wOkombandambanda! Piteye!” Nowo otji va pita tjimanga. 27 Ovaingona nozongooneya novanane ozohongora vokehi novaungure avehe vombara va worongana okumuna ovarumendu vetatu mba, ku ku ha ṱunine omuriro; ozondjise zawo kaze vaukire, nozombanda zawo kaze ningirire, nowo kaave ṋuka omuise womuriro.
28 Ombara ya tja nai: “Nga hivirikwe Ndjambi wooSadrak na Mesak na Abed-Nego! Eye wa hinda omuengeri we nu wa yama ovarumendu mba mbe mu karera nokuriyameka ku ye. Owo kave karere nonḓuviro komarakiza wandje, nu va yandja ominyo vyawo kokuṱa komurungu wokuwa onḓurumika nokurikotamena komukuru ngamwa auhe posi ya Ndjambi wawo oveni.
29 “Nu nambano ami me rakiza kutja omundu ngamwa auhe woviwaṋa nomihoko avihe nowomaraka aehe ngu ma yamburura Ndjambi wooSadrak na Mesak na Abed-Nego ma porwa oviṋepo pekepeke, nondjuwo ye mai tjitwa otjitambatundu. Kape nomukuru warwe ngu yama otja ingwi.”
30 Nombara ya yera Sadrak na Mesak na Abed-Nego nai ve pe oviungura vyokombanda morukondwa rwehi ra Babilon.
© Herero Revision Bible © Bible Society in Namibia, 2021.
