Elia nombara Ahasia
1 Kombunda yonḓiro ya Ahab, ombara ya Israel, Ovamoab otji va pirukira Ovaisrael.
2 Ahasia, ombara ya Israel, wa wa okuza kotjikurameno tjetuwo rokombanda rondjuwo ye youhona mOsamaria na hihamwa tjinene. Eye opa hindira ovatumwa na tja ku wo: “Twendeye ku Beelsebub, mukuru wotjisengenina wotjihuro tjOvafilisti Ekron, mu kemupure kutja imbwi omutjise wandje mau veruka?” 3 Nungwari omuengeri wa Muhona wa tja nai ku Elia, omuprofete wa Tisbe: “Rirongera, uka tjakanene ovahindwa vombara Ahasia u kapure nai ku wo: ‘Okutjavi tji mamu kapura Beelsebub, mukuru wotjisenginina wotjihuro Ekron? Mamu tjangovasi mOisrael kamu na Ndjambi are?’ 4 Karaereye ombara kutja Muhona ma tja nai: ‘Ove ko nokuveruka komihihamo vyoye; mo koka!’ ”
5 Okuzambo Elia otja ya. Novahindwa tji va kotoka kombara, oyo ye ve pura nai tja: “Mwa kotokere tjike?”
6 Nowo ve i zira nave tja: “Twa tjakanenwa i omurumendu ngwe tu raere kutja tu kotoke kove okukutjivisa kutja Muhona ma tja nai: ‘Okutjavi ove tji mo tumu ovahindwa okukapura Beelsebub, mukuru wotjisenginina wotjihuro Ekron? Mo tjangovasi mOisrael kamu na Ndjambi are? Ove ko nokuveruka komihihamo vyoye; mo koka!’ ”
7 Ombara otji ye ve pura ai tja: “Omurumendu ngwi wa sana pi?”
8 Nowo ve i zira nave tja: “Omurumendu ngwi we rikutjirire ongwava yomikova vyovipuka, nu wa kutire ekwamo romukova pehuri.”
Ombara otji ya zira ai tja: “OElia, ingwi Omutisbe!”
9 Ombara ya hinda omuhongore puna ovandu ve omirongo vitano okukaeta Elia. Omuhongore ngwi wa kavaza omuprofete Elia a haama kondunda na tja ku ye: “Mukarere wa Ndjambi, ombara ya rakiza kutja u ye ku yo!”
10 Elia wa zira na tja komuhongore: “Ndoovazu owami omukarere wa Ndjambi ngaku rauke omuriro keyuru, nu u ku sesete novandu voye!” Nu mokamanga kwa rauka omuriro keyuru nau seseta omuhongore ngwi puna ovandu ve imba omirongo vitano.
11 Nombara ya hinda omuhongore warwe puna ovandu ve omirongo vitano; neye wa ya na katja nai komuprofete Elia: “Mukarere wa Ndjambi, ombara ya rakiza nai: ‘Indjo tjimanga!’ ”
12 Nu Elia wa zira na tja ku ye: “Ndoovazu owami omukarere wa Ndjambi ngaku rauke omuriro keyuru nu u ku sesete novandu voye!” Nu mokamanga kwa rauka omuriro wa Ndjambi keyuru nau seseta omuhongore ngwi puna ovandu ve omirongo vitano.
13 Tjazumba ombara otji ya hinda omuhongore outjatatu rukwao puna ovandu ve omirongo vitano; nomuhongore ngwi wa karonda kondunda na kawora ozongoro ze komurungu wa Elisa ame riyarikaṋa ku ye na tja: “Mundu wa Ndjambi, arikana, kara notjari na ami novandu vandje imba omirongo vitano! Yama ominyo vyetu. 14 Tara, omuriro wa rauka keyuru nau seseta ovahongore mba ovatenga vevari puna ovandu vawo; nungwari nambano kara notjari na ami!”
15 Nomuengeri wa Muhona wa tja nai ku Elia: “Twende puna ye; o tira!” Elia arire tja sekama na i puna omuhongore kombara. 16 Nu Elia wa katja nai kombara: “Muhona ma tja nai: ‘Ove tjinga awa hinda ovatumwa okukapura Beelsebub, mukuru wotjisenginina wa Ekron, aayo kape na Ndjambi mOisrael omundu ku ma yenene okupura embo re, otji u hi nokuveruka; mo koka.’ ”
17 Nombara Ahasia wa koka otja kembo ra Muhona Elia nda hungirire. Ahasia tjinga e ha ri nomuatje omuzandu, omuangu we Jehoram ope mu pingenena okurira ombara mombura oitjavari youhona wa Jehoram, omuzandu wa Josafat, ombara ya Juda.
18 Oviṋa avihe Ahasia mbya tjita vya tjangwa mEmbo rOzombara za Israel.
© Herero Revision Bible © Bible Society in Namibia, 2021.
