Amnon na Tamar
1 Nu pa kara nai: Absalom, omuzandu wa David wa ri nomuṱena omuwa wena Tamar ngu hiya kupwa; nu Amnon, omuzandu warwe wa David, we mu hurire. 2 Amnon wa hurire Tamar tjinene nga tja vera. Eye we ripura kutja kape nokuyenena ku ye okuryama popezu na ye, Tamar tjinga a ri omukazona ngu hiya rara puna ovarumendu. 3 Nungwari Amnon wa ri nepanga wena Jonadab, omuzandu werumbi ra David, Sima ngwa ri novineya tjinene. 4 Jonadab we mu pura a tja: “Ove oove omuzandu wombara, posi eyuva arihe mbi ku muna awa ningisa ondjenda. Kapena kuya ondji raere kutja u kurungusiwa i otjikeṋa?”
Amnon arire tje mu ziri a tja: “Ami mba hura Tamar, omuṱena werumbi randje Absalom.”
5 Jonadab arire tja tja ku ye: “Karere kombete, nu u ritjite aayo wa vere. Nu iho tje ya okukuvarura, itja nai ku ye: ‘Arikana, omuṱena kwandje Tamar nge ye okundjipa otjiṋa okurya tji ma ṱunine momeho wandje, nu tji me rire meke re.’ ” 6 Amnon otja karara kombete, ne ritjiti aayo wa vere.
Nombara David tje ya okumuvarura, Amnon wa tja ku ye: “Arikana, Tamar nge ye ku ami, e ndji terekere omavanda tjiva momeho wandje kutja mbi rire meke re.”
7 David otja hinda ombuze ku Tamar kondjuwo youhona, na tja ku ye: “Arikana, twende kondjuwo yomuṱena kwoye Amnon, u kemuterekere ovikurya.” 8 Tamar otja hita mondjuwo yomuṱena Amnon, ngunda a rangavara kombete. Nu Tamar wa toora oruhere e ru rungu, a ungura po omavanda ne ye tereke. 9 Tjazumba arire tja toora otjiterekero, a isa mo omavanda mu tjo ne ye twa momurungu wa Amnon kutja a rye; nungwari Amnon wa panḓa okurya, na tja: “Avehe ngave ze po pu ami!” Nu avehe arire tji va zu po. 10 Amnon wa tja ku Tamar: “Ndji etera omariro metuwo romara kutja mbi rire meke roye.” Tamar otja toora omavanda nga tereke, ne ye twara komuṱena Amnon metuwo romara. 11 Nu Tamar ngunda ama eta omavandu nga ku Amnon, Amnon arire tje mu kambura na tja ku ye: “Indjo, u rare puna ami, muṱena kwandje!”
12 Nungwari Tamar wa tja nai ku ye: “Arikana, muṱena kwandje, o ndji yamburura, otjiṋa otja ihi tjinga atja zerikwa mOisrael; o tjiti ohoṋi ndja sana ngo! 13 Ami me i pi nohoṋi yandje? Nove omuini mo rire omunandjambu mOisrael. Arikana, hungira nombara, orondu oyo kamaai panḓa okundjiyandja kove.” 14 Nungwari Amnon ka vangere okuzuva ku Tamar, notje mu tjera, e mu yamburura, na rara pu ye.
15 Amnon arire tja yara Tamar tjinene, ne mu nyengwa kombanda yaindu tje mu suverere rutenga. Neye wa tja ku Tamar: “Sekama, twende!”
16 Tamar otja tja ku ye: “Kako! Okundjiramba komuhingo mbwi ma rire ouhasemba ounene komeho waihi tji we ndji tjiti!”
Nungwari Amnon ka vangere okuzuva ku Tamar, 17 notja isana omukarere we na tja ku ye: “Yumba omukazendu ngwi pendje, aze po pu ami, nu u pate omuvero!” 18 Omukarere otja pitisa Tamar pendje na pata omuvero.
