1 Eṱe matu tjiwa kutja omaturiro wetu wokombanda yehi, nge ri otjihandura uriri, tji ya haṋewa, eṱe tu nomaturiro meyuru, nga zikama. Owo omaturiro nge ha tungirwe i ovandu, nungwari nga tungwa i Ndjambi, nu nge karerera aruhe nga aruhe. 2 Nu ngunda atwa tura otjihandura kombanda yehi tu tjema, tjinga atu zera okuyakurwa momaturiro wetu nga womeyuru, 3 Eṱe katu nokuvanga okukutjururwa nokukurama mutundu komurungu wa Ndjambi. 4 Eṱe mba ingee mbu twa tura otjihandura kombanda yehi tu tjema nu tu tjinda ouzeu, tjinga atu ha vanga okuisapo orutu ndwi rwoundu; tu vanga okuzara indwi rwomeyuru kombanda yaindwi rwoundu kutja ihi otjikoke tji ṋiṋiwe i omuinyo. 5 Ingwi ngwe tu ṱunina omarundurukiro nga, eye oNdjambi. Nu eye we tu pa Ombepo ye otja otjiyambo tjaimbi avihe mbi matu kapewa.
6 Opu twa zokuyanḓipara momutima. Nu matu tjiwa kutja, ngunda atu ri morutu ndwi, ingee tu ri kokure nomaturiro wa Muhona. 7 Eṱe omahupiro wetu ye za mu imbi mu tu kambura nungwari ka ezu mu imbi mbi tu muna. 8 Eṱe twe ura nonḓero, nu itjatu vanga okuisa omaturiro worutu rwetu natu katura pu Muhona. 9 Nungwari kutja twa tura mba poo twa tura ngwina, tu nonḓero imwe uriri, noyo okongwi okutja eye a kare nonyuṋe mu eṱe. 10 Orondu eṱe atuhe tu sokumunika komurungu wa Kristus okupangurwa i ye. Nu auhe ma pewa imbi mbye sokupewa otja ku imbi avihe mbya tjitire ngunda e nomuinyo kombanda yehi, kutja vya ri oviwa poo vya ri ovivi.
Ohange na Ndjambi mu Kristus
11 Eṱe tu tjiwa kutja okukara nondira ku Muhona ku nomaheero watjike. Opu tu zokukondja okupopera ovandu ku ye. Ndjambi u tu tjiwa okumana, nami me undju kutja eṋe wina momitima vyeṋu mamu ndji tjiwa. 12 Eṱe katu nakurihivira eṋe rukwao, nungwari matu mu pe oruveze kutja mu rihivire eṱe, eṋe kutja mu sore okuzira imba mbe rihivira imbi mbi munika, nu mbi he ri mbi vyomoukoto womutima. 13 Ndovazu twa puruka ozondunge, omena ra Ndjambi, nu ndovazu tu nozondunge zetu azehe, okutja omena reṋu. 14 Orusuvero rwa Kristus ru tu hinga, tjinga atwa tjiwa kutja omundu umwe ngwi wa ṱira avehe, nu ihi matji hee kutja avehe ve norupa monḓiro ye. 15 Nu eye wa ṱira avehe, kokutja imba mbe nomuinyo ave ha ngara ve nomuinyo mu wo oveni, nungwari a rire ingwi ngwa ṱira wo nu ngwa pendurirwa wo.
16 Nu nambano eṱe katu tji sosonona omundu komuhingo wovandu. Nandarire kutja rukuru twa sosononene Kristus komuhingo wovandu, katu tji nokuuhara amatu mu sosonona nao rukwao. 17 Ingwi ngu ri owa Kristus, eye omundu omupe. Imbi ovikuru vya kapita, avihe vya rire ovipe. 18 Avihe mbi vya tjitwa i Ndjambi. Nangarire kutja eṱe twa ri ovanavita na ye, eye we tu hanganisa na ye omuini mu Kristus. Neye we tu pa otjiungura tjoukarere womahanganeno. 19 Ombuze yohanganisiro oyokutja Ndjambi wa hanganisa ouye na ye omuini mu Kristus. Nu Ndjambi ka karere nongore nouvi wawo. Nu indji ombuze yohanganisiro we i yandja ku eṱe.
20 Neṱe tu hungirira po Kristus aayo oNdjambi omuini ongu ma hungire mu eṱe. Eṱe tu riyarikaṋa ku eṋe mena ra Kristus atu tja: Yakureye ohanganisiro Ndjambi ndja tjita mu ye. 21 Kristus ke na pa tjitire ourunde, nungwari Ndjambi we mu tjita otja omurunde motjimbe tjetu, kokutja eṱe, moruwano na Kristus, tu sore okuisirwa i Ndjambi.
© Herero Revision Bible © Bible Society in Namibia, 2021.
