Oviungura 16 - Herero Revision Bible (HRR)

Timoteus ma i puna Paulus na Silas

1 Paulus we ere kOderbe na Listra mu mwa turire omukambure wena Timoteus. Ina, wa ri Omujuda, nu wina wa ri omukambure, nungwari ihe wa ri Omugrike. 2 Ovakambure avehe mOlistra na Ikonium aave hungire ouwa womutima wa Timoteus. 3 Paulus wa vangere kutja Timoteus ma yende puna ye, nope mu sukarekera. Eye wa tjita nao, Ovajuda avehe mba turire movirongo mbyo tjinga ave tjiwa kutja ihe ya Timoteus Omugrike. 4 Owo va ryanga movirongo tjandje mave hongo ovakambure inga omaraerero nga zikamisiwa i ovaapostele novatarere wombongo mOjerusalem, nu aave ve raere kutja ve ye ṱakamise. 5 Ozombongo otji za zeuparisiwa mongamburiro naze takavarere ko pevapa yuva.

Paulus ma munu otjirimunikise mOtroas

6 Paulus na Silas na Timoteus va tapakaṋene ehi ra Frigie nora Galatie, Ombepo Ondjapuke tjinga aihe ve yandjerere okuzuvarisa ombuze morukondwa rwa Asie. 7 Nu tji va kavaza omukuro wehi ra Misie, arire tji va roro okuhita morukondwa rwa Bitinie, nungwari Ombepo ya Jesus kai ve yandjerere ko. 8 Otji va ryama komurungu ave kapitira mehi ra Misie nave i kOtroas. 9 Ouṱuku mbo Paulus wa muna otjirimunikise, neye wa muna mo Omumakedoni ngwa kuramene ame riyarikaṋa nai: “Konda nguno kOmakedonie u yekutuvatera!” 10 Tjimanga Paulus tja za nokumuna otjirimunikise hi, arire tji twe rirongerere okuyenda kOmakedonie, tjinga atwe ripura kutja Ndjambi me tu raisire kutja tu sokukazuvarisa Ombuze Ombwa kovandu vehi ndo.

Ondanaukiro ya Lidia mOfilipi

11 Eṱe twa ya mondjuwoyomomeva okuza kOtroas atu kondo osemba okuyenda kOsamotrake, nu mependukirwa atu ya mOneapolis. 12 Okuzambo twa ya kOfilipi, otjihuro ohongora mozondendera zehi ra Makedonie, nu wina tji tji ri otjouhona wOvaroma. Eṱe twa kara omayuva ouṱiṱi motjihuro hi. 13 Mesabata twa ya konḓonḓu pendje yotjihuro, tjinga atwa tjangovasi koṋa ngo kwa sokukara nopoṋa Ovajuda pu ve kumbira. Eṱe twa kara pehi atu hungire kuna ovakazendu mba woronganena mbo. 14 Umwe wa imba mbaa ve puratene ku eṱe wa ri Lidia ngwa zire kOtiatira, nu wa ri omurandise wotupera otuserarovazu. Eye wa ri omukazendu ngwa ri nondira ku Ndjambi, nu Muhona wa yezururire omutima we kutja ma puratene nombakatwi komambo Paulus ngaa hungire. 15 Nu Lidia novonganda ye tji va za nokupapitisiwa, arire tje tu ṋanga koye a tja: “Tjinangara eṋe mwe ndji vara otja omukambure watjiri mu Muhona, indjeye mu kasekire koyandje.” Neye we tu ura nomambo, neṱe arire tji twa i.

Paulus na Silas motjovakamburwa mOfilipi

16 Eyuva rimwe ngunda amatu i koṋa Ovajuda ku ve kumbira, arire tji twa hakaene nomukarere omusuko ngwa ri nombepo ohakohoke ndje mu tjitire okurira ombuke. Omusuko ngwi wa tumbisire ovahona ve nondjambi onene ndjiya isa mokuuka. 17 Eye wa kongorera Paulus na eṱe ama ravaere nai: “Ovandu mba owo ovakarere va Ndjambi wOkombandambanda! Owo ve mu zuvarisira omuhingo eṋe mbu mamu yamwa na wo!” 18 Neye wa ravaera nao omayuva omengi, nga Paulus tja urirwe nu a tanauka na tja kombepo: “Mena ra Jesus Kristus ami me ku raere kutja u pite momusuko ngwi!” Nu moiri tjingeyo ndjo ombepo ai piti mu ye.