Tamar wa ri nombanda yomaoko omare; orondu momayuva ngo ovakazona ovaingona ave zara nao, ngunda ave hiya kupwa. 19 Tamar otje ri tirira omutwe motjiuru, a nyondorora ombanda ye yomaoko, a twa eke kotjiuru, na kayenda ama uru. 20 Nomuṱena Absalom tje mu muna, we mu pura a tja: “Omuṱena kwoye Amnon we ku tjere are? Mwina uri! O raere kovandu, muṱena kwandje! Eye omuṱena kwoye, o rikende notjiṋa hi.” Tamar otja kara erike a ningisa ondjenda, mondjuwo yomuṱena Absalom.
21 Nombara David tja zuva otjiṋa hi, wa pindika tjinene. 22 Nungwari Absalom okuzambo kaa hungire kuna Amnon; eye wa humisire Amnon, tjinga a yamburura omuṱena Tamar.
Absalom ma zepa Amnon na taura
23 Kombunda yozombura mbari Absalom wa kahorisa ozonḓu ze kObaal-Hasor, popezu na Efraim, na ṋanga ovazandu vombara avehe. 24 Absalom otja ya kombara a katja nai: “Tara, omukarere woye ma kahorisa ozonḓu ze. Nu, arikana, indjo komukandi puna ovakarere voye.”
25 Nungwari ombara ya tja nai ku Absalom: “Ayee, kako, muatje wandje! Arikana, atu i atuhe kutja atu he ku kendisa tjinene.” Absalom wa kara pokumuningira, nungwari ombara kai vangere okuyenda nu otji ye mu virikiza nondaya.
26 Absalom arire tja tja: “Tji pe he ri nao, arikana, mu esa omuangu wandje Amnon a yende puna eṱe.”
Nombara ya pura nai ku ye: “Ma ire tjike puna ove?” 27 Nungwari Absalom wa kara pokumuningira, ngandu David korusenina tja yandjera Amnon novazandu vombara ovakwao avehe ve yende puna ye.
28 Absalom wa rakiza kovakarere ve a tja: “Tjevereye Amnon, neye tja purukisiwa i omavinu; nami tji mba tja mu zepeye, okutja mu zepeye. Amu tira, orondu owami ngu mbe mu tye okutjita nao. Yanḓipareye nu amu ivaiva!” 29 Novakarere va Absalom otji va zepa Amnon otja eye pe ve rakiza. Ovazandu avehe ovakwao vombara va sekama, nu auhe wa kavira kokasinokambe ke a tupuka.
30 Nowo ngunda averi mondjira, ombuze ndja vaza ku David, ya tja nai: “Absalom wa zepa ovazandu vombara avehe, nu kape na umwe ngwa hupu!” 31 Nombara ya sekama nai nyondorora ozombanda zayo, nai rivanda pehi; ovakarere mba ri puna yo wina va nyondororora ozombanda zawo. 32 Nungwari Jonadab, omuzandu werumbi ra David, Sima, wa zira a tja: “Muhona wandje, o ripura kutja wa zepa ovazandu vombara avehe, ayee, indee; oAmnon erike ongwa ṱu, orondu Absalom we rimana okutjita otjiṋa hi, okuza keyuva ndi Amnon nda yamburura omuṱena Tamar. 33 Muhona wandje ombara, o kambura kutja ovazandu avehe vombara va ṱu; oAmnon erike ongwa ṱu.”
34 Absalom tjandje nai wa taura.
Nomuzandu ngwaa tjevere, tja yevayeva, wa muna ovimbumba ovinene, mbi mavi rauka kondundu mondjira yokuza kOhoronaim. 35 Jonadab arire tja tja kombara David: “Tara, ovazandu vombara owo mbo, mave ya; otja omukarere woye pa hee otji pa tjitwa.” 36 Neye tja mana okuhungira omambo nga, ovazandu vombara otji ve ya nave utu okurira tjinene. Nu wina ombara novakarere vayo avehe va yaruka okurira nondjuriro onene.
37 Nungwari Absalom wa taura na i ku Talmai, omuzandu wa Amihud, ombara ya Gesur. Nu David wa rira omuzandu we Amnon oruveze orure tjinene. 38 Absalom wa kakara ozombura ndatu mOgesur. 39 Nombara kai humisire Absalom rukwao, tji ya za nokurihuhumiṋa.
© Herero Revision Bible © Bible Society in Namibia, 2021.
