Amos 3 - Herero Revision Bible (HRR)

1 Tjiwaṋa tja Israel, purateneye kembo ndi Muhona nda hungira ku eṋe, omuhoko weṋu auhe eye mbwa pitisire mOengipte; oro mari tja nai: 2 “Eṋe, oweṋe porweṋu mbu mba toororwa momihoko avihe mbi ri kombanda yehi. Ami opu me zu okumuverera omauvi weṋu aehe.”

Omuprofete ma ṋiṋikiziwa ma hungire

3 Ovandu vevari ve kayenda pamwe ngunda rutenga ave hiya zuvasana are?

4 Ongeyama i tya ovimboro motjihwa ngunda rutenga ai hiya muna otjiṋa tji mai zepa are?

Ongeyama omutanda i wenena mondimba yayo ngunda ai hiya kambura otjiṋa are?

5 Onḓera i patwa mongwehe ngunda aku hiya tuwa ko otjikurya kongwehe are?

Ongwehe i patuka oini ngunda ape hi notjiṋa tji matji i patura are?

6 Ohiva yovita i posisiwa motjihuro nai ha urumisa ovandu are?

Otjiwonga tji ya motjihuro ndoovazu ka Muhona ngwe tji hindi are?

7 Tjiri, Muhona Ndjambi ka tjiti otjiṋa ngunda rutenga e hiya tjivisa ombango ye kovakarere ve, imba ovaprofete.

8 Ongeyama tji ya tye ovimboro owaṋi ngu hi nokutira?

Muhona Ndjambi tja hungire owaṋi ngu hi nokuzuvarisa ombuze ye?

Samaria mari pangurwa

9 Muhona wa raera Amos kutja a tjivise nai ku imba mba tura mozondjuwo zouhona za Asdod noza Engipte: “Woronganeneye kozondundu za Samaria nu mu mune omazunganeno, nga handja motjihuro ho, noṋiṋikizire, ndji ri mu tjo!”

10 Muhona ma tja nai: “Ovandu mba ve urisa ozondjuwo zawo novihuze mbi ve punda mozonḓepero noutwe; kave tjiwa okutjita ousemba. 11 Omunavita otji ma kovere ehi rawo, a haṋa oviṱunga vyawo ovinamasa na pundu ozondjuwo zawo.”

12 Muhona ma tja nai: “Omurise otja punga e hakana oviryo vivari poo okutwi kwonḓu motjinyo tjongeyama, opunga amape hupu po ovature va Samaria tjiva uriri nambano mbe rihatera movihavero vyomasuviro.”

13 Muhona Ndjambi ma tja nai: “Purateneye nu mu karaere kozondekurona za Jakob! 14 Meyuva mu me verere Ovaisrael omauvi wawo ami omu me teya ovipunguhiro vya Betel. Ozonya zotjipunguhiro atjihe maze kondwa aze wire pehi. 15 Ami me teya ozondjuwo zokupepera nozokuṋi; ozondjuwo, nḓa harekwa nomayo wozondjou maze rire ovitambatundu; nozondjuwo ozengi maze hahaurwa.”