David na Mefiboset
1 Eyuva rimwe David wa pura nai: “Inga pena omundu weṱunḓu ra Saul ngwa hupa? Ami me vanga okumuraisira otjari mena ra Jonatan.”
2 Nu monganda ya Saul mwa ri omukarere wena Siba; neye wa raerwa kutja a yende ku David. Nombara ye mu pura ai tja: “Oove Siba?”
Neye arire tja ziri nai: “Ii, owami omukarere woye Siba.”
3 Nombara ya pura ai tja: “Kape hupire omundu weṱunḓu ra Saul kutja mbi mu raisire otjari otja pu mba kwizikira Ndjambi are?”
Siba arire tja ziri nai kombara: “Ingee pe nomuzandu wa Jonatan, neye wa remana ozombaze azeyembari.”
4 Nombara ya pura nai: “Eye u ri pi?”
Siba wa zira a tja: “U ri mondjuwo ya Makir, omuzandu wa Amiel, mOlo-Dabar.” 5 Ombara David otja hinda ovandu ve kemuete.
6 Mefiboset, omuzandu wa Jonatan, omuzandu wa Saul, tje ya ku David, wa wa onḓurumika ne ripete. David wa tja nai: “Mefiboset!” Neye a ziri a tja: “Omukarere woye eye ngwi.”
7 Tjazumba David arire tja tja ku ye: “O tira! Ami me ku raisire otjari mena raiho Jonatan, nu me ku yarurire ehi arihe raiho mukururume Saul; nove omuini aruhe mo ri kotjiriro tjandje.”
8 Mefiboset we ripeta na tja: “Omukarere woye omukwatjike kutja mo raisa otjari tjoye kombwa ndja koka otja ami?”
9 Nombara otji ya isana Siba, omukarere wa Saul, nai tja ku ye: “Oviṋa avihe mbya ri ovya Saul neṱunḓu re, me vi yandja komuatje womuzandu womuhona woye. 10 Ove novazandu novakarere voye, mamu ungurire eṱunḓu romuhona woye Saul ehi romakunino, nu mamu wongo omakondero okuveparura. Nungwari Mefiboset omuini aruhe ma ri kotjiriro tjandje.” Nu Siba wa ri novazandu omurongo na vetano, novakarere omirongo vivari.
11 Siba wa zira a tja: “Otja omuhona wandje ombara punga a hee komukarerere we, opunga ame tjiti.”
Nu Mefiboset aa ri kotjiriro tja David otja ngu ri umwe wovazandu vombara. 12 Mefiboset wa ri nomuzandona wena Mika nu avehe, mba turire monganda ya Siba, va rira ovakarere va Mefiboset. 13 Nu Mefiboset ngwa remanene ozombaze azeyembari, wa turire mOjerusalem, nu aa ri kotjiriro tjombara.
© Herero Revision Bible © Bible Society in Namibia, 2021.
