1 Okuza komunene.
Me tjanga komusuverwa Gajus, epanga randje, ngu mba suvera tjiri.
2 Gajus omusuverwa, ami me kumbu kutja u ṋingapare moviṋa avihe, nokutja u kare omuveruke morutu otja tjinga au ri omuveruke mombepo. 3 Ami mba nyanda tjinene ovakambure ovakweṋu tji ve ya nave ndji raere kutja ove wa ṱakama mouatjiri nokutja u nongarero ombwa youatjiri. 4 Kape notjiṋa tji tji ndji pa enyando tjinene posi yaingwi okuzuva kutja ovanatje vandje ve hupa mouatjiri.
Gajus ma tangwa
5 Mukwetu omusuverwa, oove omuṱakame moviungura mbi u ungurira ovakambure ovakweṋu, nandarire kutja ove ko ve i. 6 Owo va serekarera orusuvero rwoye kombongo. Arikana ve vatera mouyenda wawo momuhingo mbu tjata ku Ndjambi; 7 orondu owo ve ri mouyenda wokuzuvarisa Kristus ave hi nokuyakura ombatero yovehinangamburiro. 8 Neṱe ovakambure opu twa sokuvatera ovandu mba kokutja tu rire vemwe motjiungura tjawo tjokuhandjaura ouatjiri.
Diotrefes na Demetrius
9 Ami mba tjanga orutuu orusupi kombongo, nungwari Diotrefes, ngu vanga okurira omunane wawo, ke na ko na tja nomambo ngu me hungire. 10 Nu tji mbe ya ngo me mu zemburukisa avihe mbya tjita: Oviṋa ovivi mbye hungirira eṱe, novizeze mbye kora! Nungwari oviṋa mbi ku ye kapuwo, eye ke nokuyakura ovakambure ovakwao tji mave ya, nu ma tjaere nangarire imba mbu mave vanga okuveyakura ne ve kondo kombongo!
11 Mukwetu omusuverwa, o horere kouvi, nungwari horera kouwa. Ingwi ngu tjita ouwa eye owa Ndjambi, nu ngu tjita ouvi, eye ke i Ndjambi.
12 Demetrius u nondangu ombwa mokati kovandu avehe; nouatjiri wina u mu hongonona komuhingo mbo. Eṱe tu mu hongonona nao wina, nove mo tjiwa kutja omahongononeno wetu ouatjiri.
Ombinika osenina
13 Ami mbi nomambo omengi okukuraera, nungwari hi nokuvanga okukutjangera. 14 Me zeri kutja tu hakaene tjimanga, tjazumba arire tji twa hungire pamwe nawa.
15 Ohange ngai kare na ove. Omapanga woye aehe maye minike. Nu minika omapanga wetu aehe, arihe peke.
© Herero Revision Bible © Bible Society in Namibia, 2021.