19 Novahona ve tji va tjiza kutja okumuna ondjambi yawo kwa yanda mba, arire tji va kambura Paulus na Silas ave ve nanene kovanauvara koruveze romarandero, 20 nu ave ve eta komurungu wovahongore vOvaroma nave tja: “Ovarumendu mba Ovajuda nu mave tjiti ezunganeno motjihuro tjetu. 21 Owo ve honga oviṋa mbi hiya yandjerwa; oweṱe Ovaroma, nu kamaatu sora okuyakura nokutjita oviṋa mbyo.” 22 Notjimbumba tjovandu tja hangatena Paulus na Silas.

Ovahongore otji va nyondorora ozombanda za Paulus na Silas nave rakiza kutja owo ve tonwe. 23 Nu tji va za nokutonwa ovikando ovingi, arire tji va tuwa motjovakamburwa, nomutjevere wotjovakamburwa a rakiziwa kutja e ve tjevere oukukutu. 24 Omutjevere tja za nokuyakura omarakiza nga, we ve twa metuwo romoukoto na kutu ozombaze zawo koviti ovizeu. 25 Nu mangara ouṱuku ounene Paulus na Silas aave kumbu nokuimburira Ndjambi omatangero, ovapandekwa ovakwao ngunda amave puratene ku wo. 26 Tjimanga otji pa kara omanyinganyingiro wehi omazeu, nga zezerisa omazikameno wotjovakamburwa tjinene. Omivero avihe vya paturuka tjimanga, nomapando wovapandekwa aye poka. 27 Omutjevere wotjovakamburwa wa penduka nu tja muna kutja omivero vyotjovakamburwa vi ri kamwaha, wa tjangovasi ovapandekwa avehe va hene; eye otja nana engaruvyo re na vanga okurizepa omuini. 28 Nungwari Paulus wa ravaera neraka enene a tja: “O ritjiti omuini otjipo! Eṱe atuhe omu tu ri!”

29 Omutjevere wotjovakamburwa wa raya emunine a hakahana okuhita na kawora ozongoro pozombaze za Paulus na Silas ama zezera. 30 Tjazumba e ve pitisa pendje ne ve pura a tja: “Vahona vandje, hi tjite vi kutja mbi hupisiwe?”

31 Owo va zira ave tja: “Kambura mu Muhona Jesus, nu mo hupisiwa, ove nonganda yoye.” 32 Okuzambo ave zuvarisa embo ra Muhona ku ye na ku imba avehe vonganda ye. 33 Nu moiri tjingeyo youṱuku mbo omutjevere wotjovakamburwa arire tja twara Paulus na Silas e kevekoha omazeze wawo, neye nonganda ye aihe ave papitisiwa tjimanga. 34 Eye wa yakura Paulus na Silas moye nu e ve ṱunine omariro. Neye nonganda ye aihe va nyanda omitima tjinene, tjinga nambano ava kambura mu Ndjambi.

35 Nomuhuka wependukirwa ovanauvara vOvaroma va hinda ovakarere vouhona komutjevere wotjovakamburwa okukemuraera nai: “Ovandu mbo ve esa ve yende.”

36 Omutjevere wotjovakamburwa otja kahepura ku Paulus a tja: “Ovahongore va hindi omarakiza wokutja ove na Silas mu pitisiwe motjovakamburwa. Nambano piteye mu yende mohange.”

37 Nungwari Paulus wa tja nai kovakarere vouhona: “Eṱe katu munikire ondjo yondjito youtwe kangamwa, nungwari owo ve tu tonene komurungu waavehe, neṱe oweṱe ovanaruuto vehi ra Roma! Tjazumba ave tu patere motjovakamburwa. Nambano mave vanga okutupitisa mongumumu are? Kako! Ovahongore vOvaroma oveni nga rire mbe ya ve yokutupitisa.”

38 Ovakarere vouhona arire tji va karaera omambo nga kovahongore vOvaroma; nu tji va zuva kutja Paulus na Silas ovakwatera va Roma otji va uta okutira. 39 Nowo va ya ave kaningira ondjesiro ku Paulus na Silas; okuzambo ave ve pitisa motjovakamburwa nave ve ningire kutja ve ze mo motjihuro. 40 Paulus na Silas va pita motjovakamburwa nave i kondjuwo ya Lidia. Ingo oku va kahakaenena novakambure ovakwao, ave ve zeuparisa mongamburiro narire tji va i.