Oviungura 4 - Herero Revision Bible (HRR)

Petrus na Johanes komurungu wombanguriro

1 Nu Petrus na Johanes ngunda amave hungire kuna ovandu arire tji mwa taurire ovapristeri nomunane wovatjevere vondjuwo ya Muhona nOvasaduke tjiva. 2 Owo va pindikira ovaapostele vevari mba tjinene tjinga aave hongo ovandu kutja Jesus wa penduka movakoke nu ihi otji tji ri otjiraisiro tjouatjiri kutja ovakoke mave penduka komuinyo. 3 Otji va kambura Petrus na Johanes nave ve twa motjovakamburwa nga keyuva indi ependukirwa, orondu tjandje eyuva ratoko. 4 Nungwari ovengi mba mba zuvire omazuvarisiro wawo va kamburire; notjivaro tjovarumendu ovakambure tja takavarera ko okuvaza ovandu mangara omayovi yetano.

5 Nu mependukirwa ovanane vOvajuda, novanene, nozonongo zomambo arire tji va woronganene mOjerusalem. 6 Wina pa ri Anas, Omupristeri Otjiuru, na Kajafas na Johanes na Aleksander, na ngamwa avehe mba ri oveṱunḓu rOmupristeri Otjiuru. 7 Owo va kuramisire ovaapostele momurungu wawo nave ve pura ave tja: “Otjiṋa hi mwe tji tjiti nomasa watjike na mena rauṋe?”

8 Nu Petrus tjinga e urire nOmbepo Ondjapuke we ve zirire a tja: “Eṋe vanane votjiwaṋa, na eṋe ovanene! 9 Eṱe ndino tjinga amatu pangurirwa otjiungura tjotjari tji tja tjitwa komurumendu omuvere na indu tja verukisiwa, 10 otjinga amamu sokutjiwa eṋe amuhe, notjiwaṋa atjihe tja Israel kutja omurumendu ngwi nai wa kurama mba komurungu weṋu a veruka mena ra Jesus Kristus wa Nasaret, ingwi eṋe ngu mwa papera kotjikoroise, nu ngwa pendurwa i Ndjambi movakoke. 11 Jesus onguri ngwi ngu maku zu nai momatjangwa:

‘Indi ewe nda imbirahiwa i eṋe ovatunge,

onda karira ewe enanḓengu pu aehe.’

12 Ondjamo i za mu Jesus porwe, nu kape na ena rarwe nda yandjewa kovandu kombanda yehi arihe Ndjambi me vanga kutja a rire mu twa kuturwa.”

13 Otjira tjOvajuda tja himwa tji tja muna okuhungira nokuhinamate kwa Petrus na Johanes, tjinga ave tjiwa kutja owo ovandu uriri mbe hi na indu va hongerwe. Ovajuda wina ve ve zemburuka kutja owo ombe ri ovakongorere va Jesus. 14 Nowo tjinga ave munu ingwi omurumendu ngwa verukisiwa a kurama puna Petrus na Johanes, otjinga ave ha ri nembo okuvepimba. 15 Nu tji va za nokuraera Petrus na Johanes kutja ve ze mo mombongarero, arire tji va utu okupurasana oveni 16 ave tja: “Ngatu tjite vi novarumendu mba? Tareye, ovature avehe va Jerusalem mave tjiwa kutja otjihimise hi tja tjitwa i wo, neṱe katu nokusora okupataṋa. 17 Nungwari kutja otjiṋa hi atji ha rimbarere ko mokati kovandu ngatu ve tande tjinene kutja ave ha uhara amave hungire rukwao ku ngamwa omundu mena ra Jesus.”

18 Otji ve ve isana ve hite nu ave ve raera nomasa tjinene kutja ave ha roro rukwao okuhungira, nangarire okuhonga mena ra Jesus. 19 Nungwari Petrus na Johanes ve ve zira ave tja: “Osemba komurungu wa Ndjambi okongwi okuzuva ku eṋe poo okongwi okuzuva ku Ndjambi? 20 Tareye eṱe kamaatu sora okuhinakuhungira imbi mbi twa muna na imbi mbi twa zuva oveni.” 21 Otjira tjOvajuda tje ve tirisa tjinene, narire tji tje ve esa ve yende. Otjo tja tjita nao motjimbe tjokutja katji mwine omuhingo wokuvevera, novandu avehe tjinga aave tanga Ndjambi motjimbe tjotjiṋa tji tja tjitwa. 22 Ingwi omundu ku kwa tjitirwe otjiṋa otjihimise indu tja verukisiwa wa ri notjiwondo tjo kombanda yozombura omirongo vine.

Ovakambure mave kumbu

23 Tjimanga Petrus na Johanes tji va za nokuisiwa arire tji va yaruka kovakwao nave keveserekarera omambo aehe ngu va raererwe i ovapristeri ozohongora novanene. 24 Ovakambure tji va zuva omambo nga, owo avehe va kumba ku Ndjambi ave tja: “Muhona oove ngu u ri Omuute weyuru nehi nokuvare noviṋa avihe mbi ri mu vyo! 25 Oove ngu wa hungirire mOmbepo Ondjapuke notjinyo tjatate mukururume David, omukarere woye, indu tji wa tjere:

‘Imba mbe he ri Ovajuda mave va pindikire tjike?

Ovandu mba mave tjitire tjike omeripura womungandjo?

26 Ozombara zouye ze rirongerera okurwa;

novanane va woronganene okupirukira Muhona,

nokupirukira Omutwirisiwa we.’

27 Orondu, tjiri, Herodes na Pontius Pilatus va woronganena motjihuro hi puna imba mbe he ri Ovajuda nOvaisrael okurwisa Omuna woye omuyapuke, Jesus, ngu wa twirisa. 28 Owo va woronganena okuyenenisa imbi ove, mouvara na mombango yoye, mbi wa tyere rukuru kutja mavi tjitwa. 29 Nu nambano, Muhona, tara komatandero ngu va tjiti, nu u yandje ku eṱe, ovakarere voye, okuhungira omambo woye nouvanḓe auhe. 30 Ropororera eke roye okuverukisa, noviraisiro novihimise ngavi tjitwe mena rOmuna woye omuyapuke Jesus.”

31 Nowo tji va za nokukumba, moṋa mu va woronganena arire tji mwa nyinganyingisiwa, nu avehe ave urisiwa nOmbepo Ondjapuke nu ave zuvarisa embo ra Ndjambi nouvanḓe.

Ovakambure mave kara noviṋa vyawo mumwe

32 Ovakambure avehe va ri nomutima umwe nouripura umwe. Kape na umwe ngwaa tja oviṋa mbye na vyo ovye omuini, nungwari avihe vya ri ovyawo avehe pamwe. 33 Novaapostele va hongonona ombendukiro ya Muhona Jesus nomasa omanene, nu Ndjambi we ve sera avehe ondaya onyingi. 34 Kapa ri nangarire umwe mokati kawo ngwa ri nouhepe. Imba mba ri nomahi womakunino nozondjuwo va randisa, ave eta ovimariva mbi va munu movirandisiwa mbi 35 nave vi yandja kovaapostele; nu imbi ovimariva aavi haṋewa mu wo avehe, auhe otja kouhepe we.

36 Nu Josef, Omulevi, ngwa kwaterwa mOsiprus, ovaapostele nguyave isana kutja Barnabas ena ndi ri heya kutja “Omuvanḓiparise”, 37 otja randisa ehi re romakunino, a eta imbi ovimariva ne vi yandja kovaapostele.