Paulus nOvaapostele vyOposyo
1 Andakuzu mamu ndji zara kaṱiṱi, nandarire kutja me hungire ouyova. Arikaneye ndji zareye nai! 2 Ami mbi mu kondjera nonḓero, ndji za ku Ndjambi. Eṋe mu ri otja omusuko omukohoke ngu mba varekera okukupwa i omurumendu umwe uriri. Nomurumendu ngwi onguri Kristus. 3 Nungwari ami me tira kutja omeripura weṋu maye zunḓaka, nokutja mamu poka komeriyamekero weṋu aehe omakohoke ku Kristus erike, tjimuna Eva tja wovisirwe i onyoka novineya vyayo. 4 Eṋe mu zara nenyando omundu ngamwa ngu meya ku eṋe okuyekuzuvarisa Jesus warwe ngu he ri ingwi eṱe ngu twa zuvarisa; nu wina eṋe mu yakura ombepo yarwe nombuze ombwa yarwe, ndji he ri ndji eṱe ndji twe mu pa.
5 Ami me tjangovasi hi rivara omuhinanḓengu povandu veṋu mba mbu ku za “ovaapostele!” 6 Nandarire kutja ngahino owami omuhinamirya mokuhungira, imwi mondjiviro mbi nomirya. Imbi eṱe twe mu raisira ongahukiro oruveze aruhe na momihingo avihe.
7 Ami mba zuvarisa Ombuze Ombwa ya Ndjambi ku eṋe nokuhinondjambi. Mbe risusuparisa, kokutja eṋe mu tongamisiwe. Indu ngahino mba tataiza are? 8 Kokutja mbi mu karere, ami ee sutwa ondjambi i ozombongo zarwe, nu komuhingo mbwi otje ri aayo mbi ze punda oviṋa. 9 Tji mba ri mokati keṋu, hi yandjere eputi komundu tjee hepa otjimariva; orondu ovakambure ovakwetu mba zire kOmakedonie ve ndji etera atjihe tji mba hepere. Mba kondjere kutja e he mu pe ouzeu, nu wina me kondjo kutja e he mu pe ouzeu nangarire kombunda yanai! 10 Mbi rihivira otjiṋa hi, notja kouatjiri wa Kristus mbu ri mu ami, kape nomundu mehi, arihe ra Akaja ngu me ndji yeka ohiviro ndji. 11 Hapo me hungire nai motjimbe tjokutja hiye mu suvera poo? Ndjambi ma tjiwa kutja ami mbe mu suvera!
12 Notja tji me tjiti nambano, otjinga ame tjiti aruhe wina, kokutja mbi tjaere ovaapostele imba varwe ave he rihivi nave he ritjindi otja ovaapostele tjimuna eṱe. 13 Ovandu otja imba owo ovaapostele woposyo, nu ve rivara kutja ovaapostele va Kristus. 14 Nu ihi katjikumise! Nandarire Satan omuini u ritjitukisa a munike otja omuengeri wondjerera. 15 Nu otje he ri oukumise kutja ovakarere ve wina mave rivara otja ovandu mbe tjita ombango ya Ndjambi. Ondjandero yawo ma i kara otja koviungura vyawo.
Paulus ma tatumisiwa otja omuapostele
16 Ami me yarukire po rukwao: Ape ningi omundu ngu me ripura kutja owami eyova. Nu tji pe he ri nao, ndji vareye otja eyova, kokutja mbi rihive kaṱiṱi wina. 17 Ihi nambano tji me hungire, hi nakuhungira tjo otja Muhona punga ama vanga; motjiṋa hi tjokurihiva ami, tjiri, me hungire otja eyova. 18 Nungwari tjinga ape novandu ovengi mbe rihiva komuhingo wovandu, ami wina otjinga ame tjiti! 19 Eṋe oveni oweṋe ovanazondunge, nu mu zara imba omayova nenyando. 20 Nu tji pena ngu me mu isa po ovakarere, tjiri, mu zareye, na tji pena ngu me mu huura oviṋa, na tji pena ngu me mu tjiti ovineya, na tji pena ngu me mu nyengura, na tji pena ngu me mu tono orupyu momurungu. 21 Ihi me hungire kutja mbi ṱohoṋi yokutja twa ri ovingundi tjinene okutjita oviṋa otja imbi!
Nambano ami me hungire otja eyova: Otjiṋa ngamwa atjihe omundu tji ma vanga okurihivira tjo, ami wina me rihivire tjo. 22 Owo Ovaheberi? Ami wina. Owo Ovaisrael? Ami wina. Owo ozondekurona za Abraham? Ami wina. 23 Owo ovakarere va Kristus? Nambano me hungire aayo hi nozondunge nungwari owami omukarere omusemba okukapita wo! Mba ungura tjinene okukapita wo, mba kara motjovakamburwa potuingi okukapita wo, mba tonwa potuingi okukapita wo, nu mba kara moumba wonḓiro potuingi. 24 Nu mba tonwa ovikando vitano i Ovajuda, notjikando atjihe mba tonwa ozongora omirongo vitatu na muvyu; 25 nu tutatu mba tonwa notuhongwe i ovahona vOvaroma; notjikando tjimwe mba vetwa nomawe. Nu tutatu mba ri mozondjuwozomomeva, nḓa tekera mokuvare, nu otjikando tjimwe mba kara mokuvare omutenya nouṱuku. 26 Momauyenda wandje omengi mba ri momaumba pekepeke: Omaumba wozonḓonḓu, omaumba wovapunde woviṋa, omaumba wOvajuda ovakwetu nomaumba wa imba mbe he ri Ovajuda. Pa ri omaumba movihuro na mokuti, nu wina pa ri omaumba mokuvare na mokati kovakambure ovakwetu ovanavineya. 27 Mba ri noviungura ovizeu neputi, potuingi mba kara nomauṱuku nokuhinokurara, nu potuingi mba kara nondjara nonyota; nu potuingi mba kara nokuhinovikurya, nokuhinomawameno, nokuhinotjirikutjire mombepera. 28 Pendje yaimbi avihe, ami wina ee uhara ame rikendere ozombongo azehe. 29 Tji pena ngwa ngundipara, ee ri munu aayo ami wina mba ngundipara; nu tji pena ngwa tura ondjo, ami wina ee hihamwa omutima.
30 Nu tji mbi sokurihiva, ami me rihivire oungundi wandje. 31 Ndjambi, Hiya Muhona Jesus, ma tjiwa kutja hi nokukora ovizeze. Eye nga tangwe aruhe nga aruhe! 32 Tji mba ri mOdamaskus, ongooneya yombara Aretas wa zikire ovatjevere pomuvero wotjihuro okundjikambura. 33 Nungwari mba raurirwa mondovi yorumbo motjimbamba, narire tji mba poṋa momake we.
© Herero Revision Bible © Bible Society in Namibia, 2021.
