2 Ozombara 16 - Herero Revision Bible (HRR)

Ombara Ahas ma rire ombara mOjuda

1 Mombura oitjamurongo na hambombari youhona wa Pekah, omuzandu wa Remalja, ombara ya Israel, Ahas, omuzandu wa Jotam, otja rira ombara mOjuda, 2 e notjiwondo tjozombura omirongo vivari; neye wa honapara mOjerusalem oure wozombura omurongo na hamboumwe. Eye ka horerere kotjikaro otjiwa tjaihe mukururume ombara David; moruveze rwanao wa tjita imbi mbyaa vi ha tjata ku Muhona, Ndjambi we, 3 na horere kovikaro vyozombara za Israel. Eye wina wa punguha omuzandu we omuini okurira ombunguhiro oningiririsiwa kovisenginina, ama horere kovitjitwa oviyaukise vyoviwaṋa Muhona mbya rambere mehi, Ovaisrael tji ve ya. 4 Ahas wa punguhira ozombunguhiro na twimisire ovyomoro omuwa poṋa apehe pomerikotameneno kovisenginina kozondunda na kehi yomuti auhe womuzire wina.

5 Resin, ombara ya Sirie, na Pekah, ombara ya Israel, va rwisa Jerusalem nave tji kovere, nungwari kave sorere okuhavera Ahas. 6 Moruveze tjingero ndo, Resin, ombara ya Sirie, wa huura otjihuro Elat rukwao, na ramba Ovajuda, mba turire mo. Ovaedom otji va tura mOelat nga ku ndinondi. 7 Ahas wa hinda ovarumendu ku Tiglat-Pileser, ombara ya Asirie, nombuze ndji: “Owami omukarere woye omuṱakame. Indjo u ndji yame kombara ya Sirie noya Israel nḓu maze ndji rwisa.” 8 Ahas wa toora osilveri nongoldo mondjuwo ya Muhona, novihuze vyondjuwo youhona, ne vi hindi vi rire oviyandjewa kombara ya Asirie. 9 Tiglat-Pileser tja zira komeriyarikaṋeno wa Ahas, wa kumuka notjimbumba tje tjovita, a karwisa Damaskus, e tji huura na zepa ombara Resin na twara otjiwaṋa kOkir otja ovahuurwa.

10 Ombara Ahas tja ya kOdamaskus okukatjakanena ombara Tiglat-Pileser otja kamuna otjipunguhiro koṋa ngo, na hindi otjisanekero tjatjo komupristeri Urija, nomaserekarerero wouṋa auhe watjo. 11 Urija otja tunga otjipunguhiro tji tja sana ku tjo, ne tji mana Ahas ngunda e hiya kotoka. 12 Ahas tja kotoka okuza kOdamaskus wa muna kutja otjipunguhiro tja manuka, na rondo ku tjo. 13 Eye otja ningirisisira ozombunguhiro zovinamuinyo nozovikurya ku tjo, na tirire ombunguhiro yomavinu na pemenene ombinḓu yombunguhiro yohange ku tjo. 14 Otjipunguhiro tjongoporo tji tja yapurirwa Muhona, tja ri pokati kotjipunguhiro ihi otjipe nondjuwo ya Muhona; Ahas otje tji rundururira komukuma wokeyuva kokunene kwotjipunguhiro ihi otjipe. 15 Eye wa rakiza ku Urija na tja: “Ungurisa otjipunguhiro ihi otjinene tjandje okupunguhira ko ozombunguhiro ozoningiririsiwa zomuhuka, nozombunguhiro zovikurya zongurova, nozombunguhiro ozoningiririsiwa nozovikurya zombara nozotjiwaṋa, nozombunguhiro zomavinu zotjiwaṋa. Pamenena ku tjo ombinḓu yovinamuinyo avihe mbya punguhwa. Ami ingee me ripura na ihi otjipunguhiro tjongoporo kutja me tji tjiti vi.” 16 Urija wa tjita otja ombara pu ye mu rakiza.

17 Ombara Ahas wa kutura ovivangwa vyoutemba wongoporo mbuyau ungurisiwa mondjuwo ya Muhona, na herura oviyaha ovinene mbya ri mu wo; eye wina wa herura indwi oruungu orunene rwomeva rwongoporo ndwa ri komatambo wozondwezu omurongo na mbari zongoporo, ne ru twa komazikameno womawe. 18 Ahas wina wa isa ko imbwi omututu wotjihavero tjouhona ne u pitisa mondjuwo ya Muhona, na pata omuvero wondjuwo ya Muhona ombara aiyerike mu i hitira; eye wa tjitira kutja a hanganise ombara ya Asirie. 19 Oviṋa avihe vyarwe ombara Ahas mbya tjita vya tjangwa mEkuruhungi rOzombara za Juda. 20 Ahas wa koka na pakwa momaendo wouhona mOtjihuro tja David, nomuzandu we Hiskija we mu pingena mouhona.