David na Batseba
1 Tji pa kapita ombura imwe, oruveze ozombara ndu ze yenda kovita, David otja hinda Joab novarwe ve wovita notjimbumba tjOvaisrael kovita. Nowo va kanyona ehi rOvaamoni nave kakovera otjihuro Raba. Nungwari David omuini wa kara mOjerusalem.
2 Eyuva rimwe, kuṱa kongurova, David wa penduka motjiraro tje na ryanga komututu wondjuwo ye youhona. Nu ngunda ama ryanga ngo, arire tja munu omukazendu ngu me rikoho morutu; nomukazendu ngwi wa ri omuwa tjinene. 3 Nu David wa hinda ovatumwa okukakonḓonona kutja omukazendu ngwi owaṋi; neye wa raerwa kutja oBatseba, omusuko wa Eliam, omukazendu wa Urija, Omuhetite. 4 David wa hinda ovatumwa okukemueta. Batseba wa etwa, nu David wa rara pu ye Batseba tjandje otja za komayuva we woukazendu. Tjazumba Batseba wa yaruka koye. 5 Neye we ke rimuna kutja wa rire otjingundi, notja hinda ombuze ku David okumutjivisa.
6 David wa hinda ombuze ku Joab a tja: “Ndji hindira Urija, Omuhetite.” Nu Joab otja hinda Urija ku David. 7 Urija tje ya ku David, David we mu pura kutja Joab novarwe wovita ve ri vi, nokutja ovita vi kayenda vi. 8 David wa tja nai ku Urija: “Twende konganda u kasuve.” Nu Urija tja pita mondjuwo youhona, ombara David arire tje mu hindire oviyandjewa. 9 Nungwari Urija ka ire koye; moruveze rwanao eye wa rara pomahitiro wondjuwo youhona, pamwe novakarere ovatjevere vomuhona we. 10 David tja zuva kutja Urija ka ire koye, we mu pura a tja: “Ove mo zu nambano kouyenda; okutjavi tji u ha ire koyoye?”
11 Urija wa zira nai ku David: “Otjipwikiro tjOmerikutiropamwe novarwe vOvaisrael wovita, novOvajuda ve ri movitara. Omuhongore wovita Joab novakarere ve vatono ozondanda zawo pendje, nu hapo ami me yenene vi okuyenda koyandje okukarya nokunwa nokukarara puna omukazendu wandje? Tjiri, ami himee tjiti nao!”
12 David arire tja tja ku Urija: “Ndino kara muno; nu muhuka otji me ku esa u yende.” Nu Urija wa kara eyuva ndo mOjerusalem. 13 Mependukirwa David we mu ṋanga okurya nokunwa puna ye, ne mu purukisa nomavinu. Nungwari Urija ongurova wa karara potjiraro tje puna ovakarere vomuhona we, notje ha ire koye.
14 Nu mependukirwa David wa tjanga orutuu ku Joab, ne ru yandja Urija a twaerere. 15 Nu David wa tjanga nai: “Twa Urija komurungu omarwiro ku maye rire omazeu tjinene, tjazumba mu yaruke kombunda ye kutja a ṱe motjirwa.” 16 Joab ngunda ama kovere otjihuro, arire tja twa Urija poṋa puya tjiwa kutja pe novarumendu omapenda vovanavita. 17 Novanavita tji va pita motjihuro nave rwisa Joab, arire tji va zepa ovarwe tjiva va David wovita, nu Urija wina wa ṱa.
18 Tjazumba Joab otja hinda ombuze yokukaraera David omakayendero ayehe wotjirwa. 19 Eye wa rakiza nai komuhindwa: “Tji wa zu nokuserekarera inga omakayendero aehe wotjirwa kombara David, 20 neye a ṱomazenge ne ku pura nai: ‘Okutjavi tji mwe ya popezu nai notjihuro okurwa? Kamu tjivirwe kutja owo mave mu yahere kombanda yorumbo are? 21 Kamu nakuzemburuka Abimelek, omuzandu wa Jerubbaal, tja ṱa are? Ya ri mOtebes omukazendu ma yumbira ewe kotjikweyero okuza korumbo, nari zepa Abimelek? Okutjavi tji mwe ya popezu norumbo?’ NOmbara David tje ku pura nao, mu raera nai: ‘Omukarere woye Urija wina wa ṱu.’ ”
22 Komuhingo mbwi omuhindwa ngwi otja ya ku David, e kemuserekarerera avihe Joab mbye mu rakiza. 23 Neye wa katja nai ku David: “Ovanavita va ri ovanamasa pu eṱe, nowo va piti motjihuro okuturwisira mouhaiya wokuti, nungwari twe ve undura nga pomahitiro wotjihuro. 24 Nowo otji ve tu yahere kombanda yorumbo noviku. Novarwe tjiva vombara va ṱu; nomukarere woye Urija wina wa ṱu.”
25 David arire tja tja komuhindwa: “Katjivise ku Joab kutja eye a ha ṱoruhoze notjiṋa hi, engaruvyo tjinga ari zepa ngamwa auhe. Rwisa otjihuro nu u tji nyone. Kemuyanḓiparise nao!”
26 Batseba tja zuva onḓiro vomurumendu we, arire tje mu riri. 27 Nu oruveze rwomutambo tji rwa kapita, David we mu eta koye. Nu Batseba a rire omukazendu we, ne mu pandukire omuzandu. Nungwari Muhona ka ri nohange na imbi David mbya tjita.
© Herero Revision Bible © Bible Society in Namibia, 2021.
