David ma havere Ovaamoni nOvasirie
(1Eku 19:1-19)1 Kombunda yanao Nahas, ombara yOvaamoni, wa koka nomuzandu we Hanun we mu pingena mouhona. 2 David wa tja nai: “Me vanga okuraisa oupanga ouṱakame ku Hanun otja ihe Nahas tja tjitire ku ami.” David opa hindira ovatumwa okukemuyarura omutima pehi monḓiro ya ihe.
Nu tji va kavaza ngo, 3 ovahongore vOvaamoni arire tji va tja nai ku Hanun, omuhona wawo: “Mo kambura, tjiri, kutja David wa hindi ovatumwa okukuyarura pehi omutima nokukuyozika are? Kako! Eye we ve hindi otja mbe ri ozohoze okuhora otjihuro kutja matji haverwa vi.”
4 Hanun wa kambura ovahindwa va David, a kurura otuyezu twawo orumbembera, na kondo ozombanda zawo nga pomatako; tjazumba e ve esa kutja ve yende. 5 David tja raerwa otjiṋa hi, otja hinda ovatumwa okukevetjakanena, orondu ovarumendu mbo va ṱohoṋi tjinene. Nombara ya tja nai: “Kareye mOjeriko nga otuyezu tweṋu tji twa hapa rukwao; nu tjazumba mu kotoke kozoyeṋu.”
6 Ovaamoni va muna kutja ve ritondisa ku David. Owo otji va hinda ovatumwa kOvasirie va Bet-Rehob na ku imba va Soba, nave kayazema ko ovarumendu ovarwe vopehi 20,000; wina va hinda ovatumwa kombara ya Maaka, nave kayazema ko ovarumendu ovarwe wovita eyovi rimwe, nu kovarumendu mba va Tob va kayazema ko omayovi omurongo na yevari. 7 David wa zuva otjiṋa hi, narire tja hindi Joab puna otjimbumba tjovita nozombangaṋe. 8 NOvaamoni va pita ave kakurama motuteto pomahitiro wotjihuro Raba, Ovasirie va Soba nova Rehob, novarumendu va Tob nOvamaaka ngunda ava kakurama mokuti okuhaiya.
9 Joab tja muna kutja ma rwisirwa okuza komurungu na kongotwe, otja toorora ovarwe vOvaisrael ozombanḓe ne ve kuramisa motuveze amave tarasana nOvasirie. 10 Nu ihi otjihupe tjovarwe wovita wa twa kehi yondyero yomuangu we Abisai, ngwe vi kuramisa ouhunga nOvaamoni. 11 Joab wa tja nai ku Abisai: “Tji wa munu Ovasirie kutja mave ndji havere, indjo u vatere; nOvaamoni tji mave ku havere, ami meya okukuvatera. 12 Kara nomasa nu yanḓipara! Ngatu rwire otjiwaṋa tjetu novihuro vya Ndjambi wetu noupandi. Nu ombango ya Muhona ngai tjitwe!”
13 Joab novarwe ve wovita opu va ryamena okurwa nOvasirie nu imba Ovasirie arire tji va taura. 14 NOvaamoni tji va muna kutja Ovasirie va tupuka, owo wina va tupuka amave tira Abisai, nave hiti motjihuro. Tjazumba Joab arire tja isa okurwa nOvaamoni, na yaruka kOjerusalem.
15 NOvasirie tji va muna kutja va haverwa i Ovaisrael, otji va woronganisa ovimbumba vyawo vyovita. 16 Nu ombara Hadad-Eser wa hinda ovatumwa kOvasirie, mba ri munda mbwina yonḓonḓu Eufrat kutja ve hinge ovita, nowo ve ya kOhelam, averi kehi yondyero ya Sobak, omuhongore omunene wotjimbumba tja Hadad-Eser tjovita. 17 David tja zuva ombuze ndji arire tja woronganisa ovimbumba avihe vyOvaisrael na kondo onḓonḓu Jordan, ne ya kOhelam; nOvasirie va kurama okuhungama David, nave mu rwisa. 18 Ovasirie va taura kOvaisrael, nu David wa zepa ovahinge 700 vomatemba wovita, novakavire omayovi omirongo vine; nu Sobak, ingwi omuhongore omunene wotjimbumba tjovita, wa yahwa na kokere mbo. 19 Nozombara azehe, nḓa ri kehi youvara wa Hadad-Eser tji za muna kutja za haverwa i Ovaisrael, otji za tjita ohange rukwao na wo, naze ve karere. NOvasirie va tira okuvatera Ovaamoni komurungu.
© Herero Revision Bible © Bible Society in Namibia, 2021.
