Oviungura 27 - Herero Revision Bible (HRR)

Paulus ma i nondjuwoyomomeva kOroma

1 Nu tji pa zikamisiwa kutja eṱe tu sokuyenda nondjuwoyomomeva kOitalie, owo arire tji va yandja Paulus novapandekwa ovakwao tjiva ku Julius, omuhongore wovarwe wovita va Roma mbu ku za “Otjimbumba tjOvita tjOmbara”. 2 Eṱe twa rondere mondjuwoyomomeva ndja zire kOadramitium, ndje rirongererere okuyenda kovirongo vyopokuvare vyorukondwa rwa Asie, narire tji twa i. Nu Aristarkus, Omumakedonie, ngwa zire kOtesalonika, wa ri puna eṱe. 3 Mependukirwa twa vazere mOsidon. Julius wa raisa omutima omuwa ku Paulus, notje mu yandjera okukatara omapanga we kutja a kapewe mbi ma hepa. 4 Eṱe okuza ngo twa kumukire atu i, nombepo tjinga aa i hingi okutuhungama, otjinga atwa varama okakoverwa Siprus. 5 Twa kondere okuvare meṋe ya Silisie na Pamfilie natu kavaza kOmira mehi ra Lisie. 6 Nu mOmira omuhongore Julius wa vaza mo ondjuwoyomomeva ndja zire kOaleksandrie okuyenda kOitalie, narire tje tu rondisa mu yo.

7 Eṱe twa kayenda oure womayuva omengi, nu nouzeu ounene korusenina atu ya popezu notjirongo Knidus. Ombepo ye tu tjaera okuyenda komurungu nomuhunga mbo, opu twa varamena okakoverwa Krete natu kapita kOsalmone. 8 Twa hingire popezu nomukuro nu nouzeu ounene atu vaza poṋa pu pe isanewa kutja Opotjikuturiro otjiwa tjOzondjuwozomomeva, nu ka ri kokure notjirongo Lasea.

9 Eṱe twa kara oruveze orure mbo nga omuinyo weyuru tji wa rira omunaumba okuryama komurungu, indi eyuva rOkuritjaera kovikurya tjandje nai ra kapita. Paulus ope ve pera ondunge ndji: 10 “Varumendu, ami me munu kutja ouyenda wetu okuzamba mau rire ounaumba; mape kara onyoneno komitwaro na kondjuwoyomomeva, neṱe oveni wina matu ṱu.” 11 Nungwari omuhongore wotjimbumba tjovarwe wovita wa puratena kondunge yomuhinge wondjuwoyomomeva noyomuini wayo pu indji oya Paulus. 12 Otjikuturiro tjozondjuwozomomeva katja ri otjiwa okukara mbo mokupepera; ovandu ovengi opu va tyera kutja ve rore okuhinga nani mave kavaza kOfeniks, kokutja mokupepera ve kakare ngo. Feniks otjikuturiro tjozondjuwozomomeva mOkrete ku ka tara keyuva kokumuho kuṱa kongurova na keyuva kokunene kuṱa kongurova.

Otjivepo mokuvare

13 Nombepo ondaazu ya utire okuhinga okuza komukuma wokeyuva kokumuho, novarumendu va tjangovasi mave yenenisa ombango yawo, nopu va homonena ongoorero yondjuwoyomomeva nave varama popezu tjinene nomukuro wa Krete. 14 Nungwari tjimanga ombepo onamasa tjinene ndji ku za “oyokEyuva kokunene kOmuhuka”, arire tji ya hingi okuza kokakoverwa. 15 Oyo ye riveta mondjuwoyomomeva, nu tjinga atu ha sorere okuihungamisa nombepo ndji, otjinga atwa isa okukondjisa natu i yandjere okutwarewa i ombepo. 16 Kaṱiṱi twa munine otjiwameno tji twa varama komukuma wokeyuva kokumuho kwokakoverwa okaṱiṱi ka Kauda. Nu poṋa mbo, nongondjero onene, atu yenene okuyama okayaha kondjuwoyomomeva kutja ake ha teka. 17 Owo ve ke yera kombanda mondjowoyomomeva, tjazumba ave kutu ozongoze tjiva okupamisa okuikondorokisa. Owo ave tira kutja rumwe ngahino mave i hingire mozondunduheke za Sirtis meṋe yomuruko wa Libie. Opu va zokuisako omarapi wayo kutja ondjuwoyomomeva i kayende uriri nao mombepo. 18 Otjivepo otjinamasa hi tja rara ama tji hingi nao, nu mependukirwa owo ave utu okuimbirahi omitwaro mondjuwoyomomeva, 19 nu meyuva oritjatatu wina ave imbirahi oviungurise tjiva vyayo. 20 Oure womayuva omengi eṱe katu mwine eyuva nozonyose, notjivepo tja hingire nomasa nao nokuhinokuzako. Korusenina arire tji twe rihahiza atu munu kutja matu ṱu.

