2 Petrus 2 - Herero Revision Bible (HRR)

Ovahonge woposyo

1 Momayuva nga kapita mwa ri ovaprofete woposyo mokati kotjiwaṋa tja Israel, nu momuhingo tjingewo otjinga amamu kara ovahonge woposyo mokati keṋu. Owo mave eta omahongero omanyone woposyo movineya nave pataṋa Muhona ngwe ve kutura, notjinga amave riyetere oveni ombandjarero yatjimanga. 2 Ovandu ovengi mave kongorere okuhinameritjaerero kwawo, nu motjimbe tjaimbi mbi mave tjiti ovandu varwe mave yamburura Ondjira youatjiri. 3 Nu meraru rawo ovahonge woposyo mba mave mu serekarerere ovimbaharere ngamwa avihe kutja ve munine po ovihohe. Nungwari omberero yawo ya tyerwa wo i Ndjambi rukuru; nombandjarero yawo ya zikama okumanuka!

4 Ndjambi ka yamene ovaengeri mba mba tjita ourunde, nungwari we ve yumba motjovasengwa. Owo nambano va ṱizirwa mo nomapando monḓorera okuundja eyuva rombanguriro. 5 Ndjambi wina ka yamene ouye imbwi oukuru, nungwari wa etere omupupo kombanda youye wovandu ovarunde. Imba porwe mba yamene a ri Noa, ingwi omuzuvarise wousemba, novakwao varwe hambombari. 6 Ndjambi wina wa pangurire ovihuro mbi Sodom na Gomora konyoneno, e vi ningiririsa ne vi isa po otjiraisiro tjaimbi mbi mavi katjitwa kovarunde. 7 Eye wa yamene Lot porwe, ingwi omurumendu omusemba, ngwa munine ouzeu kehi yotjikaro otjihakohoke tjovandu ovehina Ndjambi. 8 Nomurumendu omusemba ngwi wa turire mokati kawo, nu pevapa reyuva aa munu nokuzuva ozondjito zawo zouvi nḓaa ze mu hihamisa mombepo. 9 Muhona otji ma tjiwa kutja imba mbe nondira ku ye meve yama vi momarorero wawo, nokutja imba ovarunde meve vere vi meyuva rombanguriro. 10 Nu tjinene ma vere imba mbe kongorera ozonḓuma zawo zombonḓi nu mbe nyengura ouvara wa Ndjambi.

Ovahonge woposyo mba owo overitjite novirangaranga, nu kave yandja ondengero koviutwa vyeyuru, nungwari moruveze rwanao owo ve vi yamburura. 11 Nangarire imba ovaengeri mbe nomasa tjinene povahonge woposyo mba, kave rondororere oviutwa mbi nomayambururiro komurungu wa Muhona. 12 Nungwari ovahonge woposyo mba ve ritjinda otja ovandu mbe hi nozondunge tjimuna ovipuka vyokuti mbya kwaterwa okukamburwa nokuṱa. Owo ve yamburura otjiṋa ngamwa atjihe tji ve hi nokuzuva nawa. Owo wina mave nyonwa otja ovipuka vyokuti. 13 Owo mave munu ondjambi youhasemba kouhasemba mbu va tjita. Owo kave nohoṋi okutjita otjiṋa ngamwa atjihe mutenya okukovisa ozonḓuma zawo zonyama. Owo eyayu nondjambu tji mave ri puna eṋe, oruveze aruhe ngunda averi mehambano rawo eyaukise! 14 Omeho wawo ye noruhuro komukazendu ngamwa auhe. Okunanukira okutjita ourunde kwawo kaku kovisiwa oparukaze. Owo ve pukisa ovandu mbe hiya zikama mongamburiro. Omitima vyawo vya iririra omunenetima. Owo, tjiri, ve ri kehi yomberero ya Ndjambi! 15 Owo va isa ondjira osemba nave puka. Owo va kongorera ondjira ya Balaam, omuzandu wa Beor, ngwa suverere ovimariva mbya munine mokutjita ouhasemba. 16 Nungwari eye wa vererwa ouvi we. Nu inga okasino ku ke ha hungire, ka hungirire neraka romundu nake tjaere omuprofete okutjita ouyova.

17 Ovandu mba va sana notuharwi tu tu hi nomeva, nu va sana novikamba mbi ha roko nu mbi hingwa i otjivepo. Ndjambi we ve ṱunina oruveze mourekoto womuzororema. 18 Owo ve hungira omambo wokurihiva noviporoporo. Ovandu, mba za nokutaurira imba mbe ri mondjira yoposyo, owo va popwa i wo nongarero yawo yehambano noyokuhinomeritjaerero. 19 Owo ve kwizikira ovandu mba ongutukiro, owo oveni ngunda averi ovakarere wonyonokero, orondu omundu eye omukarere wotjiṋa ngamwa tji tje mu nata. 20 Owo va tjiwa Muhona nOmukuture wetu Jesus Kristus, nu va kuturwa i ombatero ye komahwangero omavi wouye; nungwari kombunda yanao arire tji va kamburwa rukwao nave natwa i ovikaro vyawo ovikuru. Owo korusenina opu va za okurira ovazunḓake tjinene komeho yaindu rutenga. 21 Itja rira kokuwa tjinene ku wo andakuzu owo kave tjivirwe ondjira yousemba komeho yokuitjiwa, nu tjazumba kombunda ave poka ketwako eyapuke, ndi va perwe. 22 Imbi mbya tjitwa ku wo mavi raisa kutja omiano mbi ouatjiri, mbi mavi tja: “Ombwa i yaruka kovikungo vyayo” nu “ombinda ndja kohwa i karangera motjitombo.”