Ombatero kovakambure ovakwetu
1 Nu hapo kahepero okutjangera eṋe ohunga nombatero ndja hindwa kovakambure mehi ra Judea. 2 Ami me tjiwa kutja eṋe mu nonḓero okuvatera, nu mbe mu hiva komurungu wOvamakedonie, e tja: “Ovakwetu mOakaja ve rirongerera okuvatera okuza kombura ndja zu ko.” Nonḓero yeṋu yokuvatera ya panḓiparisa ovengi vawo. 3 Nambano me hindi ovakwetu mba, kokutja okumutanga kwetu motjiṋa hi aku ha rire omambo womungandjo uriri. Nungwari otja punga amba hungira, eṋe mamu sokuvazewa amwe rirongerere okuvatera. 4 Nu tji pe he ri nao, Ovamakedonie tji ve ya puna ami nave munu kutja eṋe kamuye rirongera, eṱe, tjiri, matu ṱohoṋi mena romeriyamekero wetu ku eṋe, neṋe amu ṱohoṋi tjinene komeho. 5 Ami opu mba munina kutja ohepero okuningira ovakwetu mba kutja ve tenge po pu ami okuyenda ku eṋe, nu ve kaṱune ihi otjiyandjewa tjondaya tji mwa kwizika rukuru. Otjiyandjewa hi tjondaya me yokutjivaza atja ṱunwa otja ombunguhiro yatjiri yondangero, nu kambunguhiro, ndji mwa yandja mokuṋiṋikiziwa.
6 Zemburukeye kutja omundu ngu kuna ozondwi nḓe hi nanḓengu, ma kondo ovihape, mbi hi nanḓengu; nu ngu kuna ozondwi ozengi, ma kondo ovihape ovingi. 7 Auhe nga yandje otja punga e rivangere momutima we, nu a ha yandja moruhoze poo mokuṋiṋikiziwa; orondu Ndjambi wa suvera ingwi ngu yandja nouharupu. 8 Ndjambi u nomasorero okumupa avihe okukapita ouhepe weṋu, kokutja momuhingo auhe eṋe oveni aruhe mu kare novingi okuyenena, nu wina mu sore okuyandja ombatero ndja yenene kotjiungura ngamwa atjihe otjiwa. 9 Nu omatjangwa maye tja:
“Eye u yandja notjari kovasyona;
nouwa we u karerera nga aruhe.”
10 Ndjambi ngu yandja ondwi okukuna nomboroto okurya, wina me mu pe ondwi ne i hapisa, nu ingwi okuyandja kweṋu nouharupu maku eta omakondero omanene. 11 Eye aruhe me mu tumbisa pu pa yenene oruveze aruhe, eṋe mu sore okuyandja nouharupu, kokutja ovandu ovengi ve tje okuhepa ku Ndjambi koviyandjewa vyeṋu owo mbi va pewa i eṱe. 12 Orondu otjiungura tjombatero hi katji isa po ouhepe wovakambure mehi ra Judea porwe, nungwari wina tji etera Ndjambi ondangero onene. 13 Nu motjimbe tjotjiraisiro otjikahuke tjotjiungura tjeṋu hi, ovandu ovengi mave yozike Ndjambi. Owo mave hivirike Ndjambi mena rouṱakame weṋu mOmbuze Ombwa ya Kristus, ndji mu hongonona, na mena rokuyandja kweṋu nouharupu ku wo na kovandu avehe. 14 Nowo mave mu kumbire amave mu zeri tjinene, Ndjambi tjinga a raisa otjari tje otjihimise ku eṋe. 15 Ngatu tje okuhepa ku Ndjambi kotjiyandjewa tje otjinene tji tji hi nomatamunino.
© Herero Revision Bible © Bible Society in Namibia, 2021.