21 Novarumendu tji va kara orure nokuhinokurya, Paulus wa kakurama mokati kawo na tja: “Varumendu, eṋe andakuzu mwa puratenene ku ami namu ha hingi okuza kOkrete, andakuzu nai twa virura oumba nonyonokero aihe ndji. 22 Nungwari nambano me riyarikaṋa ku eṋe, yanḓipareye! Kape nomundu pu eṋe ngu ma ṱu, posi yondjuwoyomomeva ndji mai ṱomwine. 23 Orondu ouṱuku mbwa zu ko omuengeri wa Ndjambi ngwi, ami ngu mbi ri owe nu ku mbi rikotamena we ere ku ami 24 na tja: ‘O tira, Paulus! Ove mo sokukakurama komurungu wombara ya Roma. Nu Ndjambi mena rouwa we kove wa yama ominyo vyovarumendu avehe mbe ri puna ove mondjuwoyomomeva.’ 25 Otji mamu sokuyanḓipara, varumendu, orondu ami mbi nongamburiro mu Ndjambi yokutja avihe mavi yenenisiwa otja punga amba raererwe. 26 Nungwari matu kavaza komukuro wokakoverwa kemwe kaaṋi.”

27 A ri ouṱuku outjamurongo na une, neṱe twa ryangisiwa i otjivepo mOmuronga Mediterania. Nu mangara mokati kouṱuku ovaungure vomondjuwoyomomeva va tjangovasi matu ya popezu nomukuro. 28 Opu va pundisira ongoze momeva ku kwa kutirwe ondjinda nave munu kutja inga omeva ye noukoto wozometa omirongo vine; kombunda yanao arire tji va tjiti tjingetjo nave munu kutja omeva ye noukoto wozometa omirongo vitatu. 29 Owo aave tira kutja ondjuwoyomomeva mai keriveta motuuwa, opu va yumbira ozongoorero zayo ine momeva okuza kombunda nave kumbu kutja pe tje. 30 Okuzambo ovaungure vomondjuwoyomomeva arire tji va ṱokuza mo mu yo; owo va pundisa inga okayaha momeva nave tjiti aayo mave yumbu ozongoorero momeva okuza komurungu. 31 Nungwari Paulus wa tjere nai komunane wovita na kovarwe wovita: “Ovaungure vomondjuwoyomomeva tji ve ha karere mu yo, eṋe kamaamu yamwa.” 32 Ovarwe wovita opu va kondera ozongoze nḓa ṱiza okayaha nave ke esa ake wire momeva.

33 Nu tji pa tja ape yere, Paulus arire tje riyarikaṋa ku wo avehe kutja ve rye ovikurya na tja: “Eṋe nambano mwa undju oure womayuva omurongo na yane, noruveze aruhe ndwi kamuya rya okaṋa. 34 Me memu zeuparisa kutja mu rye ovikurya; mamu vi hepa kokutja mu kare nomuinyo. Kape nondjise nangarire imwe koviuru vyeṋu ndji mai pandjara.” 35 Paulus tja za nokuhungira omambo nga, wa toorere omboroto, a tja okuhepa ku Ndjambi komurungu wawo avehe e i koyora na utu okurya. 36 Owo va yanḓipara, navehe wina va rya ovikurya. 37 Neṱe atuhe kumwe mbu twa ri mondjuwoyomomeva twa ri ovarumendu omasere yevari nomirongo hambombari na hamboumwe. 38 Nu avehe tji va za nokurya okukuta, arire tji va yumbu ovikokotwa mokuvare, nondjuwoyomomeva ai rire ombupu.

Ondjuwoyomomeva mai teka

39 Nu tji pa tji, ovaungure vomondjuwoyomomeva kave zemburukire omukuro wokuvare, nungwari va muna otjikuturiro tjozondjuwozomomeva pu pe nomukuro nave tye kutja, tji mape sorwa, owo mave twara ondjuwoyomomeva koṋa ngo. 40 Otji va konda ozongoorero nave ze ṱomwinisa mokuvare, nu moruveze tjingero ndo ave kutura ozongoze, nḓa ṱizire oviti vyotjitumbure. Tjazumba ave yere erapi rokomurungu kokutja ombepo i sore okuhingira ondjuwoyomomeva komurungu, neṱe arire tji twa hungama omukuro. 41 Nungwari ondjuwoyomomeva ye riveta mondunduheke nai kakatere; omurungu wayo kaau nyinganyinga, ngunda ihi otjikondambunda atja hahaurwa i omapukiro wozongazona.

42 Ovarwe wovita va tyere okuzepa ovapandekwa avehe kokutja ve ve tjaere okuṱumbira komukuro nave ha hene. 43 Nungwari omuhongore wotjimbumba tjovarwe wovita wa vangere okuyama Paulus, notje ve tjaera okutjita nao. Moruveze rwanao eye wa rakiza kovarumendu avehe mbaa ve tjiwa okuṱumba kutja ve tenge po okururumina momeva nu ve ṱumbire komukuro. 44 Ovakwao va sere okuvekongorera amave riṱizire koviti na kovitekero vyondjuwoyomomeva. Komuhingo mbwi eṱe atuhe otji twa vaza nawa komukuro nokuhinatjipo.