Husai ma pukisa Absalom
1 Ahitofel wa tja nai ku Absalom: “Ndji esa mbi toore ovarumendu 12,000, nu mbi tezere David mouṱuku mbunombwi. 2 Ami me mu rwisa ngunda a urwa na ngundipara, nu me mu urumisa; ovarumendu mba avehe mbe ri puna ye mave taura, nami me zepa ombara aiyerike. 3 Ami me kotora otjiwaṋa atjihe kove tjimuna omukazendu ngu ma yaruka komurumendu we. Ove movanga okuzepa omurumendu ngwi umwe uriri, nungwari otjiwaṋa atjihe movanga okutjiyama.” 4 Omambo nga ya tjata ku Absalom na kovanane avehe vOvaisrael.
5 Nungwari Absalom wa tja nai: “Isana Omuarki Husai wina, tu zuve kutja ma tja vi.” 6 Nu Husai tje ya, Absalom arire tja tja ku ye: “Ondunge ya Ahitofel ndje tu pe, oyo ndji; ngatu kongorere yo? Nu tje he ri nao, tu raera kutja ngatu tjite vi.”
7 Husai arire tja ziri ku Absalom a tja: “Otjikando hi ondunge ya Ahitofel ndje ku pe, kambwa. 8 Ove mo tjiwa nawa kutja iho David novarwe ve wovita owo ozombangaṋe, nokutja owo ovindandi tjimuna ongwe onḓenḓu ndja vakerwa ounatje wayo. 9 Tara, eye ngahino wa ṱara morupoko poo poṋa parwe; nu ndoovazu momautiro wotjirwa ovarumendu voye tjiva va ṱu, auhe ngwa zuu ihi ma hungire kutja ovandu mbe ri komukuma wa Absalom va haverwa. 10 Tjandje nangarire omundu ombanḓe tjinene povakwao, ngu nomutima wongeyama, ma mumapara; orondu Israel atjihe matji tjiwa kutja iho ombangaṋe, nokutja u novarumendu ovarwe ozombanḓe 11 Ondunge yandje oyo ndji: Woronganisira Ovaisrael avehe pove, okuza kOdan nga kOberseba ve takavare otja eheke komukuro wokuvare, nove omuini u ve hongorere movita. 12 Tji twa vaza David poṋa ngamwa apehe pe ri, matu wire kombanda ye otja omueme tji u wira kombanda yehi, nu katu nokumuhupisa, nangarire ovarumendu mbe ri puna ye. 13 Neye tja yaruka motjihuro ngamwa atjihe, Ovaisrael avehe otji mave eta ozongoze ozonḓeu ku tjo, neṱe matu tji raurire motjana nga tji pe hi nakusewa ewe nangarire rimwe.”
14 Absalom nOvaisrael avehe va tja nai: “Ondunge yOmuarki Husai ombwa pu indji ya Ahitofel!” Nungwari Muhona ongwa tjita kutja ondunge ya Ahitofel i imbirahiwe, tjinga a vanga okueta otjiwonga kombanda ya Absalom.
David ma tjivisiwa na taura
15 Okuzambo Husai wa tjivisa nai kovapristeri ooSadok na Abiatar: “Ahitofel wa popa Absalom novanane vOvaisrael kutja ve tjite nai, nungwari ami mbe ve pa ondunge yarwe. 16 Nambano hakahaneye okutjivisa omambo nga ku David: ‘Ouṱuku mbwi o kara pomakondero woruronḓu mokuti onguza, nungwari kakonde onḓonḓu Jordan tjimanga kutja ombara novandu vayo avehe ave ha yandekwa.’”
17 Jonatan, omuzandu wa Abiatar, na Ahimaas, omuzandu wa Sadok, ave undjire poruharwi Rogel, orondu va tjita kutja ave ha munika tji mave hiti motjihuro. Nomukarere omukazendu aa i ngo aruhe okukeveraera mbya tjitwa, nowo otjaave karaera ombuze ndji kombara David. 18 Nungwari omuzandu worive we ve muna, na karaera Absalom. Nu aveyevari otji va hakahana nave i kondjuwo yomurumendu worive mObahurim ngwa ri nombu monganda ye, nowo omu va kapunda. 19 Nomukazendu womurumendu ngo wa toora otjikutjire ne tji yara potjinyo tjombu; neye wa tirira ko ovirya kutja ape ha ningi omundu ngu ma tjiza. 20 Novarumendu va Absalom tji ve ya komukazendu mondjuwo, va pura ave tja: “OoAhimaas na Jonatan ve ri pi?”
Nomukazendu we ve zira a tja: “Va kondo oruronḓu.”
Novakarere va Absalom ve ve paha nave he ve munu, notji va yaruka kOjerusalem. 21 Novakarere va Absalom tji va za nokuyaruka, Ahimaas na Jonatan arire tji va piti mombu nave kaserekarera avihe mbi kombara David ave tja ku ye: “Womborokeye nu kakondeye onḓonḓu Jordan tjimanga, orondu Ahitofel wa tungire eṋe ondunge yorive.” 22 David novandu ve otji va uta okukakonda onḓonḓu Jordan. Nu tji pa tji avehe tjandje va kondo komukuma mbwina, nu kape na umwe ngwa sewa kombunda.
23 Ahitofel tja munu kutja ondunge ye kai ungurisirwe, otja kutira okasino ke na yaruka kotjirongo tje. Nu tja za nokuṱuna oviṋa vye avihe mondjuwo, arire tje rireke; neye wa pakwa meyendo ra ihe.
24 David tja kavaza kotjirongo Mahanaim, Absalom tjandje wa kakonda onḓonḓu Jordan puna Ovaisrael avehe. 25 Absalom wa yandjere ouhongore wotjimbumba tjovita ku Amasa, moruveze rwa Joab. Amasa wa ri omuzandu wa Jeter, Omuismael. Ina wa ri Abigail, omusuko wa Nahas, oomuangu nerumbi na Seruja; Seruja onguri ina ya Joab. 26 Absalom nOvaisrael avehe va tona ozondanda mehi ra Gilead.
27 Nu David tje ya kotjirongo tja Mahanaim, arire tja tjakanenwa i Sobi, omuzandu wa Nahas, ngwa zire kOraba, otjihuro tjOvaamoni, na Makir, omuzandu wa Amiel, ngwa zire kotjihuro Lo-Dabar, na Barsilai ngwa zire kotjihuro Roglim. 28 Nowo va eta oviṋa mbi ku David: Ovirare novitjuma, nozonyungu zomunoko novikokotwa novirya, noruhere, novikokotwa mbya ngarurwa, nomakunde noupapitjenga, 29 nouitji wokuti, nomaere nozonyanda norueru. Orondu tji ve ripura kutja ovandu mave ṱondjara nonyota nu mave urirwa mokuti onguza.
© Herero Revision Bible © Bible Society in Namibia, 2021.
